Timothi
KHOU Paul RUI HYMEI KANEIMEI TATDYN
1
Chaengriw Lat
1 Ravguangc rui ningmei thei layna Khrista Jisu tuang Latdiutatmei swmei, Khrista Jisu khou naimei aniu khang nrianhloumei ringhmei tei dinc ndauh khang ndiuloumei Paul rui—
2 Nzianmei anac Timothi khang hymei:
Pu Ravguangc khatni aniu Poubauhmei Khrista Jisu rui zauzian, nzianloumei khatni chuzaenghmei nang khou tiilou diu!
Thuanckumei khatni Katiuloumei
3 Ai zingbangc kalaanv huayneypui ganv kathuic nang khang ningtowna, alungning khou lwmsi tuang maekna apu apouc nunc kumcna ai kasiamruai sw bammeipu Ravguangc ta ai thuancku bam e. 4 Nang mikdui tei ai ningtowna, nang ta how dat pwkhou neihla dat punimei khang tei rui ai nang ta how dat niina bam e. 5 Nang peic Lois khou khatni nang pui Euniki khou naimei kalingmei lwmmei nang khou naimei tei ai ningtow e. Mi tei nang khou nai e twmei ai lwm e. 6 Mi zaeng rui, abaanc sungclou khou tei nang khou tiilou kanmei Ravguangc kaipat tei tichuangc bam khang ai nang ta tiningtowpui tuang e. 7 Kalam thu Ravguangc rui aniu khou tiiloumei Bumaengc hei zammei Bumaengc hamh e; pumtan, nzianmei khatni meic pumc ta sinriapmei Bumaengc de.
8 Mi zaeng rui, aniu Poubauhmei lam khou sa khang zak rio; Khrista khang kang bammei alam khou zak rio. Mi phaan tei Gaychamv khang phungc nimei nang tuang ryanramei dam tei Ravguangc pumtan paan rui phungc o. 9 Kamei rui aniu ta, aniu taanv paan rui hamhna, kamei rui ningmei thei layna kazauzian paan rui gulou the khatni katuang mei khang kawlou the. Mi zauzian hei kaganv nai thau mak khou rui Khrista Jisu khou kamei rui aniu khang tiilou the. 10 Tiki aniu ta guloumeipu Khrista Jisu guang khou rui mi zauzian hei aniu khou ndauhlou the. Kamei rui theihmei ta swmaanlou the, kumna gaychamv paan rui theic dat makmei panty tiilou the. 11 Mi gaychamv dinh khang ata tadin khatni latdiutatmei khang kapahlou the. 12 Mi zaeng rui ai mi kumna ryanra khaengv bam tuang e. Ai lungh geic dat mak khe, kalam thu ai lwm bammeipu ta ai thay e. Kamei rui akhou nsinloumeia hei kapumtan rui mi Tingmik tei nganv gaeklou puni twmei ai thay e. 13 Nang ta zaylou khang ai rui nang khou dinclou kanmei nchumhmei lat tei ntipna sin o. Khrista Jisu khou bammei aniu khang tiiloumei lwmmei khatni nzianmei khou tei bam o. 14 Nang khou nsinlou kanmei lanv tei, aniu khou bammei Bumaengh Nthanmei paan rui gaek chuyna sin bam o.
15 Asia khou bammei guay, Phugelos lev Hermogenes kazauhna ata mpatlou the twmei nang thay e. 16 Onesiphoras kai kaikhunc khou Poubauhmei rui nzianlou diu. Kalam thu kamei rui katup sihna achaengc tiringclou e; ata kang bangclou bammei khou hei kamei zak mak e. 17 Kamei Rom khou guang rappuilev ata phuna adaeng khou guang e. 18 Poubauhmei rui mi Tingmik nungc kiu kata nzianlou pu di tho! Ephesia khou kamei rui akhang taanclou kanmei guay tei nang thay ranvna bammei tei the.