13
Akumhna Ravguangc ta Tipian Nina Cho?
1 Chana punav ta nzianmei mpat rio. 2 Gin ga laalou khang ntaemv rio. Thowkumhmei thu thay mak liangna kauh baanchara nunc ta laaloumei ni nai kan the. 3 Kangkai khou bammei nunc khang, nangniw ni kaniw lev kangkai khou bam nchamc kumna ninglouna ningtowlou o. Ryanra bammei nunc khang, nangniw ni kaniw lev ryanra nchamc bam kumcna ningtowlou o.
4 Nowsuanhmei ta meic guayna nthukmei swna laa nina e, khatni nowpuc laeng sw-mphuam lak nina e. Kalam thu lungcmaanvmei ta Ravguangc rui latzan sw puni. 5 Nang panty syan agaemvna lungc lak nina e; nang khou naimei khou tei pianna lungc nina e. Kalam thu, "Ai nang ta mpatlou lak e, ai nang ta ganc nrulou lak e," twna Ravguangc rui sa e. 6 Mi zaeng rui,
"Poubauhmei hei ata nkhavloumeipu e,
ai ping lak e.
Maansei rui ata tabui sw ngam nina cho?"
twna aniu sa ngam e.
7 Nangniw khou Ravguangc lat dincloumei, tat kanmei nangniw ta zayloumei nunc ta tei ningtow o. Kaniw panty kheiliak tei kakhanh o khatni kaniw ramlum tei lay nzeic o. 8 Jisu Khrista hei douclaneic, aseic khatni tingsaengzaeng nchamc e. 9 Kadat dikh dikmei latdyn rui nangniw ta zay mbiangh mak khang sw o. Ravguangc zauzian rui nangniw lungkuat titanc o. Mi tei taektw rui titaanc khang hamh e; taektw thianghmei tei rui thu gaeng tuang maek e.
10 Aniu tuang ravchapaeng khou khaengloumei ravcha hei Jihudimei pheykai khou thouhsw bammei nunc khang tei thu kaniw dam maek e. 11 Kalam thu, Tingkuh nunc rui paapc khang khaenglou khang kazei Nthan Liangmei Bamv khou phungc gutmei khouringh nunc pumc tei thu zypui kailuangc paengc thangc mai ntei e. 12 Mi tei kumcna, Jisu ni, kazei paan rui meicnunc ta sw nthanlou khang raengh paengc thangc theiclou the. 13 Kum thena aniu ni zypui kailuangc paengc thangc kadaeng khou patna kamei lev zak khaengv nchamc di kho. 14 Aniu khang kandih khou tingsaengzaeng kaidai maek he; guang nimei kaidai kiu laa khang nzwan bam tuang di he. 15 Kum thena, aniu Jisu paan rui Ravguangc ta thuanhmei hei aniu ramkhaeng swna kat tanh tan bam di kho—aniu mwang rui kazanc sa ndauhna thuanc bam di kho. 16 Gaytaanv taanh khang khatni nang khou naimei piu nzanh khang amuc rio. Mi hei Ravguangc khang pianmei khaengpui puatkat kiu the.
17 Nangniw ta zayloumei nunc lat tei piu o. Kaniw bangc khou bam o. Kaniw tuang taanv chakh tei kaniw Ravguangc khou tii ni lapui zaeng rui, kaniw nangniw bumaengc ta kadanna zauc bam tuang e. Kaniw neihlana taanc bam khang lat piu o. Kaniw chwnsw ryanrana taanc e thei mi tei nangniw khang gaeng mak e.
18 Aniw khang ni huayneylou bam o. Aniw lungning nthanna sa tuang e. Kalam katana khou aniw chingkhiuhmei kheiliak khou lungc nii e. 19 Ai nangniw daeng khou guang dat zaih khang huayney ranvlou khang nangniw ta katiu e.
Suaic samcloumei
20 Daihmei lauziu gaenghmei kapy, aniu Poubauhmei Jisu ta, tingsaengzaeng latryan khang kazei keyloumei khou rui tiringcthauloumeipu chuzaenghmei Racguangc rui, 21 aniu kamei ningmei taanc ngam khang kage naimei guay nangniw khou tiilou pw di tho, khatni kamei rui ningmei tei Jisu Khrista paan rui nangniw khou taanclou di tho. Khrista hei tingsaengzaeng hymdaic bam kan di tho. Amen
Nkhamhmei Lat
22 Kumna chana punav thiu, ai rui nangniw khou huaychamei hei khaengvna nkinglou o. Kalam thu ai rui mi hei nangniw khou samna hy tuang de. 23 Aniu chana Timothi ta kangkai khou rui mpatlou dat kan the twmei nangniw khou tithaylou nii e. Kamei guang zaic pw e thei, ai nangniw ta ariw khang guang pwkhou kata nduangh guang puni.
24 Nangniw tuang kapy swmei kapwmna khang khatni nthanmei kapwmna khang dwangay kady e. Itali thangcmei chana punav guay rui nangniw khang dwangay kady e.
25 Nangniw kapwmna khou Ravguangc zauzian nai diu diu.