2
Riakdanv Twan Liammeipu
1 Aniu Poubauhmei Jisu Khrista guang nimei lam khou khatni aniu kadaeng khou guang nimei lam khou, chana thiu, nangniw ramhthay khang aniw sa tuang e: 2 nangniw mi lam khou hei ning kaguakc bam nuangh rio. Ravmundinhmei rui pwni, chamvdinhmei rui pwni, aniw tuang tatdyn kumcna hy guangmei rui pwni, Poubauhmei tuang Tingmik guang tangc the twna sa pw sini nangniw lungc katuakc rio. 3 Thow thow rui pwni nangniw ta guatmei tei nangniw lwm rio. Kanuaymei Ravliammei guang rey puni khatni maanmei khou keylou nimei Simeipu kiu guang puni. Mi tangv rui mi Tingmik kiu guang khang de. 4 Kamei rav twmei guay ta khatni meicnunc rui kalum bammei tuang guay ta nuh mak puni, kumna kamei hei daic liangmei e twna sa puni. Kamei Ravguangc tuang Ravkai khou nganv gut dungc lana karana kata Ravguangc e twna sa puni.
5 Mi guay hei ai nangniw lev bam nchamc bam khou nangniw khou salou kanmei tei nangniw ningtow mak nah cho? 6 Ntaw mi pu kiu guang nimei ta thingc bammei akhat nai e. Mi tei tabui cho nangniw thay e. Kaganv tangc pwkhou, mi Simeipu kiu guang puni. 7 Meic thay tangh makmei Simeipu kiu ntaw ni taanv taanc bam e; tiki kachaeng thingc bammeipu tei rui chaeng reilou tii mak saanv kamei guang ni tu hamh e. 8 Kachaeng laanclou pwkhou, Simeipu kiu guang puni. Tiki Poubauhmei Jisu guang pwkhou kamwang khou rui mphiu patmei thiu rui kata swluai puni khatni katuang karangmei riw rui kata swmaan puni. 9 Simeipu kiu Seitan tuang pumtan phungcna guangna, guatmei tuang sw nchinmei taanv khatni charynmei taanv zaat guayna taanclou puni. 10 Kumna maan kan nimei nunc ta tei karoucsina guat puni. Kaniw maan nimei thu nchumhmei ta kahawna laalouna guloumei laa mak khou rui e. 11 Mi zaeng rui, nchumh makmei ta kaniw lwm khang kaniw khou taanv sw khang Ravguangc rui nchumh makmei tuang pumtan kaniw khou tii guang the. 12 Mi thay kiu thu nchumhmei ta lwm makna, paapc ta kahaw bammei nunc ruc khou latzan keylou puni.
Ding Ntip o
13 Ravguangc rui nzianmei chana thiu, aniw nangniw khang Ravguangc ta thuancku tanh tan bam rap khang nai e. Kalam thu Bumaengh rui sw nthanloumei paan rui khatni nchumhmei khou lwmmei paan rui guloumei laa khang Ravguangc rui nangniw ta thaurey khou rui kapahlou the. a 14 Aniw rui nangniw khou dincloumei gaychamv paan rui Ravguangc rui nangniw ta aniu Poubauhmei Jisu Khrista tuang hymdaihmei lay laa khang kawlou the. 15 Mi zaeng rui, chana thiu, ding ntip o khatni aniw mwang rui khatni tatdyn rui nangniw khou dinclou kanmei guay tei sin ntip bam o.