เธสะโลนิก๋า
บทนำ
ผู้เขียนจดหมายฉบับนี้คือเปาโล ต้านเขียนเถิงผู้เจื้อในเมืองเธสะโลนิก๋า ต้านเขียนขึ้นประมาณปี๋ ค.ศ. 50-51 นี่เป๋นจดหมายฉบับแรกตี้เปาโลเขียนเปื้อหื้อก๋ำลังใจ๋คริสตจักร
เปาโลบอกข่าวดีหื้อกับคนในเมืองเธสะโลนิก๋าหลังจากตี้ออกจากเมืองฟีลิปปี เธสะโลนิก๋าเป๋นเมืองใหญ่กับสำคัญตี้สุดในแคว้นมาซิโดเนีย เซิ่งอยู่ในอาณาจักรโรม สมัยนี้อยู่ประเทศกรีก เปาโลได้ฮับข่าวเกี่ยวกับคริสตจักรเธสะโลนิก๋าต๋อนตี้ต้านก่ำลังอยู่ตี้เมืองโครินธ์ แล้วเปาโลก็เขียนจดหมายฉบับนี้ขึ้นเปื้อหื้อก๋ำลังใจ๋หมู่เขา กับได้อธิบายเถิงบางสิ่งบางอย่างตี้หมู่เขาเข้าใจ๋ผิด
เปาโลเขียนหื้อผู้เจื้อจาวเธสะโลนิก๋าฮู้ว่า ต้านปอใจ๋กับขอบคุณพระเจ้าตี้หมู่เขาเข้มแข็งในความเจื้อ เปาโลเขียนว่า ห่วงใยหมู่เขา แล้วใค่ไปแอ่วหา แต่ไปบ่ได้ แล้วใจ๊ทิโมธีไปหาแตน แล้วได้ข่าวว่าหมู่เขายังมั่นคงในความเจื้อแม้จะโดนค่ำ เปาโลตักเตื๋อนหื้อหมู่ผู้เจื้อใจ๊จีวิตอย่างเป๋นตี้เปิงใจ๋ของพระเจ้าต่อไปนักขึ้นแหม กับสอนหื้อเข้าใจ๋ในเรื่องก๋านมาเตื้อตี้สองของพระเยซู เซิ่งจะมีก๋านฮับผู้เจื้อไปอยู่กับพระเยซู