Matiyu 28

Ɛnza ŋwɛ́ɛn kúun kɛ bhɔ́ saya o bhóo o man

Maki 16.1-10; Luka 24.1-12; Yaya 20.1-10

Lɔnwɛɛnlilo ŋó o bhɔ́ í lá mínngɛ, Mwɛnyamu Magidalaka óni Mwɛnyamu dɔ́ mín ŋoo nan kábulu o mánfɛɛ kookɔɔ lo ŋo sɔ́ɔ jónan ó mán. 2 Íkɔlɔ téeman, lúukolo óo yáayaa fáan la, Mantii o yɛ́ malɛɛka lɔ é bhɔ́ sá ŋó lɔ kɛ́nan káwagbuba ó gínninman kɛ a bhɔ́ kábulu o lála tó kɛ í síi ale káwagbuba ó ka. 3 Malɛɛka o mannan mannan ne tɛ́ɛ bhɔ́la óyoo sá ŋé í bhóo lábhɔla. Faani gbɛ pépe lé tɛ́ɛ ale malɛɛka o mán. 4 Mɔɔn mínnu tɛ́ɛ kábulu o kúnnan o lɔ, olu mán é sháan gbúnigbukɛ, ii yáayaa kɛ kilo fɔ́ kɛ kɛ́ óo mɔɔn wɛ́ɛ sayakɛ.

5 Malɛɛka oo fɔ muso ólu yɛ kó: «Ále kɛ́nan sháan! Ní lɔ ŋóo áa Ɛnza ne ywáaɲiinnan, ii mín gbáan yíi ó mán. 6 A tɛ yánun, a wɛɛ kúun kɛ bhɔ́ saya o lɔ, óyoo a tɛ wɛɛ fɔ kó a káa kɛ́ tɛ́nmɛn njɔ́. Á lanin ndɛ́ɛ ywáa ó mínnɔn áa nan o mánfɛɛ. 7 Áa í láteeya kɛ táa o fɔ a yɛ kaamɔɔndhye ŋólu yɛ kó a wɛɛ kúun kɛ bhɔ́ saya o lɔ, kɛ bhyáa i ɲɛn nzɔ́ kɛ táa Galile langa ŋo lɔ, i káa tɛ́ɛ a yé yénɔn lé. Ndɛ́wɛɛ nan o lé fɔ́ a yɛ́.»

8 Muso ólu í láteeya kɛ bhɔ́ kábuluywaa o lɔ kɛ táa i sháannin ŋó le, o kwɔ, i nisɔdhyaanin ndɛ́ɛ gbúnigbu kɛ́ íkwɔ. Ii bwée kɛ táa sánmankan ŋo fɔ́ Ɛnza ɲɛn kaamɔɔndhye ŋolu ɲánla. 9 Muso ólu táatɔ óle, Ɛnza ŋé i kunmyɛ téeman tó kɛ i fo. Muso ólu í mángbaa a lá kɛ í kúnmɛɛn ngbáan lúu lɔ tó kɛ a se nvyáa ó myáan. 10 Ɛnza ŋé fɔ i yɛ kó: «A kɛ́nan sháan! Áa táa fɔ Mádhye ólu yɛ ko ii táa Galile langa ŋo lɔ, kó i káa ɲé yénɔn lé.»

Faanlɛɛɲansebhaa olu kúnndii// ólu fɛ́ kɛ Ɛnza nguunngo o manloonaan kɛ

11 Muso ólu yɛ́ɛ tɛ́ɛ sháa lá bhée, tó swaasi mínnu tɛ́ɛ kábulu o kunnan o lɔ́lu í kwɔ́sɛɛ só ó kɔ́ɔnnɔn kɛ o kó ó bɛ́ lɔsɔɔ faanlɛɛɲansebhaa olu kúnndii ólu yɛ. 12 Faanlɛɛɲansebhaa olu kúnndii ólu ní cɛba ólu ɲɔ́ɔnɲe kɛ tó kɛ bhyɛ kée mán kɛ longa ngɛ́ swaasi olu ka ni wɛ́ɛ lágbɛɛn ndí lé olu mán, 13 tó kɛ fɔ olu yɛ́ tá kó: «Áa fɔ kó Ɛnza ɲɛn kaamɔɔndhye ŋo lée lúu táa a su ó tá loo nɔ́n sú o lɔ ké án ni sunnɔɔn lɔ. 14 Ni kunndiiba ó kɛ́ táa myɛ́n kó su ó tɛ́ kábulu o lɔ́ bhée, án ɲáan kó ó bɛ́ kɛ ké a kɛ́nan kunngo sɔ́ɔ.» 15 Swaasi olu wɛ́ɛ o tá tó mɔɔn ólu fɔ i yɛ tɛ́nmɛn, ii kɛ cé. Kɛ ta o sán o mán kɛ́nan sii míin nan, o kóman óo búubɛɛ Yawudhyaa olu cɛ́man.

Ɛnza ŋé a yɛ kaamɔɔndhye ŋolu lɔ́la céla

Maki 16.14-18; Luka 24.36-49; Yaya 20.19-23

16 Kaamɔɔndhye ndɔ tá ni kée ŋolu táa Galile langa ŋo lɔ, Ɛnza ndɛ́wɛɛ tii mín ndɔɔmansii i yɛ, ii táa o ka. 17 Ii Ɛnza ɲé mínngɛ, ii í kúnmɛɛn ngbáan lúu lɔ a yɛ, wáa síka tɛ́ɛ i lɔ́lu yóso lɔ́ bhée. 18 Ɛnza ŋé í mángbaa i la kɛ fɔ kó: «Sébhaaya ó bɛ́ wɛɛ dí né mán sá ŋó lɔ óni lúukolo ó ka. 19 Oo lɔ mínngɛ, síya súu óo súu é dínɲan lɔ, áa táa o bɛ́ fɛ́ yé ké ii kɛ́ ɲɛ́n kaamɔɔndhye nu le, áa i bátize Fá ó tɔ́ɔla, Dhyénjɛ ó tɔ́ɔla, óni Ní Sɛnnɛnyanin ŋó tɔ́ɔla, 20 ŋwɛ́ɛn kó óo kó láse a mán wé, áa i kála o bɛ́ la ké ii o bɛ́ sháa lataaman. Né kwɛ́ɛn nin ŋé a fɛ lé wé ló ŋóo ló, sánnin dínɲan lábha ŋó cɛ.»