17
Umalaaya umupiti ni shihanu ishishemamu
1 Pe wooka mu vhaala avhahavhizya saba, vhe vháali ni mbiga saba ahambuuzya ahati, “Nzaaga, niine kwe nkulanje isunde lye alipeelwa umalaaya umupiti we nkaaya ye vhayizenzile pa luvhazu pa minzi aminji. 2 Avhamwene avha nsi zyonti vhavhembusile nawo na vhe vhakutendama pa nsi vhahoziilwe idivaayi inkali ye vhuvhembu vhwakwe.”
3 UMupepo uMufinjile ahaniishila, pe uhavhizya ahanyatula nu kuntwala kwi laala. Ukwo nkamulola umwantanda alimbiiye pa shihanu ishishemamu. Ishihanu isho shásimviilwe mwonti amazina aga musaamu, sháamile na matwe saba ni mpembe kumi. 4 Umwantanda uyo ázwaye amenda ge gali ni langi iya zambalaawu ni nchemamu. Áyiyemviizye ni sahaabu na mavhwe aga nsavho ni luulu.a Ku nyoovhe yaakwe álemile ishikombe isha sahaabu she shízuuye izya kuviisya ni zya vhuhandamanu zye zikulolesya uvhumalaaya vhwakwe. 5 Ásimviilwe pa sheeni shaakwe izina ilya vhuzigizigi ilya kuuti,
“UBABELI UMUPITI,
UMAAYI UWA VHAMALAAYA
NU WA MBOMBO ZYE ZIKUVIISYA IZYA MU NSI.”
6 Nkalola umwantanda uyo ahoziilwe amavhanda aga vhafinjile avha Mulungu na mavhanda aga vhantu vhe vhahamusimishizyaga uYeesu.
Lwe namulola násukumiiye nkaani. 7 Ileelo uhavhizya ahambuuzya ahati, “Utasukumilaje! Ine kwe nkuvhuuzye izya vhuzigizigi uvhwa mwantanda uyo ni shihanu isho she shimuvhusiizye she shili na matwe saba ni mpembe kumi. 8 Ishihanu isho she washilola sháali shipuuma ileelo isaala izi shifuuye. Kwe shifume kwi livha ilya ku vhuzimu, ileelo uMulungu kwe ashilovwe. Vhe vhakutendama pa nsi vhalisukumila. Mwe muumwo, avhantu vhonti vhe amazina gaavho gatásimviilwe mwi kalaata ilya vhulanzib kufuma pe ulwalo ulwa nsi lwávhisiilwe, vhalisukumila. Vhalisukumila lwe vhashilola ishihanu isho she ku vhwandilo sháali shipuuma, havhili shihafwa ni saala izi shazyuha!
9 “Ishi vhukwanzilwa uvhushindamu uvhwa njeele! Amatwe igo saba, magamba saba ge umwantanda uyo akugatendamila. Amatwe igo havhili vhe vhamwene saba. 10 Mu vhamwene ivho saba, vhasaano vhafuuye, wooka akujendeelela kukonzya nu wamwavho ula ashiili kutaliha. Lwe ataliha alikonzya ku havhaliilizyo hansi. 11 Ishihanu ishishemamu isho she sháali shipuuma ileelo isaala izi shifuuye wu mwene uwa naane, woope we wooka mu vhaala saba, havhili woope uMulungu alimulovwa. 12 Impembe ziila kumi zye uzivhwenyi, vhe vhamwene vhe vhashiili kutaliha kukonzya. Ileelo vhalipeelwa amaha aga kukonzya ku havhaliilizyo aha isaala lyoka pooka ni shihanu shiila. 13 Insiivho izya vhamwene ivho kumi zye zyoka, vhaliishipa ishihanu shiila amaha nu vhuvhwezyo vhwavho vhwonti. 14 Vhaliilwa uvhulugu na Hagonzi aha Mwene, ileelo aHagonzi aha Mwene halivhapoota mwe pe aheene he Hapiti aha vhapiti havhili he Hamwene aha vhamwene. Aheene haliivha na vhantu vhaakwe vhe hahavhiita nu kuvhasaavhula nu kuvhavhiiha kuvha vhalandati vhaakwe avhatungamu.”
15 Uhavhizya ahambuuzya havhili ahati, “Aminzi gaala ge ugavhwenyi paala pe umalaaya umupiti atendiime, mpuga izya vhantu vhonti ni nsi zyonti ni njango zyonti. 16 Impembe ziila kumi zye uzivhwenyi ni shihanu shiila vilimwilwa umalaaya uyo. Vhalinyatula ivintu vwonti vwe ali navwo nu kumuleha ishitali, vhaliimulya inyama yaakwe nu kumupemba mu mwoto. 17 Mwe pe uMulungu avhapiiye insiivho zyoka mu mooyo gaavho, kuuti vhavhombe zye akwanza kwi dala ilya kwitinkana pooka kushipa ishihanu shiila amaha gaavho aga kukonzya. Vhavhombe isho kufishila lwe ziila zye áyanzile uMulungu zyalunjiha. 18 Umwantanda ula we umuvhwenyi, ye nkaaya yiila impiti ye yili na maha ku vhamwene avha nsi zyonti.”