Yunus 3

Pengkatobaranna to-Niniwe

3:1-10

Mangkada pole' omi PUANG Allataala mangpenduanna lako Nabi Yunus 2 nakua, “Ta'pa maleko lako kota lompo Niniwe, mupauanni to tau jio to parenta mangka Kupauanko.” 3 Napesa'dingngimi Nabi Yunus to parenta-Na PUANG Allataala namale lako kota Niniwe. Gaja luah joo kota Niniwe, sitallung allo nalingkai tau, namane' ndete'i to cappa'na.

4 Mentamami kota Nabi Yunus. Ia tonna sangngallomo lumingka mane'ri mparatui to parenta-Na Puang Allataala mpeandongngi gamaranna nakua, “Patangpulomora allona na la disolangan tee kota Niniwe.” 5 Ia tonna sa'dingmi to-Niniwe joo pepasan-Na Puang Allataala napangpeissenan Nabi Yunus, memmatappa'mi lako Puang Allataala nakua, “La puasaki'.” Na ia ngasan tau, la tomatua la pea biccu', mpake pakean karung mpangpekitanni kumua mpenassannimi dosana.

6 Ia tonna sa'dingmi Raja Niniwe joo pepasan napangpeissenan Nabi Yunus, ta'pa mellaomi jao mai caddokoan mala'bihna, nalossokanni to baju landona napake pakean karung, nacumadokko jiong au. 7 Napangparentanmi raja lako wakkele'na napangpeissenanni tee parenta lan lili'na kota Niniwe kumua, “Sininna tau te'da nawa'ding kumande ba'tu mangngiso'. Na ia to patuoan susinna sapin sola bembala' na patuoan laenna te'da nawa'ding dipakande iarika dipaiso'. 8 Sininna tau la mangpakean karung, na ia to patuoan la ditore'. La massambang tonganni to tau lako Puang Allataala nampemeloi sipa'na to liwa' gaja' namengkatoba'. 9 Dennaa upa' na te'damo namabirih Puang Allataala nasullei akkattana anna danggi' tamasolang.”

10 Ia tonna kitami Puang Allataala to pengkatobaranna to-Niniwe kumua mpatorro tonganmi panggaukan gaja'na, ssulleimi akkatta-Na nate'da pole' najaji ssessai to to-Niniwe.