Kɛ́wɛɛ 22

«Mádhye ŋólu, óni nvá olu, né káa kóman mín nvɔ́ kwáalenin, kɛ yáa a lá kó né mán kóyoo nzí kɛ́, áa o lɔ́myɛn!» 2 Mɔɔn olu a yé kómanla i fɛ́ Ebulukan ŋó lɔ mínngɛ, i bɛ́ɛ i lúmandhye, kɛ́ manngan ŋo bɛ́ labhyaa. Pɔli kó: 3 «Née Yawudhyaa le lé, ní wóo Taasi le, Silisi yamaan o lɔ. Wáa ní bwóɲan Yeluzalɛmu yánun ne, óni kɛ námwɔn, ní káa ŋo kɛ Gamaliyɛli le sé ngɔɔ; ale lée ne kala kɛ bhyɛ́ án myɛ́man olu yɛ sɛliya o mán. Ne cɛsiinin ndɛ́ɛ Ala kwɔkɔɔdhyɛ o la jónan, óyoo álee ɲán mín man bí nín. 4 Mɔɔn mínnu é Sháa míin nga, née o lɔ́lu tɔ́lɔ fɔ́ kɛ i fáa, kɛ́ i sili kɛ i bhyáa kasola, cɛ ni muso bɛ́. 5 Faanlɛɛɲansebhaa olu kúnndiiba o, óni cɛba ólu bɛ́ tɛ́ɛ ne sɛ́ɛya le. Yáanin ní sɛ́wɛ lu sɔ́ɔ i bhóo kɛ táa dí mádhye Yawudhyaa olu mán Damasi, ké mɔɔn mínnu lánin ɲé Ɛnza nan, ké ní olu síli, kɛ táa ni ile Yeluzalɛmu, ké ii i tɔ́lɔ.

6 Ne tɛ́ɛ sháala, óni ndɛ́ wɛɛ súnɲan Damasi la mínngɛ, i kɔ́lɔ teelatee o wáati o lɔ, kɛ́ɛnbhɔba lɔ é baa kɛ bhɔ́ sángboo ó lɔ kɛ́ mannan mannan kɛ né lámiin. 7 Ní mbé lúuman; ní kómankan nɔ́ myɛ́n o tɛ́ɛ fɔla kó: ‹Sɔli, Sɔli! Mínnɛɛn le kósɔn íi né tɔ́lɔla?› 8 Née a mánɲaankɛ kó: ‹Mantii o, íle yɛ́ɛtii é wé?› Aa yawi kó: ‹Né Ɛnza Nazalɛtika lée wé; íi mín ndɔ́lɔla.› 9 Wáa mɔɔn mínnu tɛ́ɛ ni né le, ólu kɛ́ɛnbhɔ o yé, wáa mín ndɛ́ɛ kómanla né fɛ i mán o kómankan ŋó myɛ́n. 10 Ní mánɲaankɛli kɛ kó: ‹Né kákan kɛ mínnɛɛn le kɛ Mantii o?› Mantii o fɔ́ ɲɛ́n kó: ‹Í wíi, táa Damasi, í káa kó óo kó kɛ́, i yáa o fɔ́ í yɛ yénɔn.› 11 Kɛ́ɛnbhɔ o bwóɲankoyoo ŋó kósɔn, né tɛ tɛ́ fóyi yéla bhée, mɔɔn mínnu tɛ́ɛ ni né, ólu né bhóo o myaan kɛ́ táa ni né Damasi.

12 Cɛ lɔ tɛ́ɛ Damasi, o tɔ́ɔ ko Ananiyasi. Mɔɔn téenin né tɛ́ɛ o le sɛliya o tá sháa o fɛ, Damasi Yawudhyaa olu bɛ́ tɛ́ɛ a sɛ́ɛya ládila. 13 Oo nan né saala, kɛ́ nan i lɔ́ né tɔ́ɔfɛ, kɛ fɔ́ kó: ‹Mádhyemannjɛ Sɔli, i ɲán o wáa i laka.› O wáati kée ŋó lɔ, ɲán oo i laka, tó ní a ye. 14 Aa fɔ́ né yɛ kó: ‹Án myɛ́man olu yɛ Ala o wɛ́ɛ i bhɔ́, ké ii a sao o lɔ́. A wɛ́ɛ sɔn ke ii mɔɔn téenin ŋo yé, óni kɛ́ a kómankan o myɛ́n. 15 Kɛ mansɔɔ i yáa kɛ́ a sɛ́ɛya le; i wɛ́ɛ mín ɲé óni i wɛ́ɛ mín myɛ́n, i yáa o fɔ mɔɔn olu bɛ́ ɲankɔɔ. 16 Kwáalenin i kɛ́nan i síi kɛ fé ngbɛ́ɛ mánkɔɔn mée. Í wíi, íi i bátize kɛ i yɛ yúumu olu bhɔ́ i mán, ní Mantii o tɔ́ɔ fɔ o le.›

17 O kwɔ́, ni ngwɔ́sɛɛ kɛ́nan Yeluzalɛmu mínngɛ, ló nɔ́ la, kɛ ne tó Ala dɛ́li o la Ala bhatobhomba kɔ́ɔnnɔn, Ala é fé nɔ́ yáa ne la. 18 Née Mantii o yé, aa fɔ́ ne yɛ kó: ‹I láteeya kɛ bhɔ́ Yeluzalɛmu só o kɔ́ɔnnɔn, kɛ mansɔɔ i káa kóman mín nvɔ́ né yɛ ko o lɔ, mɔɔn sí táa sɔ́n o man yánun.› 19 Né kó: ‹Mantii o, né tɛ́ɛ lónan ɲán mín mán sɛ́ɛbho ŋólu kɔ́ɔnnɔn mínnu lánin ndɛ́ɛ i lá kɛ olu myáan kɛ́ i gbasi kɛ i bhyáa kaso o la, ilee gbúlu a o lɔ́. 20 Yáanin i tɛ́ɛ Etiyɛni nváala wáati mínnɔn, i yɛ sɛ́ɛya o, né gbú o tɛ́ɛ o ywáa o lɔ. Ní sɔ́n Etiyɛni nváa o mán; née a fáabhaa olu yɛ déeke olu lámala i yɛ.› 21 Wáa Mantii o kó: ‹Táa, kɛ mansɔɔ né yáa i bhyáashaa céla ywáaja nɔn, síya gbɛ́ɛ olu mánshaa fɛ.›»

Pɔli é swaasi olu bhóo Yeluzalɛmu

22 Yaman o bɛ́ tɛ́wɛɛ i lúmandhye kɛ Pɔli lɔ́myɛn fɔ́ kɛ sé kóman míinnu mán. Wáa Pɔli é o kóman olu fɔ́ mínngɛ, yaman oo a kɛ gbáa ŋo lé ko: «Mɔɔn súu míin ngákan né kɛ fáa kɛ a bhɔ́ dínɲan kɔ́ɔnnɔn, a ɲáanman mánngan kɛ tó!» 23 I tɛ́ɛ gbáanan, kɛ i yɛ déeke olu láfii, óni i tɛ́ɛ fíimuu o láfii la sáman. 24 Swáasi olu kúnndiiba o fɔ́ swáasi olu yɛ kó ii ló ní Pɔli le bhó ŋo kɔ́ɔnnɔn, kɛ́ a gbási gbɛ́nɲɛn la, kɛ́ fáan lá a ká, ké aa kóman. Aa kó mínngɛ, tó mɔɔn olu gbáanan a kúnnɔn, aa o fɔ́. 25 Ii Pɔli síli kó i kaa gbási wáati mínnɔn, swáasikunndii mín ndɛ́ɛ Pɔli tɔ́ɔ fɛ́, Pɔli kó o man kó: «Án ɲɛn sɛliya o lɔ, a láanin ŋé kɛ yamaan dhyé ŋó lɔ́ gbási gbɛ́nɲɛn la, ké kíti mán bé a ka ŋán?» 26 Swáasikunndii óo o myɛ́n mínngɛ, áa táa fɔ́ swáasi kúnndiiba o yɛ kó: «Íle tɛ́ɛ fɛ́ kɛ mínnɛɛn le kɛ́ nín? Cɛ míin ɲé Lomɛn yamaan o dhyé ŋó lɔ́ lé le lɛ́!» 27 Swáasi olu kúnndiiba o gbú o táa Pɔli manɲaankɛ kó: « Íi Lomɛn yamaan o dhyé ŋó lɔ́ lé le, tínɲan in ne a?» Pɔli kó: «Ɔ́ɔn né.» 28 Swáasi olu kúnndiiba o kó: «Née wɛ́ɛ shɛ́ɛman né sála, kɛ tó kɛ́la Lomɛn yamaan o dhyé ŋó lɔ́ le lɛ́!» Pɔli kó: «Née wóo a lɔ lé!» 29 O wáati kée ŋo lɔ téeman, mínnu tɛ́ɛ fɛ kɛ Pɔli gbási kɛ́ fáan lá a ka ké aa kóman, olu bɛ́ɛ bhɔ́ a tɔ́ɔfɛ. Swáasi olu kúnndiiba o gbú o sháan, kɛ mansɔɔ ale lée fɔ́ kó kɛ́ Pɔli síli, yáa Lomɛn yamaan o dhyé ŋó lɔ́ lée ale.

Pɔli é kítitɛɛbhaa olu ɲankɔɔ Yeluzalɛmu

30 Pɔli yíinan kún ŋó tɛ́ɛ mín né Yawudhyaa olu bhóo, swáasi olu kúnndiiba o tɛ́ɛfɛ kɛ o lɔ́. O ló ŋó lúusɔgbɛ o, áa nɛɛnyɔlɔkɔ o bhɔ́ Pɔli lá, kɛ faanlɛɛɲansebhaa ólu kúnndiiba ólu ní kítitɛɛbhaa ólu bɛ́ kíi kɛ́ i ládhyɛ. O kwɔ́, ii táa ni Pɔli le kɛ a lá lɔ́ i cɛ́man.