Boas sola Rut jio to' pangtambakan jelai
3:1-18
3
Ba'tu pirang allo mangkanna joo mangkadai Naomi lako Rut nakua, “Ee anakku', mbai melo ke kuangaran pole'ko to wa'ding la musibalian, mumanyaman. 2 Mangjamamoko sola to baine jio bara'bahna Boas, le'? Ia joo Boas, sangjajianta' una. Jaji pesa'dingngina'! Ia tee bongi la malei ngkita tomanta'pih jelainna jio to' pangtambakan jelai. 3 Menjio'moko tee too, mumpake minynya'-minynya', mupake tooi to pakeanmu to melona, mumane' male lako to' pangtambakan jelai, sanga jioi to Boas. Tajanni ratu lako mangkanna kumande sola mangngiso', apa danggi' naissenni kumua jioko. 4 Kitai umbo nanii male mamma'. Ianna leppengmo, malemoko lako, angka'i ci'di' to pennammu'na, mumane' mamma' jio to' ajena. Iamo joo wattu la nanii mpauanko to apa la mupugauk.” 5 Mebalii Rut nakua, “Io indo', la kupugauk ngasan to apa tapauanna'.”6 Jaji malemi Rut lako to' pangtambakan jelai. Jiomi ntuu jio nanii mpugauk ngasanni to apa napauanni indo matuanna. 7 Ia tonna mangkamo Boas kumande sola mangngiso', masannangmi penawanna. Malemi mamma' jio to' siandah jelai ditombon. Napaela'-ela'i Rut mpendepe'i, naangka'i ci'di' to pennammu'na Boas, namamma' jio to' ajena.
8 Ia tonna tangngamo bongi, sabakanni Boas napana'ding, namembaliang nangkita mesa' baine mamma' siandah ajena. 9 Nakutanaii nakua, “Indara tee?” Mebalii Rut nakua, “Aku' Rut, puang. Sangjajian mandoppi' unapiki', tomate muaneku'. Ia ke wa'dingngi tapurepokna', sanga kita'mo to dipabarakkanni la njampangna'.” 10 Nakuamo Boas, “Ee anakku', dennaa upa' Nabarakka'iko PUANG Allataala! Ianna dipasikita to apa mangkamo mupugauk lako indo matuammu, manassa kumua ia tee panggaukanmu la'bih pajanpa to pangpakamoja'mu. Nasaba' wa'ding bangpoko nnangah tomalolle'pa la sugihna iarika kaasi-asinna, apa te'da mupugaukki joo. 11 Iamo joo danggi' mumalaja' Rut, la kupugauk ngasan to mupeta'danna, nasaba' sininna tau lan tee kota naissen ngasan kumua mesa'ko baine melo sipa'mu. 12 Tongan kumua sipato'na' dipabarakkanni la njampangko. Moi na susi joo denpa to la'bih sipato' dipabarakkanni la njampangko, nasaba' la'bih mandoppi' ia kasirapuanna lako tomate muanemu na aku'. 13 Torro bangmoko mangbongi inde' jolo'. Masawapa kukutanai joo rapungki' kumua madoangrika la dipabarakkanni la njampangko. Ianna madoang una, sukkuru'ki', apa ia ke cia'i, mpauna' sangan-Na PUANG Allataala to tuo kumua na aku'mora dipabarakkanni la njampangko. Mamma'moko jolo' ratu lako makale'.”
14 Jaji mamma'mi Rut jio siandah ajena Boas. Masawanna tonna subu unapa, mi'cokmi Rut dikua nadanggi' nakitai tau, nasaba' cia'i Boas ke naissenni tau kumua denni Rut jio to nanii Boas. 15 Mangkadami Boas lako Rut nakua, “Alaii tuu dodo muputa'dung, ballahhi ntee.” Naalaii joo dodo naballahhi. Natolloi Boas to jelai do' agi-agi duangpulo litere', napajujungngii to Rut. Mangkai joo too, malemi Boas lako kota.
16 Ratunna Rut lako bola, ta'pa nakutanaimi indo matuanna nakua, “Ee anakku', matumbami?” Nacurita ngasanni Rut to apa mangka napugauk Boas. 17 Nakuapa Rut, “Ia toopa mbenna' tee jelai duangpulo litere', nakua, ‘Te'da namelo ke pole lo'bangko lako indo matuammu.’ ” 18 Nakuamo Naomi, “Sabbara'ko anakku', nang la mukita apa to la jaji undinna. Te'da narapa' penawanna Boas ke te'dapi namangkaii tee allo to apa mangka napauanko.”