27
aDanggi' muborro ncurita joloi apa to la jaji masawa,nasaba' te'da muissenni apara la jaji to allo dioloi lako.
2 Danggi' na iko mpuji kalemu
ake'mo na tolaen to te'da musiissen.
3 Mabanda' to batu sola kassi',
apa la'bih mabanda'pa to mapa'dik penawa napubua' tomatojo.
4 Ia to kamabirisan mpaden kamaparrangan,
na kamagallian mpaden kamasolangan,
apa ia to mangngimburu la'bih maparrangpa.
Indara wa'ding nnoloi?
5 La'bi melo to matarruh mpauan salana tau,
na ia to pangpakamoja' tangdipapajan.
6 Moi napa'dikkiki' soba'ta',
apa melo pattujunna,
na moi takkaliwa' pangngambena to ewalinta',
apa gaja' pattujunna.
7 Ia ke barahmi to tau,
moi canik te'damo namadoang llepa'i.
Ia ke tangbarahhi,
moi apa mapai', memmacanningmi narasa.
8 Ia to topalai jio mai bolana,
susii manuk-manuk ssalai serangna.
9 Masannangki' nnudukki to minynya'-minynya' busarungngu' ba'tu minynya' pandere',
apa la'bih mepamasannang to kalantukan penawanna soba'ta' mepakainga'.
10 Danggi' mukalupaii to soba'mu, sola soba'na ambe'mu.
Danggi'mo mumale lako bolana sile'tomu to mabela ke masussako.
La'bih den bua'na ke male lakoko bali bolamu.
11 Ee anakku', maccako, kupumasannangngi,
kuwa'ding mpebalii to tau ke nacaccana'.
12 Ia to tomelo akkalanna mpessalai ke denni abala' nakita,
apa ia to totangmapahangpa, tarruh bangngi arannai macilaka.
13 Inda-inda to mpangngakui la mbajaran indanna tomentoratu llan kampong,
sipato' diala to ewananna napuboro'.
14 Inda-inda to melambik unapa nametamba-tambamo mangbere sallang lako bali bolana,
nasangari ditangdoii.
15 Ia to baine kemuanemo na passipuran,
susii oni wai uran to'do do' tarampak.
16 Te'da dikulle mpapajai massipura,
susi angin tangdikulle mpapajai mangngiri',
ba'tu susii minynyak to tangdiissen ngka'panni.
17 Susi piso dipasisangeh la memmataran,
susi toomi to tolino melajah macca jio mai soba'na.
18 Inda-inda mparakai tanananna, la napebuai to assele'na,
susi toomi inda-inda njampang melo puangna la diangga'.
19 Susi wai munii ngkita lindomu,
susi toomi sipa'mu dinii ngkita issi penawammu.
20 Ia to lino tomate na kamasolangan te'da pajana nnamma' tau,
susi toomi to tolino te'da pajana to nakadoangngi.
21 Ia to pera' ba'tu bulawan ke dipamonynyokki api, la dinii nnujii kumua massangraka,
susi toomi to tau ke dipujii, la dinii nnissen sipa'na.
22 Moi umbo dikua mpekajui to tomatojo, susi pare ditu'tuk pealu llan issong,
te'da ia nalata'de kamatojoanna.
23 Parakai meloi to bekemu sola bembala'mu,
parinawa meloi to patuoanmu,
24 nasaba' te'da na la den tarruh to ewanan,
moi kakuasan mangparenta nang la den too anggena.
25 Ia ke mangkai musaetan patuoanmu to reu jio padang sola jao buntu,
namukkun mengkacocok to reu pira',
26 iamo na tuli den bembala' malolle'mu to la muala bulunna mukabua' pakean,
na den bekemu muane mubaluk muallian padang,
27 na ia to indo bekemu pira' muandu' naganna' to dadikkina muiso' sola repokkomu
na ketawa too to pangjamamu baine.