Acán kichi̱wa yej aye̱kti
Josué 7
60
Israeli̱tajmej kichijkej yej aye̱kti iyi̱xtaj Dios iga se̱ de yejemej yej ito̱ka̱ꞌ Acán, kichteꞌ yej Dios kijtoj iga aye̱kti iga agaj makikui yej ompa onoꞌ Jericó, iwá̱n Dios poxsan kikuesowilij israeli̱tajmej itechko Acán.Iwá̱n ayá̱ꞌ wejkatiꞌ, Josué kiti̱tan sekin tapi̱pianimej iga makitaka̱n ken iga onoꞌ se̱ a̱ltepe̱ꞌ yej ito̱ka̱ꞌ Hai. Inó̱n a̱ltepe̱ꞌ onoya iyi̱xko se̱ tepe̱ꞌ. Kua̱ꞌ mokuepkej, kijlijkej Josué:
—Ayá̱ꞌ kineki mayawi inochi solda̱dojmej. Wel mayáwisan dos o tres mil tajta̱gaꞌ iwá̱n tikta̱nili̱skej Hai, iga inó̱n a̱ltepe̱ꞌ ali̱mpatzi̱n iwá̱n ayá̱ꞌ miakejmej yej kima̱nawiáj.
Iwá̱n Josué kiti̱tan tres mil tajta̱gaꞌ, eꞌ nochi cholojkej iga kimajmawilijkej yej cha̱ntitokej Hai. Iwá̱n kimiktijkej sekin israeli̱tajmej iwá̱n tajko kitalo̱chtijkej este ipan seꞌ a̱ltepe̱ꞌ. Inó̱n iga israeli̱tajmej mosemakákeja iwá̱n majmawikej.
Pox mokno̱matikej iga kipolojkej, Josué iwá̱n tajwe̱wetkej de Israel este kitza̱tzaya̱nkej itzotzolmej iwá̱n motankua̱ketzkej iwá̱n motzonto̱kkej este ipan ta̱jli iyi̱xtaj iya̱rcaj Dios iwá̱n ijkó̱n kichijtoyaj este tio̱taꞌ. Iwá̱n mokuajkua̱ta̱lpino̱lwijkej iga mane̱sika̱n iga poxsan mokno̱matij. Iwá̱n Josué kijlij Dios:
—¡NoTe̱ko!, ¿te iga anne̱pale̱wijkej iga manipano̱ka̱n ipan we̱ya̱ꞌ Jordán? ¿Ix iga san mane̱ta̱nili̱ka̱n noenemi̱gojmej iwá̱n mane̱mikti̱ka̱n? ¡Ye̱kti katka manika̱wika̱n a̱sentápal! ¡NoTe̱ko!, ¿té̱ wel nikijto̱j iná̱n iga nokni̱wa̱n cholojkej iyi̱xtaj iyenemi̱gojmej? Iná̱n inochi yej onokej Canaán kimatiskej iwá̱n yawij ne̱yawalo̱tij iwá̱n ne̱mikti̱skej nonochi̱n. Iwá̱n ijkó̱n yáwija kali̱mpamatitij moto̱ka̱ꞌ.
Iwá̱n Dios kijtoj:
—Ximoketza, ¿te iga titankuaejkatoꞌ iwá̱n titzonto̱ktoꞌ este ipan ta̱jli? La gente kichijkej yej aye̱kti iwá̱n ayá̱ꞌ kichijkej kensan nimitzijlij makichi̱waka̱n, iga kikuikej iwá̱n ke̱nkej yej nikijtoj iga aye̱kti makikuika̱n; tachtekkej iwá̱n takajkayajkej. Inó̱n iga israeli̱tajmej cholojkej iga tatalo̱chtijkej iyenemi̱gojmej, iwá̱n no̱ yawij mikitij siga ayá̱ꞌ kikno̱chi̱waj yej kichij yej aye̱kti. Iná̱n, ximoketza iwá̱n xikijli la gente iga makimatitoka̱n iga mo̱sta mawi̱tzeka̱n note̱noj. Kichijkej yej aye̱kti, iwá̱n nimitzijliáj, iga itechko yej kichij yej aye̱kti awel ankita̱nili̱skej amoenemi̱gojmej este que xikmikti̱ka̱n inó̱n yej kichij yej aye̱kti. Xiwi̱tzeka̱n mo̱sta, xichapa̱ntiwi̱tzeka̱n por tribu, iwá̱n nia nimitzne̱xtili̱tij a̱ꞌyéj in yej kichij yej aye̱kti, iwá̱n yawi tatati seka̱n iwá̱n inewi yej itatki iga ayá̱ꞌ kichij ken nikijtoj.
Ipan seꞌya día, isájpasan, Josué kino̱tzaꞌ inochi gente, tribu por tribu, iwá̱n Dios kine̱xtilij pan katiapa tribu onoya yej kichij yej aye̱kti. Iwá̱n Josué kijlij itri̱buj Judá iga maká̱wi‑oꞌ, iwá̱n sekin tribu kijlij iga mayá̱ka̱nya, iwá̱n inó̱n tribu yej ka̱wiꞌ yajkij ite̱noj Josué. Iwá̱n Josué kino̱tzaꞌ ipilowa̱n se̱ ta̱gaꞌ yej ito̱ka̱ꞌ Zera, iwá̱n ini̱mej kina̱ꞌtechojkej Josué. Iwá̱n Josué kino̱tzaꞌ Zabdi, te̱tajwe̱wej de se̱ familia. Iwá̱n Zabdi yajki ite̱noj Josué iwá̱n inochi ipilowa̱n iwá̱n inie̱tojwa̱n, iwá̱n ipan yejeme̱n, Josué kitapejpen se̱ yej ito̱ka̱ꞌ Acán yej inié̱tojpa Zabdi.
Iwá̱n Josué kijlij Acán:
—Nopiltzi̱n, xine‑ijli yej tikchij; amo xine‑i̱ya̱nili nisé̱ tájto̱l.
Iwá̱n Acán kijtoj:
—Kena, nimote̱nxitoma iyi̱xtaj Dios iga nikchij yej aye̱kti. Iní̱n yej nikchij: Nikitaꞌ iga pan nochi yej nikui̱lijkej noenemi̱gojmej onoya se̱ tzótzol yej poxsan patiyoj iwá̱n nikichteꞌ, iwá̱n doscientos tomi̱n yej de plata iwá̱n tájkol oro yej kipiá iyeti̱ka má̱j de medio kilo, iwá̱n nochi nikmo̱nsajitaꞌ iwá̱n nikuiꞌ, iwá̱n nikto̱gaꞌ kalijtiꞌ ipan nokuetaxkajli.
Iwá̱n Josué kiti̱tan sekin tajta̱gaꞌ, yejeme̱n motalojtiajkij cha̱n Acán iwá̱n kiwiwitakej tzótzol, plata iwá̱n oro. Iwá̱n kimakatoj Josué iyi̱xtaj inochi gente, iwá̱n Josué kiwi̱gaꞌ ipan kuetaxtio̱pan iyi̱xtaj Dios.
Iwá̱n Josué iwá̱n inochi gente kiki̱tzkijkej Acán. No̱ kiwi̱gakej yej kichtekka: plata, oro iwá̱n tzótzol, eꞌ no̱ kiwi̱gakej isiwa̱ꞌ iwá̱n ipilowa̱n iga kiye̱ꞌitakej yej kichij Acán, iwá̱n no̱ kiwi̱guilijkej ito̱rojmej, ibu̱rrojmej, iborre̱gojmej, eꞌ no̱ kiwi̱guilijkej ikuetaxkajli iwá̱n inochi yej kipiaya, kiwi̱gakej ipan se̱ planada iwá̱n ompa Josué ijkí̱n kijlij:
—Iga motechko, Dios ayꞌya ne̱ye̱ꞌitaj, iná̱n Dios tej yawi mitzpolo̱ti.
Iwá̱n nochi israeli̱tajmej kitemiktijkej Acán, iwá̱n inochi yej kipiaya kitatijkej iwá̱n kinechkojkej komati teꞌti iyi̱xko yejeme̱n. Ijkó̱n Dios ayꞌya kikuesowilij israeli̱tajmej.