Yunu 2

Pekakaena Yunu

1 Hangko i lalu tai bau, Yunu mekakae i Pue, Pue Ala au napenombai, nauli, 2 “O Pue,

i lalu kamaparingku, meraroana Irio

hai Nuhanaina.

Hangko i dunia tomate, merapi tulungina.

Pamperapiku Nupehadingi hai Nupailalu.

3 Nutendemona i tahi au kaladu,

hawe i pohi tahi.

Inde natolelikina owai

hai balumba au mahile au Nutudu,

mowehikana.

4 Nauli lalungku,

‘Nawuramona Pue hangko i lindoNa.

Barapi ina kuita souNa au malelaha.’

5 Owai tahi hampa i ngangangku.

Owai tahi motoleliki watangku.

Lomo tahi mokaputi waangku.

6-7 Tirina hawe i lobuna bulu au i lalu tahi

i paidaa au tetuko babakana hawe i hae-haena.

Tanoanangku malede i lalu watangku.

KubuhuinaoKo hai mekakaena Irio.

Hawe mpuumi pekakaengku Irio.

I souMu au malelaha Nupehadingimona,

pane Nuhorena hangko i lalu tahi,

O Pue, Pue Ala au kupenombai.

8 Tauna au menombahe i anitu au mbero-mbero

mopalehiKo,

moleri Oiomi au mampokaahi liliuhe.

9 Agaiana iko, ina mamponanina nani petoia i lindoMu,

hai ina mohuhuna popenomba Irio.

Ope-ope dandiku ina kupabukei.

Oiomi Pue au mamperuruina.”

10 Hangko indo, mongkorami Pue i bau iti, hai bau iti mobola Yunu i lore.