Kɛ́wɛɛ 20

Pɔli kwɔ́sɛɛ o Masedwanin ní Gɛlɛsi

Mannganmba óo wɛ́ɛ mínngɛ, Pɔli é kaamɔɔndhye ŋolu kíi kɛ i ládhyɛ. Aa i fáan ló, aa i fó, tó kɛ sháa o dɛ́li i fɛ kɛ táa Masedwanin. 2 Pɔli tínminndɔ o ywáa olu lɔ́, aa lánanbhaa olu fáan lo ni ládhyelikan shɛ́ɛman ne, kɛ tó táala Gɛlɛsi yamaan o lɔ. 3 Aa káa sawa le kɛ́ yénɔn. A táa wáati óo nán se mínngɛ Sili yamaan o lɔ; aa myɛ́n mínngɛ kó Yawudhyaa lɔ́lu wɛ́ɛ yánva síi a man, aa fɔ kó a káa i kwɔ́sɛɛ kɛ tinmin Masedwanin nvɛ kɛ táa. 4 A táamanɲɔɔn olu tɛɛ Pilusi dhyénjɛ Sopatɛli, Beleka lé tɛ́ɛ o le; Alisitaki óni Segɔndusi, Tesalonikika lé tɛ́ɛ olu le; Gayusi, Dɛlibeka lé tɛ́ɛ o le; Timote; Tishiki óni Tolofimu, Azika lé tɛ́ɛ olu le. 5 Óluu bhyáa án ɲɛn, tó kɛ táa án mankɔɔn Tolowasi. 6 Búlufuunmɛɛ o ɲánlagbɛ o tínminnin ŋo kwɔ́, án ní ló kúun nɔ́ kɔ́ɔnnɔn Filipi; án ndáa tɔ o tée lóo le kɛ́ jí o ka, kɛ́ táa i sɔɔ Tolowasi. Án ní lɔ́ɔwoocɛ kée né kɛ́ yénɔn.

Pɔli yɛ́ táaman lábha ŋo Tolowasi

7 Lɔ́ɔwoocɛ o tée jónan o mán^a, án nádhyɛnin ndɛ́ɛ, kɛ lɔ́min kɛ ɲɔ́ɔn nvɛ^b. Pɔli tɛ́ɛ fɛ́ kɛ táa o ló ŋo lúusɔgbɛ o la; aa myɛ́n kóman o la lánanbhaa olu yɛ, kɛ táa sé fɔ́ sú o cɛ́man. 8 Án nádhyɛnin ndɛ́ɛ sangaso mín ngɔ́ɔnnɔn, fitinan shɛ́ɛman námaannin ndɛ́ɛ o bhó ŋo kɔ́ɔnnɔn. 9 Kaweenin nɔ́ tɛ́ɛ ni án né, a tɔ́ɔ kó Etiki, ale síinin ndɛ́ɛ bhó ŋo finantɛli o la. Pɔli é myɛ́n kóman o la mínngɛ, súnnɔɔn é Etiki myaan. Aa súnnɔɔn kɛ, fɔ́ kɛ́ ɲán a yɛ́ɛ kwɔ́. Aa tó súnnɔɔn o lɔ, aa bhɔ́ sangaso o bhó ŋo fyáaɲɔn o kúnnɔn kɛ i bé lúuman. Án ní a láwii la wáati mínnɔn, óo kɛ ké a wɛɛ sayakɛ. 10 Pɔli é í yíi kɛ táa i manyii a ka, tó kɛ a ta, kɛ́ fɔ́ ko: «Á kɛ́nan hánmin, aa i ɲánla.»

11 O kwɔ́, Pɔli é í yɛ́ɛ, ale ni lánanbhaa oluu lɔ́min kɛ ɲɔ́ɔn nvɛ^c. Pɔli é tó kóman o la fɔ́ kɛ táa sé tée bhɔ́ o mán, tó kɛ tó táala. 12 Etiki yɛ mɔɔn olu táa ni ale lúman, ké aa i níla. O kó óo lánanbhaa olu nisɔdhyaa kóyoongɛ.

Pɔli yɛ táaman o Mile

13 Án ní ló kúun nɔ́n kɔ́ɔnnɔn kɛ́ bhyáa Pɔli ɲɛ́n kɛ táa Asosi. Án ngákan kɛ táa Pɔli ta yénɔn, kɛ́ mansɔɔ Pɔli é fɔ́ kó a kɛ́ɛ tɛ́ɛ Asosi i sénan le. 14 Aa táa án nzɔ́ɔ Asosi wáati mínnɔn, án ní ló kúun ŋo kɔ́ɔnnɔn kɛ táa Mitilɛni. 15 Án ní bhɔ́ o ywáa o lɔ ló mínnan, o lúusɔgbɛ o án ní sé Shiyo ɲɛ́nnzhaafɛ. O lúusɔgbɛ o án ní sé Samɔsi. O ta lúusɔgbɛ o la ikwɔ, án ni sé Mile. 16 Pɔli tɛ́ tɛ́ fɛ kɛ tinmin Efɛzi; ké a kɛ́nan myɛ́n Azi mala o lɔ. A tɛ́ wɛɛ kɔ́lɔtɔ kɛ sé Yeluzalɛmu, ké Pantekɔti ló ŋo o a sɔɔ yénɔn.

Pɔli yɛ saanganan o Efɛzi cɛba olu yɛ

17 Kɛ a tó Mile, Pɔli é céla bhyáa kɛ́ táa Efɛzi Egilizi o cɛba olu kíi. 18 Ii sé a tɔ́ɔfɛ mínngɛ, aa fɔ́ i yɛ kó: «Ále, kɛ tá ne a nzé ŋó bhyáa Azi yamaan o lɔ, ní táamankɛ a cɛ́man ɲán mín man a gbúlu á o lɔ cɛ́ɛne. 19 Ní bháalakɛ Mantii o yɛ óyoo yɔ, yɛɛmanyiili o lɔ, ɲánji o lɔ, gbɛ́ya o cɛ́man Yawudhyaa ólu yɛ yánva síinin ŋo kósɔn. 20 Áa lɔ́ ŋóo né mán fósi lóonaankɛ a mán, nánfa é fé ŋóo fé nán, né wɛ́ɛ o láse, né wɛ́ɛ á kala o la, yaman o lɔ óni á yɛ bhó ŋólu la. 21 Ní fɔ́ kɛ́ mángbɛya, Yawudhyaa óni Gɛlɛki olu yɛ kó ii sɔ́n Ala man, kɛ́ lá an ɲɛn Mantii Ɛnza nan. 22 Áa manfɛɛ nín, Ní Sɛnnɛnyanin ŋo wɛ́ɛ fáan lá né ká, kɛ nántaa Yeluzalɛmu; wáa né mán lɔ́ kó mín ngáa né sɔ́ɔ yénɔn. 23 Ní mín nɔ́, née tinmin só oo só la, Ní Sɛnnɛnyanin ŋo lée o yáa né la kó kasolabhyaa óni tɔ́lɔya shɛ́ɛman ŋé né mánkɔɔnnan. 24 Wáa né tɛ́ ɲɛ́n ɲaanmanɲan o yacela fémba lé, óyoo o kuu á gbɛ́ɛ né mán. Mín ngúu á gbɛ́ɛ né mán, o lée kɛ táa fɔ́ ɲɛ́n bháala o lé a lá ŋo mán, óni aa myáa cé mínnan, kɛ o lábha cɛ́ɛne, Mantii Ɛnza ŋwɛ́ɛn bháala mín ngɛ́ɛfa né mán, kó né a Ala yɛ nɛ́nmɛn o sanmankanmɛɛ o sɛ́ɛya o ládi.

25 Áa mánfɛɛ kɛ tá bí mán, ne wɛ́ɛ Ala yɛ́ Mansaya o láse a mín ŋóo mín njɛ́man, ne a lɔ́ ŋóo a sí ɲán táa lá ne ká mée. 26 O le kósɔn ní fɔla a yɛ́ bí kɛ a mangbɛya kó: ní mɔɔn mín ngɛ́ a yɛ́ɛ lafii, o tɛ́ né tá kó le bhée. 27 Kɛ mansɔɔ Ala sao o mín né, ne wɛ́ɛ o bɛ́ fɔ́ a yɛ, ne mán fósi lóonaankɛ a mán. 28 Aa gbáamyaan a yɛ́ɛla óni saa ólu la; Ní Sɛnnɛnyanin ŋo wɛ́ɛ a lasii Ala yɛ saa mínnu kúnnan, aa i kɔ́ɔsi cɛ́ɛne; aa i yáakii tó Kílisi yɛ́ mɔɔn olu lɔ, Ala wɛ́ɛ o mínnu kunmanka ní a gbú yée o le. 29 Ní a lɔ́ ŋóo ní ne kɛ táa, mɔɔnlafiibhaa lɔ́lu yáa ló a cɛ́man óyoo súuku yóo ŋolu lónan bhyaa ŋolu cɛ́man ɲan mín man; olu táa bhyáa ŋolu tó yé. 30 Mɔɔn lɔ́lu yáa i wíi kɛ bhɔ́ á gbúlu cɛ́man, ni fwɔnɲan kóman lɔ́lu le, kɛ́ kaamɔɔndhye ŋolu lafii, ké olu a i bhyáa i kwɔ. 31 O lɔ, áa á yɛ́ɛ kɔ́ɔsi, áa í míli kó, sa nzawa kɔ́ɔnnɔn, sú ní tée, né mán á bɛ́ ládhye o lábhyaa kée ngée, óni wáati lɔ́lu yɛ́ɛ lɔ, ni ɲánjiman ne.

32 Kwáalenin, ní á kɛ́ɛfala Ala la, óni a yɛ nɛ́nmɛn o kóman o la. Ale lée sé kɛ́ a bháaka o bwóɲan lánanya o lɔ; óni Ala é láheli mín ndá, mɔɔn mínnu a tá le, a yáa o dí olu mán. 33 Né man ɲán bhɔ́ mɔɔn sí tá wɛ́ɛ fɛ, wáman mɔɔn lɔ ta sɛ́ɛn nvɛ́, wáman mɔɔn lɔ ta fáanin fɛ. 34 A gbúlu a lɔ́ ŋóo né gbú bhóo lée bháala kɛ́, kɛ ne ni ndáamanɲɔɔn olu bɛ́ manko o ɲan. 35 Án ngákan kɛ bháala o kɛ ɲán mín man, kɛ dɛ́sɛbhaatɔ olu dhyɛman, tó kɛ án mili Mantii Ɛnza ɲɛn kóman olu mán, né wɛɛ o yáa a lá, ɲán o bɛ́ man, Ɛnza ngbú é fɔ́ ko: ‹ní í kɛ́ kɛ a díla, nisɔdhyaa é o lɔ kɛ tinmin ní i kɛ kɛ́ íle sɔ́la.› »

36 Pɔli é o kóman o fɔ́ kɛ́wɛɛ mínngɛ, aa i kúnmɛɛn ngɛ luu lɔ, kɛ Ala dɛ́li ni lánanbhaa olu bɛ́ le. 37 Lánanbhaa olu bɛ́ɛ kásikɛ; ii í fínin a man faan la. 38 Pɔli é fɔ́ mínngɛ ko mɔɔn sí ɲán táala ale ká mée, o kóman óo i yóso kasi gbútuukɛ. O kwɔ́, ii táa Pɔli bhyáashaa fɔ́ kúun ná o la.