12
Aniu Pu Ravguangc
1 Kumna heizumei sakhi pang muangh kumcna aniu daeng bam haengv bam khou hei, aniu ta sw khamv sw namv nimei guay khatni aniu khou khuap ntipna bammei paap guay ganc pat lana, aniu pak nimei lauluangc hei pak tangh khang lungkuat tancna pak di kho. 2 Kahu khou naimei neihlamei ta tei zaucna, zakmei ta ping makna theihchouc khou ryanra khaengvlouna, Ravguangc guangcbamvpaeng tuang baanzat thangc dungc key kanmeipu, kabangbi khou rui katwan ngamv aniu lwmmei ngangvloupui bamv Jisu ta zaucna pak di kho. 3 Nangniw lungc nnau keyna mpat mak khang, paapcmei nunc rui hei di zauczihna sw kanmei ta kamei khaengv kanmei tei kakhanh o. 4 Nangniw thu paapc ric adow khou theihmei nganv khaengv kanmei tuang thu maek he. 5 Ravguangc rui nangniw ta kanac nunc ta kumcna katiuloumei lat saloumei tei nangniw amuc dat the nah cho? Mi hei sa e:
"Anac mpouh le, Poubauhmei rui
nang ta riapmei ta ramhsak mak tuang sw rio,
khatni nang ta luh pwkhou lungh tangkhyn rio.
6 Kalam thu Poubauhmei rui kamei nzianmei nunc ta riaplou e,
khatni kanac swna laaloumei nunc ta bai luhlou e."
7 Nangniw ryanramei ariwmei tei bai luhlou tuang e twna khaengv o. Mi tei Ravguangc rui nangniw ta kanac nunc swna sw bam tuang e. Kapu rui bai luhlou makmei nac thow naina cho? 8 Nah guay ta thu bai luhlou tuang de. Tiki nangniw bai luhloumei khou kazauh mak e thei, nangniw kapu maekmei nkhahnanac nunc tina the. 9 Kandih lwnlung khou sini, aniu pu nunc rui aniu ta bai luhlou e, kumna aniu kaniw ta chakhwang sw e. Kum e thei bumaengh tuang pw ta thu aniu mi tei suangc mbuna kakut gutna ringc nina hamh nah cho? 10 Aniu pu rui gay khang e twna aniw ta matak khat bai luhlou e; tiki Ravguangc rui thu kamei nthanmei kumcna nthan khang aniu khang gay khang bai luhlou e. 11 Baih luhloumei khou tei matak khat thu neihla mak khe, suc the; tiki laaloumei nunc khang thu mi thay tei ravchaptatmei khatni chuzaenghmei e.
Kakhimloumei
12 Mi zaeng rui, zay zuat bammei baanc tei zay thau tho, khatni kadunh bammei khubut tei titancthau tho. 13 Suanmei phay tei titheih makna tigaylou khang, ntyngmei chaeng khou tat gut tho.
14 Meic guayna chuzaenghna lungc bam khang khatni nthanmei panty khou lungh khang karamc o. Kalam thu mi kumcna lungh mak e thei, gaanv khat na sini Poubauhmei ta how ngam mak e. 15 Ravguangc zauzian laatow mak pu ramc e twna kadan thay o. Nangniw khou nkhucmei maan zangc patna meicnunc ta sw katuakc mak khang khatni sw-mphuam mak khang kadan thay o. 16 Nangniw lungcmaanvna khatni ravchaptat makna, Esau rui napkuak akhat na khang katuang nareimei dam zuanctu kanmei tei kumh mak khang ramhthay o. 17 Nangniw thay e, katangv thangc kamei kapu suaihiam laa nii dat bam sini kata ganc pat kan the. Kamei mikdui keyna phu bam sini lunghlaic dat nuhpui chaeng nai kan mak khe.
18 Ntaw nangniw guangmei hei maibwang chuangc bammei, zingh zingmei, pwanzingh kanut bammei kahitowmei Sinai Chyng khou tei hamh e. 19 Mi khou tei tiangka khwan khatni kauc patmei khwan tei chu pwkhou kaniw khou lat salou dat mak khang zaenghuay khwan e. 20 "Mi chyng but tei kahimei khouringh ta nganv ntauh kwamluai nina e," twna samei latdanv tei kaniw khaengv ngam mak khwan e. 21 Mi tei heidikamv meic pingmei lwn khwan e, twmei thu Mousi nganv "Ai pingna kadunh the," twna sa e.
22 Tiki nangniw guangmei hei thu ringhmei Racguangc kaidai, tingkauh Jerusalem, kasing kadyng thay makmei kauh baanchara guay bampui bamv Zion Chyng khou e; 23 kaniw zanc tingkauh khou hyloumei Ravguangc nac nareimei nunc neihlana kaduai bampui phwam khou guang tuang e. Meic katana ta latzan sw nimei Racguangc khou, khatni ti-nthuihlou mei ravchaptatmei guay bumaengc khou guang tuang e. 24 Abel zei suangc sini mbuna daic ranvmei lat samei zei rui kazinhlouna latryan thanh tuang chaguatpouc Jisu khou guang tuang e.
25 Mi zaeng rui nangniw khou sa bammeipu lat tei nuh zih laa rio. Kandih khou samei lat tei sini liammei guay ta tei nsa mpatlou mak e thei, tingkauh thangc rui samei lat tei thu liamna akumhna duak ngam nina cho? 26 Mi ganv khou tei kakhwan rui kandih ta kanuk kan the; tiki "Kandih ta na hamhna tingkauh ta ni kanuk dat puni," twna salou e. 27 Kamei rui mi hei samei hei rui kalung makmei puat guay tei nai bam duh khang, damcloumei puat guay hei kanuk ganc puni twmei tuang e.