ยอห์น
บทนำ
เถิงแม้ว่าหนังสือข่าวดีเล่มนี้บ่ได้บอกจื้อของผู้เขียนไว้ แต่คริสตจักรสมัยยุคแรกก็ยอมฮับว่า ผู้เขียนหนังสือข่าวดีเล่มนี้คือ ยอห์น ในหนังสือข่าวดีเล่มนี้มีก๋านอ้างเถิง “สาวกตี้พระเยซูฮัก” หลายเตื้อ ผู้เชี่ยวชาญส่วนใหญ่หันว่าหมายเถิง ยอห์น ยอห์นเป๋นลูกของเศเบดีกับเป๋นอ้ายของยากอบ ผู้เชี่ยวชาญส่วนใหญ่กึ๊ดว่าหนังสือข่าวดีเล่มนี้ได้เขียนหละหว่างปี๋ ค.ศ. 85-96 หนังสือข่าวดีเล่มนี้เป๋นเล่มสุดต๊ายตี้ได้เขียนไว้
คนถือกั๋นว่ายอห์นเขียนหนังสือข่าวดีเล่มนี้ขึ้นตี้เมืองเอเฟซัส ยอห์นบอกจุดประสงค์ของก๋านเขียนนี้ในบทตี้ 20:31 ไว้ว่า “แต่ตี้ได้เขียนสิ่งหมู่นี้ลงไปก็เปื้อหมู่ต้านจะเจื้อว่า พระเยซูเป๋นพระคริสต์ คือพระบุตรของพระเจ้า และถ้าใผวางใจ๋พระองค์ ก็จะมีจีวิตนิรันดร์” ต้านได้เขียนเถิงคนตี้อยู่นอกดินแดนปาเลสไตน์
หนังสือข่าวดีตี้ยอห์นได้เขียนนี้ต่างกั๋นจากหนังสือข่าวดีสามเล่มแรก โดยตี้ยอห์นบ่ได้เล่าเรื่องกำเผียบของพระเยซูเหมือนสามเล่มก่อนหน้านี้ แตนตี้จะเล่าเกี่ยวกับกำเผียบของพระเยซู ยอห์นได้เล่าเถิงหมายสำคัญเจ็ดอย่างตี้พระเยซูเยียะ กับได้บันทึกกำหลายกำตี้พระเยซูอู้เกี่ยวกับพระองค์เอง เจ้น “เฮาเป๋นความเป่งแจ้งของโลก” “เฮาเป๋นตางนั้น เป๋นความจริง กับเป๋นจีวิต” ในหนังสือข่าวดีเล่มนี้ยังได้บันทึกกำของพระเยซูตี้บ่มีในสามเล่มแรก หมายสำคัญตึงหมดตี้พระเยซูเยียะกับกำตี้พระองค์อู้เถิงพระองค์เองตี้ยอห์นได้เขียนบอกไว้นั้นก็แสดงหื้อหันว่า พระเยซูเป๋นพระบุตรของพระเจ้าแต๊ๆ