โรม
บทนำ
ต๋อนตั้งเก๊าของจดหมายฉบับนี้มีข้อความว่า เขียนโดยเปาโล เปาโลบ่ใจ้คนนึ่งในหมู่อัครทูตตี้ได้อยู่กับพระเยซูต๋อนตี้พระองค์ยังอยู่ในโลกนี้ แต่เปาโลได้หันพระเยซูในนิมิตต๋อนตี้ต้านก่ำลังเตียวตางไปเมืองดามัสกัส พระเจ้าได้ฮ้องต้าน เปื้อหื้อต้านไปบอกข่าวดีหื้อกับคนต่างจ้าด คนส่วนใหญ่ถือว่าเปาโลเขียนจดหมายฉบับนี้ขึ้นประมาณปี๋ ค.ศ. 57 ต๋อนตี้อยู่ในเมืองโครินธ์
เปาโลเขียนจดหมายฉบับนี้เถิงหมู่ผู้เจื้อในกรุงโรม บ่ฮู้แน่ชัดว่าใผเป๋นผู้ตั้งคริสตจักรขึ้นในกรุงโรม อาจจะเป๋นบางคนตี้มาจากกรุงโรมตี้ได้ฟังกำเตสนาของเปโตรในวันเพ็นเทคอสต์ตี้กรุงเยรูซาเล็มแล้วฮับเจื้อ ต๋อนตี้ปิ๊กไปกรุงโรม หมู่เขาก็บอกข่าวดีในกรุงนั้น กาว่าอาจจะเป๋นผู้เจื้อคนอื่นๆ ตี้เตียวตางมาตี้ได้บอกข่าวดีในกรุงโรม
ในจดหมายฉบับนี้แสดงหื้อหันว่าคริสตจักรตี้หั้นคงมีตึงผู้เจื้อจาวยิวกับคนต่างจ้าด เปาโลใค่อยากไปแอ่วหาผู้เจื้อในกรุงโรมตวย แต่เขาต้องไปส่งเงินตี้คริสตจักรคนต่างจ้าดต่างๆ มอบหื้อ เปื้อจ้วยผู้เจื้อตี้ตุ๊กตี้กรุงเยรูซาเล็มก่อน แล้วจะลวดไปกรุงโรมหละหว่างตางไปประเทศสเปน เปื้อบอกข่าวดีตี้หั้น ก็เลยเขียนจดหมายฉบับนี้ส่งไปบอกหื้อฮู้แผ่นก๋านตี้จะมาแอ่วหา กับอธิบายสั่งสอนหลายสิ่งหลายอย่างตี้เป๋นประโยชน์แก่ความเจื้อของหมู่เขา เจ้น คนจะได้เป๋นคนถูกต้องต๋ามธรรมโดยความเจื้อในพระเยซูเต้าอั้น บ่ใจ้โดยก๋านเยียะ บ่ว่าเป๋นจาวยิวกาว่าคนต่างจ้าด กับผู้เจื้อจะมีอิสระจากอำนาจของความบาปย้อนมีพระวิญญาณบริสุทธิ์อยู่ในใจ๋นำจีวิตหื้อเป๋นตี้เปิงใจ๋ของพระเจ้า เปาโลก็อธิบายเถิงเรื่องตี้พระเจ้าจะจัดก๋านกับจาวยิวจาใด ตี้หมู่เขาบ่ยอมเจื้อวางใจ๋ในพระเยซู แต่เป๋นคนตี้พระเจ้าเลือกไว้ตะก่อนเป๋นคนของพระองค์ ในต๋อนต๊ายของจดหมายนี้ เปาโลสอนเรื่องก๋านใจ๊จีวิตของคนถูกต้องต๋ามธรรม