Puang Allataala manda to sipatoꞌ dipakalaꞌbih
135
Halleluya!aPakalaꞌbih-Hi Puang Allataala!
Ee kamuꞌ sininna pangjama-Na Puang Allataala,
pakalaꞌbihhi sangan-Na,
2 ee kamuꞌ to ratu mangjama jio Bola Puang Allataala,
jio tarampak Bola Puang Allataala,
3 pakalaꞌbih-Hi Puang Allataala, sabaꞌ melo penawan-Na.
Makkelong kamuꞌ mpuji Puang Allataala, sabaꞌ mamase-I.
4 Napileii to Yakub menjaji tau mesan-Na,
na to-Israel batiꞌna Yakub Napupenjaji ummaꞌ Napakamojaꞌ.
5 Nang kuissen kumua, liwaꞌ mawatang to Puang Allataala to tasompa,
laꞌbi makuasa na ia to sininna dewata.
6 Napugauk Puang Allataala sininna to Napueloh llan lino,
pamula jao mai langiꞌ, gantanan,
tasik ratu doꞌ garontoꞌna.
7 Jio mai randan langiꞌ Nanii mpatimbaꞌi to saleuꞌ,
Naparatui to uran naundi to palepaꞌ cumbiaꞌ.
Napupangngiriꞌi to angin llan mai ngenan to Napanianni.
8 Puang Allataala mpatei ngasan anak pamungahna to-Mesir,
la anak tolino, la anak patuoan.
9 Jio toomo tana Mesir, Nanii mpaden buda tanda mejangngaran,
iamo pangsessa lako rajana to-Mesir sola lako sininna pangjamana.
10 Buda bangsa Nalanynyaꞌi,
Napateii to raja simawatang,
11 iamo to Sihon rajana to-Amori na Og raja jio tana Basan
sola sininna raja jio tana Kanaan.
12 Naalai to padangna,
Nabenni lako to-Israel ummaꞌ-Na, napumanahhi.
13 Oo Puang Allataala, nang la tattaꞌ dipangpeissenan to sangan-Taꞌ,
natattaꞌ nningaran-Kiꞌ ummaꞌ-Taꞌ ratu lako batiꞌna,
14 sabaꞌ Kitaꞌ rraꞌtah maruruhhi to ummaꞌ-Taꞌ,
na Takamasei to sininna taun-Taꞌ.
15 b Ia to napudewata bangsa laen, bulawanra sola peraꞌ dikabuaꞌ,
na panggaraga tolinora.
16 Ketimu, apa teꞌda nasumu,
kemata, apa teꞌda napakita.
17 Ketalinga, apa teꞌda napasaꞌding,
na teꞌda nakepenawa.
18 La susi toomi joo to tongkabuaꞌi,
sola tongkatappaꞌii.
19 Ee to-Israel, pakalaꞌbih-Hi Puang Allataala,
Ee sininna imang batiꞌna Harun, pakalaꞌbih-Hi Puang Allataala!
20 Ee sininna batiꞌ to-Lewi, pakalaꞌbih-Hi Puang Allataala,
Ee sininna tongkalajaꞌ-ngkasiriꞌ Puang Allataala, pakalaꞌbih-Hi.
21 Dipakalaꞌbih to Puang Allataala to torro jao Sion,
jio kota Yerusalem.
Halleluya!