2 Tesalonikika olu 1

Pɔli é sɛ́wɛ fyáaɲɔn mín nje

Tesalonikika ólu

mán

Twaali o

A fáanan Pɔli ní Silasi óni Timote la, kɛ a dí Tesaloniki Egilizi o lánanbhaa ólu mán. O mín ŋé án Nva Ala ni án Mantii tá le. 2 Ké án Nvá Ala óni Mantii Ɛnza Ngílisi olu yɛ́ nɛ́nmɛn óni láha o á kɛ á fɛ́.

Kílisi nánlo ŋo

3 Mádhye ŋólu, án ngákan kɛ bálika bhɔ́ Ala yɛ wáati bɛ́ á yɛ́ kó o lɔ, a bhyɛnin ɲé ké án ni o kɛ, kɛ mansɔɔ á yɛ́ lánanya o bwóɲanla kɛ táa ɲɛ́n, dhyáaɲɔɔnya míin á cɛ́, lɔ é bhyáala o ka kɛ táa ɲɛ́n. 4 O le kósɔn, án ngúnnanwiinin née á kó fɔla Ala yɛ lánanbhaa olu yɛ́ ɲɔ́ɔn nádhyɛnaa o lɔ. Àn ni fɔla i yɛ kó, tɔ́lɔya óni sɛɛ o bɛ́ lɔ́myaannin ŋo kwɔ, á lɔ́janin ŋe tó, óni áa tó lánanya o lɔ.

5 O bɛ́ɛ yáala kó Ala yáa kíti tɛɛ ni téeɲan lé ló nɔ la. A yɛ kíti teenin ŋo lée kó, aa á yacesiila óo mɔɔn mínnu kákan kɛ kɛ́ a yɛ mansaya o mɔɔn olu le, áa tɔ́lɔla o mín ngósɔn. 6 Kɛ mansɔɔ, kɛ kéeɲan ni Ala yɛ téeɲan o le, mɔɔn mínnu á tɔ́lɔla, Ala yáa ólu tɔ́lɔ. 7 Wáa álee mínnu tɔ́lɔyanin ŋe nin, a yáa laanvyaa dí án ne ni álee lu man, Mantii ngaa í yɛ́ɛ yaa wáati mín nɔn kɛ bhɔ́ sángboo lɔ ní a yɛ malɛɛka faanman ŋólu le. 8 A yáa nan tá ó cɛ́man, mɔɔn mínnu mán Ala lɔ, óni mínnu wɛ́ɛ i bá Mantii Ɛnza ɲɛn Sanmankanmɛɛ o mán, kɛ́ nan ko látɔ olu la. 9 I yɛ kóyoo ŋó saa o yáa kɛ halakili le, mín ndɛ́ wɛɛla, i ywáa yáa jaɲan Mantii o la, óni a yɛ fáan nɔ́lɔman ŋó la. 10 O kó olu kaa kɛ Mantii o nan ló ŋó lé la. O ló ŋo la a yáa nan, ké a yɛ mɔɔn sɛ́nnɛnyanin ŋólu á a bwóɲan, óni mínnu wɛ́ɛ lá a lá, ké olu á káwakoya a la ni nisɔdhyaa le. Álee lú yáa kɛ o mɔɔn ólu cɛ́man, kɛ mansɔɔ á wɛ́ɛ lá án ɲɛn sɛ́ɛya kóman o la.

11 O le kósɔn, án ni Ala dɛ́lila á yɛ́ wáati bɛ́, ké a wɛ́ɛ á kíi mín ngánman, ké áa táaman kɛ kéeɲan ni o lé án ɲɛn Ala o ɲankɔɔ. Áa fɛ kɛ kóbhɛɛ mín ngɛ, óni á yɛ́ lánanya o bháala o, ké Ala a á dhyɛman kɛ olu lafa, a yɛ sébhaaya o bháaka lɔ. 12 O ɲán o mán, án Mantii Ɛnza ndɔ́ɔ o yáa bwóɲan sɔ́ɔ á fɛ́, álee yáa bwóɲan sɔ́ɔ ale fɛ́, kɛ kéeɲan án ɲɛn Ala óni Mantii Ɛnza yɛ nɛ́nmɛn o le.