26 [Elisabet du súp tene, banu 6 yam dekekúm.] Yesus túú nende nembwo, n'sam ho: ndie ku, Wuo yano siende dawo hlu, Gabriel, Wai Ilam ne lwoulemangkam, wabú kiinglemangkam, “Pulangale! Nasaret yano Galilea map ne. 27 Pulengeli! Du kanggúe tenang meni múe ne. Nombe sú, Maria. Ndie du kanggúe, hlu banyang ho kyang. Nombe sú, Yusuf, ilam Daud de tang yap. Ngambe nembwo noms'to.”

28 Dawo hlu, Maria múe ne puolentim lwoulentim: “Wali! Ko ki ngali, Temien Ya ne kawai de, Nombe kietetii kom ho denggentim. No kom ho mai tekú.” 29 Maria, ndie nembwo tatum de, napdebú plitetúm. Debú mai ne nggleng dúng ho deketúm, “Ndie kie kwansentim de, nembwo skie nekeno lwoulensendim?” 30 Dawo hlu ne nembwo tang ne untim, “Maria, ko kwo metep, Wai Ilam de debú kom ho denggentim. 31 Ko du kado nawong dale, du habum túelade, yamho nombe sú 'Yesus' tebielade. 32 No temien kado. Nom ho trangilemandam de, Wai Ilam Blong Tenang de demanse. Wai Ilam Ya ne, demamde ilam Daud de muokang, Nom ho pliptemandam. 33 Nome ilam delim, Yakub de du demamdo yap blong ne, misyo kelúm, kenedúm. Nome kie luutendim de, ku yam lelii kamang, misyo kabe natum.”

34 Maria ne paiho, dawo hlu ho úmentúm, “Ngo hlu maning kwo teku, ndie mako kansam ho lemedalum?” 35 Dawo hlu tang ne Maria ho untim, “Kesep Kwalop kom blong ne peto li ho, Wai Ilam Ya de dong kom ho tienggendim, ko ndie nawong mai deli. Ndiende, du ndie, Nom ho trangilemandam de, du kwalop, Wai Ilam de demanse. 36 Ko nggleng dúng! Elisabet belemesking mengko ndie sam tabe to, insylú ne hnum de no duibú ho denggetúm, kibedi mai ne, dasu de du súp tene denúem. Du habum planom, banu 6 yam ho lemedanom. 37 Ndie no kabe, Wai Ilam de siende, nekeno kwo leme de, skietendú mako misyo kado lemedekentúm.

38 Maria ne paiho útúm: “Ngame Wai Ilam de nembwo ho kamo keingtalu. Ngam mai ne misyo lemedalum, kome lwou de sam ho!” Ndiene, ndie dawo hlu Maria múe siende tang ne betim.