19
La'biranmo tokaasi-asi apa maruruh penawa,na ia to tobattuk na majekkong.
2 Moi marajinki' te'da namelo ke te'dai kapaissenanta'.
Ia to tosepah pembuda sala ke denni apa napugauk.
3 Kabangosanna tolino mparugi kalena,
na kannora Puang Allataala nakagalli.
4 Ia to tosugih sabuda-budanna soba'na,
apa ia to tokaasi-asi kannori nasalai soba'na.
5 Ia to tosa'bi tangtongan jio pangra'tasan kara-kara,
te'da nalala'pah jio mai pangsessa,
na ia to tompau kada tangtongan,
nang la disessa.
6 Buda tau madoang bang nnala attana tomamase,
na pada madoang sisoba' tomalaboh.
7 Ia to tokaasi-asi te'da naangga'i sile'tona,
ia pissenraka to soba'na nalamadoang ssibawanni.
Undii metamba-tamba meta'da tulung
apa nasalai bangngi soba'na.
8 Inda-inda mpengkulle-kullei nnangah kamaccan ngkamasei kalena,
na inda-inda to mpangngattai kamapahangan la masannang.
9 Ia to tosa'bi tangtongan jio pangra'tasan kara-kara,
te'da nalala'pah jio mai pangsessa,
na ia to tompau kada tangtongan,
nang la dilanynya'i.
10 Te'da nasipato' manyaman katuoanna to tobattuk,
apa pole'raka ke kaunan mparenta puangna.
11 Pangpikkirisan melo mpasabbara' tau,
na dipuji to tau, nasaba' te'da napallan penawai to kasalan napugauk tau lako kalena.
12 Ia ke magallii raja susii singa mburrung,
apa ia ke masannangngi susi ambun ncakka'i tananan.
13 Ia to pea battuk mparatuan cilaka ambe'na.
Ia to baine kemuanemo napassipuran,
susii to wai to'do-to'do jio mai dea lo'po' mekani-kanian.
14 Ia to bola sola ewanan iamo manah jio mai tomatuanta',
apa ia to baine to melo pangpikkirisanna,
iamo barakka' jio mai Puang Allataala lako muanena.
15 Ia to kamakuttuan mpamaroja bang tau,
na ia to tomemmen la maparri' tangbarah.
16 Ia to tonturu' parenta mparakai sunga'na,
apa ia to totangnnangga' kadan-Na Puang Allataala la napumate.
17 Ia ke ngkamaseiki' tokaasi-asi, butung to mangpeindan lako Puang Allataala,
na Puang Allataala Ia la mpabalahhi joo panggaukanta'.
18 Pekajui to anakkamu,
ke murannuanpi la melo,
apa ia ke mupupangelohnai,
battuanna mueloranni masolang.
19 Ake' na ia to tomadoi' bang mabirih mperasai assele' kamabirisanna,
nasaba' ia ke ditulungngi, kannori samabirih-birihna.
20 Pesa'dingngii to pangpakainga' mutarimai to pangpangngajah,
dikua mumemmacca dau.
21 Buda to naakkattai tolino,
apa akkatta-Na Ia Puang Allataala to jaji.
22 Ia to sipa' dirannuan jio mesa' tau, iamo to dikatappa'i.
La'biranmo kaasi-asi, na ia to mangnguraga.
23 Ngkalaja' ngkasiri' Puang Allataala, iamo mpamanyaman katuoanmu,
mpamanyaman mamma'mu, musalama' jio mai abala'.
24 Ia to totakkaliwa' makuttu,
moi jiomo olona to kande, apa makuttu toopa ntimbu'i.
25 Ia ke musessai to topacapa',
la menjaji pangngajaran lako totangmapahangpa, namemmacca.
Ia ke mupauanni salana to tomapahang,
la natarima kumua salai.
26 Ia to anak ssessa ba'tu nnula'i tomatuanna,
iamo anak mangpakasiri' na dicacca.
27 Ee anakku', apara bua'mu mupesa'dingngi pangpangngajah,
ke nang la mupaboko'i unai penawa to kada mbenko kapaissenan!
28 Ia to sa'bi tangtongan, battuananna ncapa' atoran.
Napumasannang to togaja' sipa'na ke ncilakaii tau.
29 Sadia to pangsessa lako topacapa'
na perambi lako kamala'na tobattuk.