Kɛ́wɛɛ 27

Pɔli yɛ Itali táa o

Ii bhyɛ o lɔ mínngɛ, kó án ngɛ́ɛ tɛɛ kúun ne lɔ Itali, án ni Pɔli ní kasodhye nɔlu kɛ́ɛfa swáasikunndii lɔ mán, o tɔ́ɔ ko Zuliyusi, o swáasicɛ o tɛ́ɛ sɛ́ɛ mínnɔn, i tɛ́ɛ fɔla o le mán kó Ogusi yɛ swáasi sɛ́ɛ olu. 2 Án ni ló kúun nɔn kɔɔnnɔn, Adalamiti kúun ne tɛ́ɛ o le, o tɛ́ɛ táala Azi kúunndalaa o le manshaafɛ. Án ní táa kɔɔji o ka, Alisitaki tɛ́ɛ ni án né, Masedwaninnga le, kɛ bhɔ́ Tesaloniki. 3 O lusɔgbɛ o, án ní sé Sidɔn; Zuliyusi mín ndɛ́ɛ kóbhɛɛ kɛ́la Pɔli yɛ, oo Pɔli lábhyaa ke aa táa a twáanva olu saala, ké ii a lɔdhyɛman. 4 Án ni bhɔ́ o ywáa o lɔ mínngɛ, án ni tinmin Shipulu mala óo tɔ́ɔfɛ, kɛ o ywáa o lúukolo o tó án né ni fwɛɛn o cɛ, kɛ mansɔɔ fwɛɛn o tɛ́ɛ án ngumyɛnan le. 5 Kɔɔji míin Silisi óni Panfili mala o lɔ, án ni wɛɛ o tɛɛ la mínngɛ, an ni nán sé Mila só o la, míin Lisi yamaan o lɔ. 6 O ywáa o lɔ, swáasikunndii o kúun nɔ yé bhɔ́la Alɛsandili só o la kɛ táa Itali, aa án nálo o kɔ́ɔnnɔn. 7 Tee shɛ́ɛman ngɔ́ɔnnɔn, án ndɛ́ɛ táa kúun ŋo lɔ dɔ́ɔnin dɔ́ɔnin jí o ka, óni án ni gbɛya shɛ́ɛman myáan, kɛ tó séla Kinidi só o tɔ́ɔfɛ, wáa fwɛ́ɛn o tɛ́ tɛ́ sɔnnan bhée, ké án ni táa ɲɛn, án ni tinmin Salimone só o tɔ́ɔfɛ kɛ táa Kɛlɛti yamaan o lɔ, kɛ lúukolo o tó án né ní fwɛ́ɛn o cɛ. 8 Án ni gbɛya sɔɔ, kɛ láfɛ o ywáa o lɔ, án ni sé ywáa lɔ lɔ́ ii o kíila ko Kúunndalaa Cɛ́ɛ ŋo, oo Lase só o tɔ́ɔfɛ.

9 Wáa wáati shɛ́ɛman ndɛ́ wɛɛ tinmin, óni kúun o lábwee o tɛ́ɛ táa gbɛya le, yáanin sún nó wáati^a o tɛ wɛɛ wɛɛ. Pɔli é i lasowi kó: 10 «Ndwáanva olu, ní yéla óo kúun nábwee o yáa kɛ gbɛya shɛ́ɛman nɔ, óni kúun ŋo yáa cáan, sé yáa kɛ kúun ŋo mán, fé mínnuu kúun ŋo kɔ́ɔnnɔn sé yáa kɛ olu mán, sé yáa kɛ kúun ŋo kɔ́ɔnnɔn síibhaa olu mán.» 11 Wáa swáasikunndii ó tɛ́ɛ kúun nábweebhaa óni kúnndii olu yɛ kóman o le yacela, kɛ tinmin Pɔli tá kóman o ka. 12 Lɔlaa bhɛɛ tɛ́ tɛ kúun o bhóo o ywáa o lɔ sanmanyi o lɔ mínngɛ, o le kósɔn mɔɔn shɛ́ɛman ŋé fɔ́ kó ii táa kɛ bhɔ́ o ywáa o lɔ, ní i kɛ sé Fenisi lásɔɔla, Kɛlɛti yamaan o kúunndalaa o lɔ, kɛ sanmanyi o kɛ yénɔn. O kúunndalaa oo teebe ŋo lɔ; lonaa fyaa lee o la, a kée ŋo ɲán gbaanin ɲe kíimoo o fɛ, a tɔ kée ŋo ɲán gbaanin ɲe nwáanmoo o fɛ.

Fwɛɛnba oo i wíi jí o ka

13 Fwɛ́ɛn dɔ́ɔnin nɔ é bhyaa kɛ bhɔ́ kíinmoo o fɛ, kúun nábweebhaa olu yé o lɔ óyoo i yɛ táaman o yáa sé bhyɛ́nan. Ii i wíi kɛ kúun ŋo tá kɛ táa, kɛ a la Kɛlɛti yamaan o kɛlɛ fɛ. 14 Wáa, wáati dɔ́ɔnin ŋo kwɔ, fwɛ́ɛnba lɔ é bhɔ́ Kɛlɛti Yamaan o mánshaa fɛ, kɛ́ nan bhyaa án nga, o fwɛ́ɛn o, ii fɔla o mán kó Elakilɔn. 15 O fwɛ́ɛn o nan i sii kúun ŋo mán, án née mán sé fósi kɛ́la kɛ kúun ŋo lalɔ, án ni án ɲɛ́ɛ to yé kɛ́ táa a bhóo. 16 Án ni tinmin lúukolo dhyénin nɔ tɔ́ɔfɛ o tɔ́ɔ kó: Koda, tó kɛ lúukolo o tó án né ní fwɛ́ɛn o cɛ. Kúun dhyénin mínnu tɛ́ɛ án móo, sannin án ni sé kɛ o bhɔ́ jí o lɔ, kó mángbɛya kɛ o bhɔ́. 17 Án ni kúun dhyénin ŋo síli kúunmba o mán mínngɛ, ii kúunmba o síli yúu la. I tɛɛ sháannan ké kúun ŋo kɛ́nan bhɔ́ jí o lɔ, kɛ nan cɛ́n o ká Libi kɔɔji la o la, o le kósɔn ii kúun ŋo mánfe ŋolu láyii^b, tó ii i yɛ́ɛ tó fwɛ́ɛn o bhóolɔ kɛ táa. 18 O lusɔgbɛ o, ké fwɛ́ɛn o kúun ŋo lafinnvanan ko cɛ́yoongɛ, kúun námbweebhaa olu lwee ŋo lɔ́lu lafii kɔɔji o lɔ. 19 A tee sawaɲɔɔn ló ŋo, kúun bwéebhaa olu gbu o, kúun námbwee mínnan ŋolu lafii kɔɔji o lɔ. 20 Án ni tee shɛ́ɛman ngɛ́, án ndɛ́ tɛ tee o yéla, óni lóodhye ŋolu. Fwɛ́ɛn o ló ndɛ́ tɛ i mánla la, án ɲíin tɛ́ tɛ a man bhée kó án ɲáan kísi.

21 A tɛ wɛɛ wáati bhɔ i tɛ man sunman nɔ́ɔ bha, o lɔ, Pɔli é i wíi o lé lɔ, kɛ í lɔ́ i cɛ́man, tó kɛ a fɔ i yɛ kó: «Ndwáanva olu, ní a tɛ́ɛ ngómankan ŋo lɔ́myɛn, á tɛ́ táa bhɔ́ Kɛlɛti, á tɛ́ɛ sé sutaala cáannin míin mán, óni á tɛ́ táa bhɔ́ɔn á yɛ́ lwee ŋolu lɔ. 22 Wáa kwáalenin, ní a ɲíinan á fɛ́: Áa i lɔ́ja, kɛ mansɔɔ mɔɔn si táa sayakɛ, wáa án ɲáan bhɔ́ɔn kúun ŋo lɔ. 23 Née Ala mín ndá le, ni bháalakɛla mín ɲɛn, óo a yɛ malɛɛka lɔ bhyáashaa né mán bí sú o lɔ. 24 Tó kɛ fɔ né yɛ kó: ‹I kɛ́nan sháan Pɔli, kó dhyáala gbéya fɔ́ íi táa i lɔ́ Sezali kɛ́ɛnnan, íle kósɔn, Ala yɛ bhɛ́ɛbhɛɛya o lɔ, mɔɔn óo mɔɔn é kúun ŋo lɔ ni íle, a yáa olu bwási ikwɔ.› 25 Áa i lɔ́ja ndhwanva olu, né lánin ŋé Ala la, tínɲan in ne, Ala é mín nvɔ né yɛ, o yáa kɛ. 26 Wáa kúun ŋo yáa bhɔ́ kɔɔji o lɔ jí o cɛ́man tíinnan ywáa lɔ lɔ́.»

Án ngísi kó o

27 Sú tá ni náanninɲɔn ló ŋo, ké fwɛ́ɛn o táa án né kɔɔji o ka, sú o cɛ́manlaa o lɔ, kúun nábweebhaa olu sówi óyoo ii i mangbaa Adiliyatiki lúukolo o la. 28 Ii yúu lɔ láyii jí o lɔ, ii a yé oo jí o lɔ́sii o tɛ́ɛ mɛtɛlɛ bísawa ni wóonvyaa bhɔ́la. Ii sé ɲɛ́nnzhaafɛ mínngɛ dɔ́ɔnin, ii yúu o láyii ikwɔ, jí síi o kɛ mɛtɛlɛ mwáan ni sɛ́ɲin né le. 29 Kúun námbweebhaa olu tɛ́ɛ sháannan ké kúun ŋo kɛ́nan gbáan fáa o mán, o le kósɔn nɛ́ɛnnguun gbíiyanin míin kúun ŋo lalɔla, ii o náannin bhyáa jí ŋo lɔ kúun ŋo kwɔ́shaafɛ. I kɔlɔtɔnin bá o tɛ́ɛ kɛ́ɛn bhɔ́ o mankɔɔnnan. 30 Kúun námbweebhaa olu tɛ́ɛ fɛ kɛ bwée. Ii kúun nvítiinin nɔ bhyaala jí o ka o le lɔ, kɛ fɔ ko i kɛɛ tɛɛ nɛ́ɛnnguun nɔ sili kúun mbá o nún ŋo la. 31 Pɔli é fɔ swáasikunndii óni swáasi olu yɛ kó: «Ní mɔɔn míinnu mán tó kúun mba o kɔ́ɔnnɔn, á táa kísi.» 32 O lɔ, swáasi olu kúun dhyénin ŋo yúu olu tɛ́ɛ, kɛ a bé kɔɔji o lɔ.

33 Sannin kɛ́ɛn o á bhɔ́, Pɔli é fɔ́ kó i bɛ́ á lɔ́minkɛ. Aa fɔ́ i yɛ kó: «Tee tá ni náannin lée bí nín, á ɲángbannin ɲé, a ló man fósi lɔɔ. 34 Ni á dɛ́lila ké áa lɔ́minkɛ, kɛ mansɔɔ a manko é o la kɛ kísi. Kɛ mansɔɔ mɔɔn sí táa bhɔ́ɔn háanin a kúnzhe o kóo kée nɔn.»

35 Aa wɛɛ kóman o la mínngɛ, Pɔli é búlu lɔ tá, kɛ bálika bhɔ́ Ala yɛ i bɛ́ ɲankɔɔ, aa búlu o lɔ tɛ́ɛ a lá, tó kɛ o lɔɔ ŋo lamyaan. 36 O lɔ, i bɛ́ɛ i yóso lágbɛya kɛ lɔ́minkɛ. 37 Án mɔɔn kɛnmɛn fyáa ni mɔɔn bíwoonvyaa ni mɔɔn wɔ́ɔlɔ le tɛ́ɛ kúun ŋo kɔ́ɔnnɔn. 38 I bɛ́ɛ fa mínngɛ, i yɛ béle mín ndɛ́ɛ kúun ŋo kɔ́ɔnnɔn, ii o lafii kɔɔji o lɔ, ké kúun ŋo á fwɛɛnya.

Kúun ŋo cáan ŋo

39 Kɛ́ɛn oo bhɔ́ mínngɛ, ii tɛ́ɛ yamaan o ywáa mín nɔn kúun námbweebhaa olu man bhɔ́ o ɲan le, wáa kɔɔji o zóo nvítiinin nɔ tɛ́ɛ yénɔn, jí bhɛ́ɛ tɛ́ tɛ yénɔn. Ii bhyɛ a lɔ kó kɛ táa kúun ŋo lálɔ o ywáa o lɔ, ní ii sé o la. 40 Ii nɛ́ɛnnguun ŋo yúu olu tɛ́ɛ kɛ o bhɔ́ kúun ŋo la, kɛ o tó jí o lɔ o ywáa kée ŋó lɔ, fé míin kúun ŋo kwɔ́ la, tó íi kúun ŋo bhyaala sháa ka ni o le, ii o fwée. O kwɔ, fáanin mbá míin kɛla kúun ŋo ɲɛnnzhaafɛ tó fwɛ́ɛn o lónan a lɔ kɛ kúun ŋo látaa ii o láwii, ké fwɛ́ɛn o a i síi kúun ŋo mán kɛ táa lúukolo o mánshaa fɛ. 41 Wáa kúun ŋo nún ŋóo táa gbáan cɛ́n o lɔ, jí fwɛ́ɛn fyaa o yɛ ɲɔ́ɔnmyɛnaa o lɔ. Kúun ŋo mán sé táala bhée, a nún ŋo tɛ wɛɛ gbáan cɛ́n o lɔ, a tɛ tɛ́ sé bhɔ́la bhée. Jí fwɛ́ɛn o tó kúun ŋo kwɔ́shaafɛlaa o fálonan, fɔ kɛ a cáan. 42 Swáasi olu tɛ́ɛ fɛ kɛ kasodhye ŋolu fáa, ké o lɔ kɛ́nan kwɔ́kɛ, kɛ bwée. 43 Wáa swáasikunndii o tɛ́ɛ fɛ ké Pɔli ɲwaan a bhɔ; o le kósɔn aa fɔ́ i yɛ kó i kɛ́nan o kɛ, aa fɔ o le lɔ kó mɔɔn mínnu séla kwɔ́kɛ, olu a i yíi jí o lɔ bɛ́ ɲɛn, kɛ táa káan ŋó la, 44 ko mɔɔn tɔ olu á i dhyɛ yii fɛ́ɛn ŋolu ka, wáman kúun ŋo ywáa lɔ́lu la kɛ táa mɔɔn tɔ olu sɔɔ tíinnan. I bɛ́ bɛ́ ɲwaan é bhɔ ji o lɔ o bhóo o le man, kɛ sé lúuman.