Hura Yohanes Karongkanina
Tabe
1
1 Lako hi aku Penatua. Hura ei laipakatuku hi to Tina to laipelihi Alatala hante ana-anana to mpuu-mpuu laipotoweku. Moma wuwu aku to nampotowe komi, naupawee humawee tauna to nangincani Alatala to nakono mui nampotowe komi. 2 Apa Alatala to nakono ee nohangu rara moto oa-'I hante kita pade laipodohe-Na moto oata duu kahae-haena. 3 Mohambaya'a bona kabohe towe, ahi rara pade katuwu to nanone lako Alatala Tuama pade lako Yesus Kristus, Ana Tuama, mampodoheta rara kakonoa pade towe.Matigu i rara patudu Kristus
4 Nagoe mpuu'a nangepe ane hantongora anamu natuwu nantuku patudu to nakono ewa to laiparentaka-Nata Alatala Tuama. 5 Etumo, kuperapi mpuu hi iko to Tina, bona humaweeta momepotowe. Ei moma parenta bou. Parenta ei laiwaika amitamo lako pamulata neparahaya. 6 Mepotowe ee batuana matuwu mantuku humawee parenta Alatala. Eimile parenta ee: Matuwu momepotowe komi ewa to laiepemi lako pamulana.
7 Apa nadeamo tauna to nepahalatara neumba i dunia ei. Hira ee to moma nampangaku ane Yesus Kristus narata nawali hadua manuhia. Tauna to ewa eeramo to pepahalatara bo bali Kristus. 8 Maingahawo, bona nemo maronto peparahayami hi Kristus to laipehimukuika kami hi komi. Pehimukui bona mirata humawee tomo to laipahadiaka-Na komi Alatala. 9 Butu tauna to moma matigu rara patudu Kristus pade mehuwu lako i hee, tauna ee moma'i nohangu rara hante Alatala. Hema-hema to matigu i rara patudu Kristus, laitarimanami Tuama pade Ana-Na. 10 Etumo, ane maria tauna marata mangkeni patudu to moma laipatuduka-Nata Kristus, nemo mitarima tauna ee i rara houmi pade nemo mipojaritaka'i. 11 Apa hema-hema to mampojaritaka'i, hia mui nantuku tauna ee nobabei ingku to nadaa.
Tabe kahuduana
12 Nadea mpuu to kana kukewoka komi. Naupawee nabelopi ane moma hante hura. Laiharumakaku bona aku moto marata mampojaritaka komi bona magoe mpuu rarata.
13 Tabe lako ana-ana ompimu bangkele to laipelihi Alatala.