Yesu mepakaoha i Alo Pengkarooangaa
3
1 Hambela tempo, mesua mbulimi Yesu i lalu sou penombaanda to Yahudi. Inditi, ara hadua tauna au wara taiena hambali. 2 Ara worihe toParisi inditi au mohaoki kanawoana Yesu, ba ina mobago i Alo Pengkarooangaa. Ido hai rakamata liliu apa au ina nababehi Yesu. 
Yesu mopakaoha bosa tauna
7 Hangko inditi Yesu hai topeguruNahe meangkahe lao i wiwi rano Galilea. Bosa to Galilea meula i Yesu. Bosa wori au hawe hangko i tampo Yudea, 8 hangko i Yerusale, hangko i tampo Idumea, hangko i ntanda orupena owai Yarade, hai ara wori hangko i wanua Tirus hai Sidon. Bosa ntepuu tauna au mai i Yesu lawi mohadihe ope-ope au Nababehi. 9-10 Yesu mopakaoha bosa tomahai, alana momberirimohe tauna lao mohungkuki Yesu bona ratobo. Anti kabosanda tauna, ido hai motudumi topeguruNa mopasilolonga duanga bona rapesawii dati raupi-upi tauna bosa. 11 Hawe worihe tauna au napesuangi tokadake. Kamoitanda Yesu, liliuhe molingkudu i lindoNa, hai monganga-ngangahe, rauli, “Oio AnanaKo Pue Ala!” 12 Agaiana nakontohe Yesu bona inee mpuu rauli-uli kahemaNa.
Yesu mampilei hampulo hai rodua topeguruna au Napopewalihe suroNa
13 Roo indo, mempanaimi Yesu lao i tongku-tongkuna, hai mokakio tauna hintoto hai peundeaNa. I kahawenda tauna iti, 14 Napileimi hampulo hai rodua hangko i olonda au Napopewali suroNa, Nauliangaahe, “Kupileikau bona niporangaiNa. Ina Kutudukau lao mopahawe Ngkora Marasa, 15 hai ina Kuweikau kuasa mampopeloho seta.” 16-19 Idemi hanganda au hampulo hai rodua iti: Simo (au Nahanga Peturu); Yakobu anana Sebedeus; hai Yohane adina Yakobu (Nahangahe, Boanerges—lempona: ‘ana gumpatahe’a); roo indo, Andaria, Pilipu, Bartolomeus, Matiu, Tomas, Yakobu anana Alfeus, Tadeus, Simo to Selot, hai Yudasi Iskariot au mampobalu Yesu.
Yesu hai Beelsebul
20 Roo indo, mesulemi Yesu i sou. Agaiana bosa wori tauna hawe motoleliki, alana Yesu hai topeguruNa barapohe tepaka maande. 21 Mohadi apa au mewali iti, hawemohe halaluNa mai moala Yesu, lawi rauli Ia magilami. 22 Ara worihe guru agama to Yahudi au hawe hangko i Yerusale. Rauli guru agama iti, “Ia napesuangi Beelsebul, datu seta. Datu seta itimi au mowei kuasa mampopeloho seta.”
23 Ido hai Nakakiohe Yesu, hai Napololitaahe bahangkia pakana ngkora pandiri, Nauli, “Peisa pae seta mampopeloho hangka setana? 24 Ane pandirina ara hambua kadatua, hai tauna bosa i lalu kadatuana mosisala liliuhe hai mombeewahe, kadatua iti bara ina mantaha. 25 Ane tauna hantina mobungka-bungka liliuhe, bara wori mantaha potina iti. 26 Nodo wori i kadatua seta: ane Datu Tokadake mampopeloho hangka tokadakena, lempona seta moewa hangka setana, alana kadatuanda magero.
27 Datu Tokadake peisa rapandiri nodo tauna au maroho. Ane mesuake i lalu souna tauna au maroho hai mampeinaoke morampaki ihi souna, hangangaa tahilu hampai ampu sou iti, hangko peisarike morampaki ope-ope anu-anuna. Nodo wori, ane Iko mampopeloho seta, lempona, Kunangimi Datu Tokadake.
28 Mewali bona niisa: ope-ope dosa hai lolita pesapuaka peisa raampungi. 29 Agaiana hema au mosapuaka Inao Malelaha, barapi ara ampungina. Babehia iti ina rasalai hawe i hae-haena.” 30 Yesu Mololita nodo, lawi ara au manguli Yesu napesuangi tokadake.
Inana hai halaluna Yesu
31 Bara mahae hangko indo, hawemi inana hai adinahe Yesu meangka i raoa sou. Motuduhe tauna lao mokakio Yesu, lawi rapeinao mololita Iria. 32 I tempo iti, tauna bosa au motoleliki Yesu, mololitahe, rauli, “Guru, inaMu hai adiMuhe, arahe i raoa maiKo rahaoki.”