5
Mádhye ŋólu, míin nan kɛ Mantii o nan san gbu o le, án manko tɛ́ a la bhée kɛ sɛ́wɛ ce á mán o kósɔn, 2 kɛ mansɔɔ álee gbúlu a lɔ cɛ́ɛne ko Mantii o yɛ lo ŋo nánla le óyoo so ŋo nánla su lɔ tɛnmɛn. 3 Mɔɔn olu kɛ kɛ fɔla wáati mín nɔn ko: «Án nahanin ɲe! Án ni laanvyaa lɔ!» Hálaki o kaa bé i ka o wáati o le lɔ, óyoo tin ŋo muso kɔ́ɔnman ŋo myaanla tɛnmɛn. I táa kísi féu. 4 Wáa, mádhye ŋolu, álee tɛ diwi lɔ, ké Mantii o nan lo ŋo á bháa á lɔ́ óyoo so ŋo bháala mɔɔn lɔ tɛ́nmɛn ne. 5 Kɛ mansɔɔ, á bɛ́ bɛ é kɛ́ɛnɲan óni tee o dhyé ŋó léelu le. Án ndɛ́ sulɔmɔɔn wáman diwilɔmɔɔn lu le. 6 O le kósɔn án ngɛnan tó súnnɔɔn lɔ óyoo mɔɔn tɔ́ ólu. Án ni án ɲáakii tó án ɲɛɛ lɔ, kɛ án ɲɛɛ myaanko lɔ.7 Mínnuu súnnɔɔnkɛla, olu súnnɔɔnkɛla su lɔ le, mínnuu dɔ́lɔ o mínnan kɛ tinmin, oluu dɔ́lɔ o mínnan su lɔ le. 8 Wáa án nee mínnuu téelɔmɔɔn lu le, án nee á se án ɲɛɛ lɔmyaanla. Án ni lánanya óni dhyáaɲɔɔnya o bhyáa án ngánnan óyoo nɛɛndeekea, kɛ kísili o yéemandhyaa o kɛ́ án ɲɛn nɛɛnfula o le. 9 Kɛ mansɔɔ Ala man án na a yɛ díminsa o kanman, aa án na kísili o sɔɔ o le kanman, án Mantii Ɛnza Ngílisi bháaka lɔ. 10 O mín ŋé sayakɛ án ngosɔn, ké án ni kɛ́ án ní la o, ké án nzayakɛnin ŋan kɛ o, án ɲáan ɲáanmanɲan kɛ́ ni a le. 11 O le kósɔn, áa ɲɔ́ɔn nvaan lo óni áa ɲɔ́ɔn nɔ́dhyɛman kɛ táa ɲɛnnvɛ lánanya o lɔ, óyoo áa kɛla tɛ́nmɛn ne, tínɲan in ne.
Pɔli yɛ ládhyeli óni twáali labha ŋo
12 Mádhye ŋolu, mínnuu bháalakɛla á cɛ́man kɛ á bhyáa sháa ka Mantii o tɔ́ɔ o la, kɛ á lasowi, án ni á dɛ́lila kó áa olu yacesii. 13 Áa i bwóɲan cɛ́ɛne, i lo ŋán dhyáa á yɛ́, i yɛ bháala o kósɔn. Láha o á kɛ́ á cɛ́. 14 Mádhye ŋólu, án ni á dɛ́lila: Án mádhye mínnu lakɛbhɛɛ le, áa olu ládhye. Mínnu yée wɛ́ɛ tɛɛ, áa olu yóso láyii. Áa bhaakanda ŋolu lɔdhyɛman. Áa í yóso swáanya mɔɔn bɛ́ fɛ. 15 Áa á yɛ́ɛ kɔɔsi, mɔɔn si kɛ́nan kóyoo nzala ni kóyoo ne, wáa áa í lɔ́ja kɛ kóbhɛɛ kɛ́ ɲɔ́ɔnɲɛn, óni mɔɔn tɔ́ ólu yɛ wáati o bɛ́ lɔ. 16 Áa í ɲaanli wáati bɛ́. 17 Á kɛ́nan Ala dɛ́li o labhyaa.
18 Áa bálika bhɔ́ Ala yɛ ko o bɛ lɔ, kɛ mansɔɔ o lée Ala sao le á ta fá ŋo fɛ, álee mínnu é ni Ɛnza Ngílisi le.
19 Á kɛ́nan Ní Sɛ́nnɛnyanin ŋó yɛ tá o lása.
20 Á kɛ́nan céla olu yɛ kóman olu manfwɛɛnya.
21 Áa ko o bɛ́ mánfɛɛ cɛ́ɛne. Mín ngáɲin, áa o lámala. 22 Áa á yɛ́ɛ kɔɔsi kóyoo ŋo bɛ súu man.
23 Ké láha o tii Ala gbu á á sɛ́nnɛnya péu. Ké Ala á á lámala, á ní o, á yóso o, óni á fasisoo o bɛ́. Mɔɔn sí kɛ́nan sɔ ngóo nzɔɔ á lá, fɔ kɛ táa se án Mantii Ɛnza Ngílisi nan lo ŋo man. 24 Ala míin á kíi, óo kánngeendii le le; ale le kaa o kɛ.