โคโลสี
บทนำ
จดหมายฉบับนี้เขียนโดยเปาโล ต้านเขียนไปเถิงผู้เจื้อตี้เมืองโคโลสีต๋อนตี้ติดคอกอยู่ในกรุงโรม ต้านเขียนจดหมายฉบับนี้ขึ้นประมาณปี๋ ค.ศ. 60
โคโลสีเป๋นเมืองสำคัญตี้อยู่ติดแม่น้ำไลคัสตี้ไหลผ่านแคว้นเอเชียตังวันตก ในสมัยนี้อยู่ในประเทศตุรกี เปาโลได้บอกข่าวดีในเมืองเอเฟซัสสองปี๋ ย้อนจาอั้นข่าวดีนี้ก็แผ่ขยายไปแหมหลายเมืองในแคว้นเอเชีย (กิจก๋าน 19:10) เปาโลบอกไว้ว่าจาวโคโลสีได้ยินข่าวดีนี้จากเอปาฟรัส คนตี้เกยได้ยินกำเตสนาของเปาโล แล้วก็ได้มาเป๋นเปื้อนฮ่วมงานของต้าน ต่อมาต๋อนตี้เปาโลติดคอกอยู่ในกรุงโรม ต้านเขียนจดหมายฉบับนี้เถิงผู้เจื้อจาวโคโลสีย้อนว่าต้านได้ยินข่าวว่าหมู่เขาก่ำลังหลงไปต๋ามกำสอนตี้ผิด
เปาโลเตื๋อนหมู่ผู้เจื้อในเมืองโคโลสีบ่หื้อเจื้อกำสอนตี้ผิด ย้อนกำสอนหมู่นี้ขึ้นอยู่กับกำกึ๊ดของคนตี้สอนว่าหมู่เขาฮับความรอดป๊นบาปโต้ษได้โดยเยียะต๋ามกฎเก๋ณฑ์ของมนุษย์ เจ้น กฎเก๋ณฑ์ตี้เกี่ยวกับสิ่งตี้กิ๋นได้กาว่าห้ามกิ๋น แต่เปาโลสอนว่า หมู่เขาจะรอดป๊นบาปโต้ษได้ ก็โดยเจื้อวางใจ๋ในพระเยซูเต้าอั้น พระองค์เป๋นผู้ตี้มีฤทธิ์อำนาจสูงสุดเหนือกู้สิ่งกู้อย่างในโลกกาว่าในสวรรค์ กับหมู่เขาก็ต้องใจ้จีวิตอย่างบริสุทธิ์ต๋ามความต้องก๋านของพระเจ้าตวย