Boas sibali Rut
4:1-12
4
Malei Boas lako ngenan kasitammuan jio babangan kota. Te'dapa namasain Boas cumadokko jio, naliu to mesa' muane to sampu mandoppi'na tomate Elimelekh to nasanga Boas to la dipabarakkanni la mangjampang, natambaii nakua, “Ee mane, leppangko mai tacumadokko-dokko.” Leppangmi joo tau, nacumadokko sola. 2 Namane' ntambaii Boas to sangpulo ambe' kampong nacumadokko sola. 3 Mangkadami Boas lako joo sampunna nakua, “Polemi Naomi jio mai tana Moab. Madoangngi mbalukki to padangna Elimelekh sampunta'. 4 Na kusanga ikora to parallu nnissenni joo. Ia ke la muallii, paui jio olona to ambe' kampong sola tau laen to cumadokko inde'. Ia ke te'dai, paui to manassana, nasaba' kita' mandara sola dua to wa'ding la lla'bakki, iko jolo', na ia ke cia'ko mane' aku'.” Nakuamo sampunna, “Io, la kula'bak.” 5 Nakuamo Boas, “Melomi ke susii tuu. Apa ia ammuallii joo padang jio mai Naomi, la sibalipoko Rut joo to-Moab pura balinna tomate anakkana Naomi. Nasaba' ia joo padang nang la da'tan bangpi la menjaji manah bati'na joo tomate.” 6 Mebalii joo to la mangla'bak nakua, “Ia ke susii tuu tangkukulle aku' la lla'bakki joo padang, nasaba' la nagaja'i to manahna bati'ku'. Jaji ia tee too kusorongngi mati' kaleta' kumua kita'mo lla'bakki to sitonganna aku' la lla'bakki.”7 Den kabiasanna to-Israel tonna anu', ia ke denni tau la mangla'bak iaraka mangpasitongka, ia to la mpaassahhi joo kara-kara, sala mesa'nai nnalai sangbali sandala'na nabenni lako tau mesa'na.
8 Mangkadami to sampunna Boas nakua, “Kita' bangmo lla'bakki,” namane' nnalai sangbali to sandala'na, nabenni Boas. 9 Mangkadai Boas lako to ambe' kampong sola lako tau laen to cumadokko jio nakua, “Kita'mo sola ngasan kuala sa'bi too kumua ia to sininna ewananna Elimelekh sola ewananna Kilyon na Mahlon kualli ngasanmo jio mai Naomi. 10 Nate'da na ia manda joo, apa ia to Rut baine to-Moab pura balinna tomate Mahlon, la kuala tooi menjaji balingku'. Susipi joo na ia tee padang la tatta' napumanah bati'na tomate Mahlon. Na tatta' den to sangannaa, lan pangrapuan sola lan kampong. Na kita' sola ngasan kuala sa'bi too.” 11 Mangkadai to ambe' kampong sola to tau laen cumadokko jio nakua, “Iye', kami' ngasanmo menjaji sa'bi. Dennaa upa' na PUANG Allataala mpupenjajii to balimmu susi Rahel sola Lea, to mpajajianni buda anak to Yakub. Dennaa upa' musugih lan alla'na to-Efrata na mukaissenan jio kota Betlehem. 12 Dennaa upa' na ia to anak la Nabenko PUANG Allataala sola tee baine malolle'pa la mpupenjaji buda bati'mu susi Peres anakkana Yehuda sola Tamar buda bati'na.”b
Boas sola bati'na
4:13-22
13 Sibalimi Boas sola Rut. Nabarakka'ii PUANG Allataala to Rut nakeba'tang na njajian mesa' pea muane. 14 Ia to baine bali bolana Naomi jio kota Betlehem mangkada nakua, “Mangsukkuru'ki' sola ngasan lako PUANG Allataala. Mangkamoko Naben mesa' ampo pea muane tee allo la njampangko. Dennaa upa' na ia joo pea la kaissenan inde' tana Israel. 15 Iamo la mpamasumanga'ko. Ia toomo la njampangko ke matuamoko. Nasaba' anak manintummu to gaja mpakamoja'ko njajianni. La'bih keangga' joo manintummu na ia ke la denni anakkamu pitu muane.” 16 Naalami Naomi joo ampona najampangngi na liwa' napakamoja'.
17 Ia to baine bali bolana nasangai joo pea Obed. Pada mangkadami nakua, “Nnampuimi Naomi mesa' anak muane.” Iamo tee Obed ambe'na Isai na Isai iamo ambe'na Raja Daud.
18 Na iamo tee to pamulanna nenena Raja Daud, mangpamula jio mai Peres:
Peres njajian Hezron,
19 Hezron njajian Ram,
Ram njajian Aminadab,
20 Aminadab njajian Nahason.
Nahason njajian Salmon,
21 Salmon njajian Boas,
Boas njajian Obed,
22 Obed njajian Isai,
na Isai njajian Raja Daud.