Ngkora pandiri kana i hampulo anantowawine
25
1 “Ane hawe suleNa nodo Datu, ara tauna au masilolonga hai ara wori au bara masilolonga. Pewalina nodo ngkora pandiri ide: hampulo anantowawine motunggai lao modupa toratauna tobalilo, hadua-haduahe moanti hulonda. 2 Limahe au ntuli, limahe au mapande. 3 Lima anantowawine au ntuli iti, moantihe hulonda, agaiana bara melabi minanda. 4 Lima anantowawine au mapande moanti hulonda hai moanti worihe mina i pambolianda au ina rapopotambai minana hulonda. 5 Agaiana anti kamahaena toratauna tobalilo iti rapepegia, alana maleluemohe anantowawine iti, hai kahopoana leta hahamohe.6 Tanga kaindi, hangko arari tauna au mekakio, nauli, ‘Oloumi mai toratauna tobalilo! Maimi nidupa.’ 7 Pearondami anantowawine au hampulo iti, hadua-haduahe mopasilolonga hulonda. 8 Anantowawine au ntuli mouliangaahe ranganda au mapande, ‘Ene, niwei wongkamia minami haodi, hulongki ina matemi.’
9 Rahanaihe au mapande, ‘Minangki bara handa ane tagaa! Laomokau hampai meholo i topobalu-balu mina.’ 10 Lao mpuumohe anantowawine au ntuli iti meholo mina. I kalaonda meholo, hawemi toratauna tobalilo. Lima anantowawine au mapande iti, masilolonga amimi hulonda, ido hai liliuhe mesua hihimbela hai toratauna tobalilo i lalu sou posusaa, pane ratukomi baba.
11 Roo indo, hawe mbulimohe anantowawine au ntuli. Mekakiohe hangko i raoa, rauli, ‘Ee tua! Bungkahia wongkamia baba!’
12 Nauli toratauna tobalilo, ‘Barakau kuisa.’ ”
13 Napahopo Yesu ngkora pandiriNa node, “Ido hai hangangaa masilolongakau, lawi bara niisa kaimpirana kahaweNgku.”
Ngkora pandiri kana i rodua hawi au madota mobago hai hadua au lohe
14 “Ane hawe suleNa, pewalina nodo ngkora pandiri ide: hadua tuana ina lao i wanua au karao. Hangko damani padu, mokakio hawina hai naweihe doi rapopolumao bona ara anana. 15 Naweihe hadua-hadua moula i pesauruanda. Hadua nawei lima sabuna doi bulawa, au hadua rosabu, hai au hadua hasabu. Roo indo, padumi. 16 Hawi au rawei lima sabuna doi bulawa liliu mampopolumao doi iti mohaoki anana, nalambi mpuumi anana lima wori sabuna. 17 Nodo wori hawi au rawei rosabu, ia molambi wori anana rosabu. 18 Agaiana hawi au rawei hasabu pea laori mokae tampo napowunii doina ampuna.
19 Mahae hangko indo, mesulemi ampunda, hai mokakiomohe hawina napekune noumba karapopolumaona doina. 20 Hawi au rawei lima sabuna doi bulawa mai hai moanti i ampuna hampulo sabuna, nauli, ‘Ampu, au nuweina hangkoia lima sabuna. Idemi anana, lima wori sabuna.’
21 Nauli ampunda, ‘Maroa mpuu kanupopolumaona bago au kuweiko. Mewali, anti kamanotomu i bago au koi, kupoinalaiako bago au mahile. Maimoko hihimbela hai iko i lalu katana-tana.’
22 Hawi au rawei rosabu doi bulawa hawe worimi, nauli: ‘Ampu, rosabu hangkoia au nuweina. Idemi anana rosabu wori.’
23 Nauli ampunda iti, ‘Maroa mpuu kanupopolumaona bago au kuweiko. Mewali, anti kamanotomu i bago au koi, kupoinalaiako bago au mahile. Maimoko hihimbela hai iko i lalu katana-tana.’
24 Roo indo, hawe worimi hawi au rawei hasabu, nauli, ‘Ampu, kuisa kamakancamu. Nupopobago mantimingkai. Nutudungkai mehua hai mantuda, agaiana irio haha wuana. 25 Langana, ido hai laona mowuni doimu i lalu tampo. Mewali, idemi doimu.’
26 Nauli ampunda iti, ‘Oio hawi au kadake hai au lohe mobago! Nuisa ide iko tauna au mampopobago mantimi hawingku. Kutuduhe mehua hai mantuda bona iriko haha wuana! 27 Ane nodo, moapari doi iti bara nuwei peami tauna ntanina mampopolumao, bona ane mesulena, doingku kulambi hai ara wori anana!’ 28 Nauli mbuli ampunda iti i hawi tohaduana, ‘Nuala doi au ara iria, hai nuwei i hawingku au molambi doi bulawa hampulo sabuna. 29 Lawi tauna au peisa rapoinalai hai apa au rawei, ina rawei mbuli bona tetambai. Agaiana tauna au bara peisa rapoinalai, nauri haodi pea au rawei, batena ina raala hule. 30 Hai hawi au bara mobundu iti, nitendemide i lalu kakaindiana. Inditi ia ina moteria hai mantodiha liliu.’ ”
I alo pebotusi i kahopoa dunia, Ana Manusia ina mopatani tauna au kadake hai tauna au maroa
31 “Iko Ana Manusia, ane hawe suleNa, ina meawaNa hai mahile mpuu kamakuasaNgku, hai ina raporangaiNa ope-ope malaeka. Ina mohudaNa i pohudaa kadatuaNgku au meawa. 32 Ope-ope tauna ina teruhu i lindoKu hai Kugaahe mewali rontobu, nodo hadua toporewu mopatani dimbana hai towauna. 33 Tauna au mobabehi peundeana Pue Ala Kupahantobuhe ntanda i koanaNgku, hai tauna au mesapuakahe ntanda i kabeoNgku.
34 Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia. 35 Lawi i tempoKu marimi, nipaandeNa. MangkadouNa, nipaenuNa. MoliuNa i soumi, nipopehupeNa. 36 Bara ara hampiKu, nihampiiNa. MahaiNa, nipakuliiNa. TangaNgku ratarunggu, nisondakiNa.’
37 Mehanahe au ntanda i koanaNgku, rauli, ‘Pue, impiraKo kiita marimi hai kipaandeKo, ba mangkadouKo hai kipaenuKo? 38 ImpiraKo moliu i soungki, hai kipopehupeKo? ImpiraKo kiita bara ara hampiMu, hai kihampiiKo? 39 ImpiraKo kiita mahai hai kipakuliiKo, ba i lalu tarunggu, hai kisondakiKo?’
40 Hai Iko Datu, Kuhanaihe, ‘Bona niisa, apa au nibabehi motulungi halaluNgku, nauri hadua pea halaluNgku au meahi-ahi katuwona, lempona, himbelami hai nibabehi Iriko.’
41 Roo indo, Kuuliangaahe au ntanda i kabeoNgku, ‘Padumokau hangko inde, ikamu au harara i UmaNgku! Mesuamokau i lalu api au rore liliu, au rapasilolonga mewali pohukuanda Datu Tokadake hai hinangka malaekana. 42 Lawi i tempoKu marimi, baraNa nipaande. MangkadouNa, baraNa nipaenu. 43 MelempoNa i soumi, baraNa nipopehupe. Bara ara hampiKu, baraNa nihampii. MahaiNa, baraNa nipakulii. TangaNgku ratarunggu, baraNa nisondaki.’
44 Rahanai woriNa, rauli, ‘Pue, impiraKo kiita marimi ba mangkadou ba nodo tauna au moliu, ba baraKo mehampi, ba mahai ba ratarunggu, hai baraKo kitulungi?’
45 Hai Iko Datu, Kuhanaihe, ‘Bona niisa, anti kadana nitulungi tauna au meahi-ahi tuwonda, lempona, Ikomi au bara nitulungi.’ ” 46 Napahopo Yesu lolitaNa, Nauli, “Ope-ope tauna au kadake iti ina ratendehe i lalu naraka hai rahuku hawe i hae-haena, hai tauna au manoto ina molambihe katuwo maroa au bara mokahopoa.”