Kɛ́wɛɛ 5

Ananiyasi ni Safila

Wáa cɛ lɔ, a tɔ́ɔ kó Ananiyasi. Ále ní a muso Safila é i yɛ sɛ́ɛn o féle, 2 ále ní a muso é bhyɛ́ a lɔ, Ananiyasi é wɛ́ɛ o lɔ bhɔ́ a lá, o kwɔ́ áa táa wɛ́ɛ o tɔ́ ó kwaan céladhye ŋólu yɛ.

3 Áa wɛɛ wɛ́ɛ o kwáanla mínngɛ, Piyɛli é a manɲaankɛ kó: «Ananiyasi, mínnɛɛn le kósɔn Sɔtaannan wɛɛ ló i yóso o lɔ, kɛ́ wɛ́ɛ o lɔ bhɔ́ a lá, kɛ o lóonaankɛ, tó kɛ fwɔ́nɲan fɔ Ní Sɛnnɛnyanin ŋó yɛ? 4 Sɛ́ɛn ó tɛ́ɛ i tá lé mínngɛ, i tɛ́ɛ sé a féle ko o tóla yé? Yáanin íi féle mínngɛ, a wɛ́ɛ o tɛ́ tɛ i tá le á? Aa kɛ́ díi tó miliyayoo míin ŋé ló i yóso o lɔ? I mán fwɔ́nɲan fɔ́ mɔɔn ólu yɛ lɛ, íi fwɔ́nɲan fɔ́ Ala le yɛ.»

5 Ananiyasi é o kóman ó myɛ́n mínngɛ, áa i bé, kɛ́ saya kɛ́. Mɔɔn mínnuu o kóman ó myɛ́n, i bɛ́ bɛ́ é sháan kóyoongɛ. 6 Káwee ŋólu i wíi, kɛ́ Ananiyasi sú o tá kɛ a kasange, kɛ́ táa a sú ló.

7 Lɛ́ɛlɛ sawa siya tínminnin ŋó kwɔ́, a muso é ló, wáa kó mín ndɛ́ wɛɛ kɛ a tɛ́ mán o lɔ́. 8 Piyɛli é a manɲaankɛ kó: «Tínɲan o fɔ né ɲɛn, áa sɛ́ɛn o féle o wɛ́ɛ o le lá a? Muso óo a yawi ko ɔ́ɔn, a sɔɔn o lée wé.»

9 O lɔ́ Piyɛli é fɔ a yɛ kó: «Mínnɛɛn kósɔn áa bhyɛ́ a mán kɛ Mantii o Ní o lákɔɔbhɔ? Nɔ́myɛn, mɔɔn mínnu í cɛ sú ló, olu lɔ́nin ŋé lá o la, i yáa táa ní íle lé íkwɔ.»

10 O ywáaninngee ŋo lɔ, muso o í bé Piyɛli sé ngɔ́ɔ, tó kɛ sayakɛ. Káwee ŋólu ló, ii táa sɔɔ ké a wɛɛ sayakɛ. Ii a sú o tá kɛ táa a sú ló a cɛ kábulu o tɔ́ɔfɛ. 11 Sháanɲan bá é lo Kílisi yɛ mɔɔn olu lɔ, óni mɔɔn mínnu é o kó olu myɛ́n.

Káwananngo gbɔ́gbɔ

12 Tɔɔmanse ní káwananngo shɛ́ɛman ndɛ́ɛ kɛ́la mɔɔn olu cɛ́man céladhye ŋólu bhóo. I bɛ́ tɛ́ɛ ɲɔ́ɔn nádhyɛla mansa Swɛmannan yɛ gbá o kɔ́ɔ. 13 Mɔɔn tɔ ólu cɛ́man, mɔɔn sí mán i yóso lágbɛya kɛ dhyɛ́ ní ile. Wáa yaman o tɛ́ɛ í tanola. 14 Mɔɔn olu tɛ́ɛ lála Mantii o la, cɛ ní muso shɛ́ɛman ndɛ́ɛ fálala lánanbhaa ólu ka. 15 Mɔɔn olu lákoɲan o man i la, i tɛ́ɛ nánla ni yangalotɔ olu le sháa olu la, kɛ́ i lála naan ŋólu ní gbasa olu ka, ke ní Piyɛli kɛ kɛ́ tínminnan, ké a yáa o á sé o mɔɔn o lɔ́lu mán. 16 Mɔɔn shɛ́ɛman ŋé bhɔ́ Yeluzalɛmu tɔ́ɔfɛ só ólu lá, kɛ́nan ni í yɛ́ yangalotɔ ólu le, óni jínanndɔ ólu, i bɛ́ lo ŋé kɛ́ɛnya.

Céladhye ŋólu yɛ́ kasola táa o

17 O lɔ, faanlɛɛɲansebhaa olu kúnndiiba o, óni mɔɔn óo mɔɔn tɛ́ɛ ni ale, o kɔ́ɔ o tɔ́ɔ kó: Sadusi olu, ɲánngbo le tɛ́ɛ ile koyoongɛ, ii a la gbéya i la. 18 Ii céladhye ŋólu myaan kɛ i bhyáa kasola. 19 Wáa sú o lɔ́, Mantii o yɛ malɛɛka o nán kasobho ŋó lá olu lála ká, kɛ́ i lábhɔ, tó kɛ fɔ́ i yɛ́ kó: 20 «Áa táa Ala bhatobhomba ó kɔ́ɔnnɔn, kɛ́ táa o ɲáanmanɲan kóman o bɛ́ fɔ mɔɔn olu yɛ.»

21 Íi o kóman o myɛ́n mínngɛ, sɔ́ɔ jónan ó mán, íi táa Ala bhatobhomba ó lá kɛ́ a lámyaan kɛ mɔɔn ólu kála.

Ó wáati ó lɔ, Faanlɛɛɲansebhaa olu kúnndiiba óni a mɔɔn óo mɔɔn tɛ́ɛ ni ale, olu nán, íi kítitɛɛbhaa olu ní Izalayɛli cɛba olu bɛ́ kíi óni kɛ mɔɔn bhyáa kɛ táa céladhye ŋólu kólɔ kaso o la. 22 Wáa swáasi ólu sé mínngɛ, i mán céladhye ŋólu sɔ́ɔ kasobho ŋó kɔ́ɔnnɔn. Ii i kwɔ́sɛɛ kɛ́ táa ó ɲán fɔ́ kó: 23 «Án ní táa sɔɔ ké kasobho ŋó lá olu sɔ́ɔnin ŋé cɛ́ɛne, óni lá olu kúnnansiibhaa ólu tɛ́ɛ lá olu la, wáa án ní lá olu láka mínngɛ, án mán táa mɔɔn sí sɔɔ kasobho bhó ŋó kɔ́ɔnnɔn.»

24 Ala bhatobhomba ó kúnnansiibhaa ólu kúnndii o, óni Faanlɛɛɲansebhaa ólu kúnndiiba ólu, o kóman o myɛ́n mínngɛ, i kɔ́ɔnnɔn é fíi koyoongɛ, íi ɲɔ́ɔn manɲaankɛla kó: Mínnɛɛn le wɛɛ kɛ. 25 Wáa mɔɔn lɔ́ é nan fɔ́ i yɛ́ kó: «Áa mɔɔn mínnu bhyáa kasola, ii Ala bhatobhomba ó kɔ́ɔnnɔn, ii yaman ó kála nán.»

26 Óo kɛ mínngɛ, swáasi ólu kúnndii ó táa ní swáasi ó lɔ́lu le, kɛ́ táa céladhye ŋólu kólɔ, i mán fáan lá i ká, kɛ mansɔɔ i tɛ́ɛ sháannan kó yaman ó kɛ́nan i bwó káwa la.

27 Ii nán ni ile mínngɛ, ii i lálɔ kítitɛɛbhaa ólu cɛ́man. Faanlɛɛɲansebhaa olu kúnndiiba óo i manɲaankɛ ko: 28 «Án ndɛ́ wɛɛ án nzɛ́ɛmansɔɔ a yɛ kɔɔ lɛ, kó á kɛ́nan mɔɔn ólu kála o tɔ́ɔ o la bhée nɛ? Wáa, álee wɛ́ɛ Yeluzalɛmu lafa ní a yɛ kaa ŋólu le, á lée fɛ́ ké cɛ míin nváa o kún ŋó a lo án née lɔ a!»

29 Wáa Piyɛli ní céladhye ŋó tɔ́ ólu i yawi kó: «Dhyáalagboya lée ké án ni Ala kán ó myaan kɛ́ mɔɔn ólu tá ó tó yé. 30 Ale, a wɛɛ Ɛnza mín dhyɛ yíi o mán, tó kɛ a ngbáan, kɛ a fáa, án myɛ́manlu yɛ Ala o wɛ́ɛ a lákuun, 31 Ala wɛ́ɛ a kɔɔta a yɛ sébhaaya o lɔ kɛ a kɛ́ kunndiiba le, óni Kísibhaa le, aa o dí ké Izalayɛlika ŋólu á i yóo o yɛ́ɛman, kɛ i yɛ yúumu olu lábe. 32 Án né léelu wɛ́ɛ kɛ́ o kó olu sɛ́ɛya le, óni Ní Sɛnnɛnyanin ŋo. Mínnu wɛ́ɛ dhyɛn Ala kómankan ŋo man, Ala wɛ́ɛ o Ní Sɛnnɛnyanin ŋó dí olu mán.»

33 Kítitɛɛbhaa olu o kóman o myɛ́n mínngɛ, íi mwɛ́nnɛn i tɛ́ɛfɛ kɛ́ í fáa. 34 Wáa Falizɛn nɔ́ tɛ́ɛ yé, a tɔ́ɔ kó Gamaliyɛli, Sɛ́liya kaamɔɔn lé tɛ́ɛ o le, yaman o bɛ́ tɛ́ɛ a bwóɲanla, óo i wíi kɛ́ i lɔ kítitɛɛbhaa ólu cɛ́man, kɛ fɔ́ kó, céladhye ŋólu á bhɔ́ kɛ́ɛnman ó tún. 35 O kwɔ́ áa fɔ́ kó: «Álee Izalayɛlika ólu, a káa kó mín ngɛ mɔɔn míinnu la, áa á yɛ́ɛkɔɔsi o lɔ cɛ́ɛ né! 36 A mánmyɛn bhá, án ni cɛ lɔ yé o tɔ́ɔ kó Tedasi. A kó álee mɔɔn kúugbɛɛ né, mɔɔn kɛ́nmɛn náannin siya tɛ́wɛɛ bhyáa a kwɔ́. Wáa mɔɔn olu a fáa, a yɛ mɔɔn ólu ɲɛ́nnzɛn, fósi man myɛ́n i kwɔshaafɛ bhée. 37 O kwɔ́, Galileka cɛ lɔ é wíi o kwɔ́, a tɔ́ɔ kó Zudasi, oo kɛ tɔ́ɔsɛwɛ wáati o le lɔ. Oo kɛ́ mínngɛ, mɔɔn shɛ́ɛman ŋé bhyáa ale kwɔ́. Wáa o wɛ́ɛ fáa, óni mɔɔn óo mɔɔn tɛ́ wɛɛ bhyaa ale kwɔ́ o bɛ́ wɛ́ɛ ɲɛ́nnzɛn. 38 Kwáalenin, ní fɔla á yɛ́, á kɛ́nan lɔ́ kɛ mɔɔn míinnu kúnngo o lɔ, áa i tó yé ké ii táa. Ni i yɛ kɛ́wɛɛ óni i yɛ miliya olu kɛ kɛ́ bhɔ́la mɔɔn olu lɔ, o yáa túun. 39 Wáa ní o kɛ kɛ́ bhɔ́la Ala lɔ, á táa sé kɛ o mɔɔn olu látuun. Áa á yɛ́ɛ myaan ké á kɛ́nan kɛ́ Ala yuu lu le.»

Ii sɔ́n Gamaliyɛli yɛ kóman o mán. 40 Ii céladhye ŋólu kíi kɛ́ i mangbasi, kɛ́ i sɛ́ɛmansɔɔ i yɛ kó i kɛ́nan kóman Ɛnza ndɔ́ɔ la bhée. O kwɔ́ ii i bhyáa kɛ táa. 41 Céladhye ŋólu nísɔdhyaanin ŋé bhɔ́ kítitɛɛlaa o lɔ, kɛ mansɔɔ, ii tɔ́lɔya myáan Ɛnza ndɔ́ɔ o kósɔn, o lé tɛ́ɛ yáala kó Ala wɛ́ɛ i yacesii gbútuukɛ, i tɛ́ɛ fɔla i yɛ́ɛ man ko i wɛ́ɛ tɔ́lɔya min myáan Ɛnza ndɔ́ɔ ó kósɔn, Ala wɛɛ i bwóɲan. 42 Ló ŋóo ló, i tɛ́ɛ Ala bhatobhomba óni bhó ólu kɔ́ɔnnɔn. I tɛ́ɛ tóla kɛ mɔɔn olu kala óni kɛ Sanmankanmɛɛ o láse, kó Kílisi o lée Ɛnza ne.