Pue mopatongawa ahiNa i Yunu
4
1 Yunu koi inaona hai rumpu lawi tunggaiana Pue bara mewali. 2 Tangana masodo, Yunu mekakae i Pue, nauli, “O Pue, bara pae kuulimi hangkoia i tempoku mani i boeangku, kadaMu ina mampopewali tunggaiaMu mohuku Niniwe. Ido hai pane melangkana lao i Tarsis, lawi kuisa Oio Pue Ala au buke kamaahi, pepokakaia, kasabara hai ahi au bara mokahopoa. Idomi pane pehuku au Nuliwomi peisa Nubaliki. 3 Mewali ide-ide Pue, Nuala peami inaongku, lawi agingkumi mate panena node.” 4 Nauli Pue, “Apari pongkana pane nukasodoi apa au Kubabehi?”5 Hangko indo, padumi Yunu mokaraohi wanua hai maida ntanda i Mata alo. Nababehimi hondo bona napeongai mampegia apa au ina mewali i wanua Niniwe. 6 Anti popakanotona Pue Ala, tuwomi hehi au marumba tawena hai mendoa i hondo au nababehi hai mobambaongaki Yunu bona tepalindo laluna. Hehi iti napokatana mpuu Yunu. 7 Agaiana kahalona hungku mabaa, anti popakanotona Pue Ala, hawe hambaa koe motata uakana pane malau. 8 I pembetona alo, Pue Ala mopaara himburu au mapana hangko i Mata alo. Anti kamapanana, waana Yunu nodomi mararu, ido hai ina malimpu. Anti kamaparina nahadi, naulimi, “Agingkumi mate panena node.”
9 Agaiana Pue Ala mololita i Yunu, Nauli, “Bara hintoto nuposusa lalu kana i hehi iti.”
Nahanai Yunu, nauli, “Moapari hai bara? Hintototo kukasodoi duungku mate.”
10 Hangko indo nauli Pue i Yunu, “Hehi iti nupokakaia, moleri barato oio au mopatuwo hai mokadipura. Hehi iti tuwo hambengia pea, i karombengina matemi. 11 Mewali noumba hai Niniwe, wanua au mahile iti? Lawi inditi arahe hangatu rompulo sabuna labi tauna au bara mani moisa apa au maroa hai apa au kadake hai ngkaia wori binatanda. Hangangaa Kupokakaia ntepuu worihe.”a