Resumen del AT 92

Jonás kuesiwi, iwá̱n Dios kino̱no̱tza

Jonás 4

Eꞌ kua̱ꞌ Jonás kitaꞌ iga ayá̱ꞌ poliwikej yej icha̱mej Nínive, poxsan kuejkuesiwiꞌ 2 iwá̱n kijlij Jehová:

—Nikmatiaya iga ijkí̱n tikchi̱waya kua̱ꞌ nonoya ipan noa̱ltepe̱ꞌ, inó̱n iga niajki Tarsis iga nicholoj; nikmatiá no̱ iga tej pox tita‑ikne̱liá iwá̱n pox tite‑ijikni̱n, ayá̱ꞌ imaní̱n tikuesiwi, iwá̱n atikneki agaj xikikno̱chi̱wa, ma̱jwaꞌ tike̱lka̱wiliá yej se̱ kichi̱wa yej aye̱kti. 3 Inó̱n iga iná̱n nimitztajtaniliá iga xine̱míktiya, anka má̱j ye̱kti manimikto que manisato.

4 Eꞌ Jehová kijtoj:

—¿Ix ompay a̱n iga pox tikuejkuesitoꞌ?

5 Iwá̱n Jonás ki̱saꞌ ipan a̱ltepe̱ꞌ Nínive iwá̱n ojkuiꞌ ka̱mpa ki̱sa to̱nati̱ꞌ iga mose̱wi̱to. Iwá̱n ompa kichij se̱ kuatapech iwá̱n mota̱lij itampa pan itasejka̱nyo iga makita te̱ kichi̱was Jehová iga inó̱n a̱ltepe̱ꞌ Nínive. 6 Iwá̱n Jehová Dios kixwaltij se̱ ayojmekaꞌ iwá̱n moko̱komo̱n iyi̱xko ikuatapech Jonás iga itasejka̱nyo makikua̱tzakua Jonás iga mamoyo̱lta̱li. Jonás poxsan pa̱guiꞌ iga inó̱n ayojmekaꞌ. 7 Eꞌ kua̱ꞌ tane̱siꞌ ipan seꞌya día, Dios kichij iga se̱ okuilin makitzi̱nteki ayojmekaꞌ, iwá̱n inó̱n ayojmekaꞌ wa̱guiꞌ. 8 Iwá̱n kua̱ꞌ ki̱saꞌ to̱nati̱ꞌ, Dios kiti̱tan to̱nalejekaꞌ yej pox tajpalej iwá̱n pox toto̱niꞌ, yej wa̱laj ka̱n kí̱sapa to̱nati̱ꞌ. Iwá̱n to̱nati̱ꞌ poxsan kikua̱tatia̱ya Jonás, iwá̱n este ta̱tapoliwiaya, iwá̱n kinekiaya mamiki, kijtowa̱ya:

—Iga nej má̱j ye̱kti katka manimiki que manisato.

9 Iwá̱n Dios kijlij Jonás:

—¿Ix pox tikuesiwi iga wa̱guiꞌ ayojmekaꞌ?

Iwá̱n Jonás kijtoj:

—Kena, poxsan nikuesiwi, este nikneki manimíkiya.

10 Iwá̱n Jehová kijtoj:

—Poxsan tikikne̱liá ayojmekaꞌ yej ayá̱ꞌ tikto̱gaꞌ, niga tikweyaltij, yej se̱ yówal ixwaꞌ, iwá̱n seꞌ yówal miguiꞌ. 11 In nej, ¿ix ayá̱ꞌ nikikne̱li̱j ine̱pa weyi‑a̱ltepe̱ꞌ Nínive ka̱n onoꞌ má̱j de 120 mil tajta̱gaꞌ yej akimatij te̱ kichi̱waj iga mamoma̱nawi̱ka̱n, iwá̱n onoꞌ komati yo̱lka̱mej?