Yosua 22

Suku Israel to mangmanah jio kadellekan Sa'dan Yordan pole lako kampongna

Ia tonna mangkamo ditawan tana manah to to-Israel, natambaimi Yosua to suku Ruben, suku Gad, na sitangngana suku Manasye, to mangka diben tana manah jio kadellekanna Sa'dan Yordan, 2 nakuanni, “Mangkami mipugauk ngasan to nasuan kamu' Nabi Musa, tompangjaman PUANG Allataala, na mipugauk ngasan toomi to kusuan kamu'. 3 Ia tee wattu pura diolai ratu lako too allo, te'da mieloranni to sile'tomi mangngewa mesa. Apa mituru' tongan to Naparentan kamu' PUANG Allataala to tasompa. 4 Na ia too Nabenmi PUANG Allataala to tasompa kamanyamanan to sile'tomi, susi to mangka Nabasse. Iamo joo, wa'dingmo kamu' pole lako bolami jio tana manahmi, to mangka naben kamu' Nabi Musa, tompangjaman PUANG Allataala, jio kadellekanna Sa'dan Yordan. 5 Apa la mipallan penawa tongan to mpugauk parentana sola atoranna Nabi Musa, kumua: kamaseii to PUANG Allataala to tasompa, mituru'i to pakkaeloran-Na. Turu'i to parenta-Na, mida'tan menturu' lako Puang Allataala na la lantuk tongan penawammi mpangjaman-Ni.”

6-9 Nabarakka'imi Yosua namane' nneloranni male, apa napakainga'i jolo' kumua, “Sugihmo kamu', gaja budamo patuoanmi, bulawanmi, pera'mi, tambagami, bassimmi sola gaja budamo pakeanmi. Polemo kamu' mitawa rampa'i sola rapummi jio tana manahmi to ewanan mangka mirampa.” Mangkai joo too, ke'dehmi llan mai kota Silo llan tana Kanaan to suku Ruben, sola suku Gad, na sitangngana suku Manasye napole lako kampongna jio Gilead. Ia tee sitangngana suku Manasye mangpadang manahhi jio kadellekanna Sa'dan Yordan jio tana Basan to nabenni Musa. Na ia to sitangnganapa suku Manasye, nabenni Yosua tana manah llan kalambunanna Sa'dan Yordan siandah sile'tona.

Ngenan pangkaroban jio randan Sa'dan Yordan

10 Llan kalingkanna suku Ruben na suku Gad sola sitangngana suku Manasye pole lako tana manahna, nadete'mi to kota Gelilot kalambunanna unapa Sa'dan Yordan. Ngkabua'mi mesa' ngenan pangkaroban matonggo jio Gelilot siandah randan sa'dan. 11 Nasa'dingngi to-Israel to mangtana manah llan kalambunanna Sa'dan Yordan kumua, ia to suku Ruben, sola suku Gad, na sitangngana suku Manasye mangkai ngkabua' ngenan pangkaroban jio kota Gelilot llan kalambunanna Sa'dan Yordan jio tana Kanaan, tanana to-Israel. 12 Ia tonna sa'dingngi joo, sirempunmi sola ngasan jio kota Silo namangngatta la male rrarii suku to-Israel to mangpadang jio kadellekanna Sa'dan Yordan.

13 Nasuai to-Israel to Imang Pinehas, anakkana Imang Eleazer, male sipangkada to suku Ruben, sola suku Gad, na sitangngana suku Manasye, jio tana Gilead kadellekanna Sa'dan Yordan. 14 Den sangpulo tomatua-tua nasolan Imang Pinehas male, to pada kapala ngasan llan rapunna. Ia joo tau pada diala jio mai simesa'-mesa' suku to-Israel to mangpadang llan kalambunanna Sa'dan Yordan. 15 Ia tonna ratumo lako tana Gilead to nanii torro suku Ruben, suku Gad, na sitangngana suku Manasye, mangkadami Imang Pinehas sola tomatua-tua to-Israel nakua, 16 “Susi tee pepasanna sininna umma'-Na PUANG Allataala to torro llan kalambunanna Sa'dan Yordan. Nakua, ‘Ciapari mimangpanggaukan gaja' lako Allataala to nasompa to-Israel? Ciapari mipaboko'i penawa PUANG Allataala, mikabua' pole' ora ngenan pangkaroban? Nnewamo kamu' PUANG Allataala too allo! 17 Te'damoraka miingaranni to dosa tapugauk jio Buntu Peor? Moi na umma'-Naki', Naparatuanki' saki mematean. Na ratu lako too allo da'tanki' maparri' natumang dosata', milampugauk omo dosa! 18 Na ia too, la mipaboko'imiraka penawa to PUANG Allataala? Ia ke nnewa kamu' PUANG Allataala too allo, masawa Nakagalli ngasan omiki' tee kita' to-Israel. 19 Ia ke misanga carepai to kampongmi, misangai kumua te'da nasipato' minii ssompa Puang Allataala, mellele bangmo kamu' tama tana-Na PUANG Allataala to nanii Tenda-Na. Wa'ding kamu' nnalai pira' to padangki' minii torro, danggi'mo miewa PUANG Allataala, ba'tu danggi' miewakan mimpake'deh pole' mesa' ngenan pangkaroban, na miissen kumua denmo ngenan pangkaroban lako PUANG Allataala to tasompa. 20 Ingaranni to Akhan, bati'na Zerah, cia'i nturu' parenta-Na Puang Allataala, tonna te'da nalanynya'i ngasanni to ewanan disuanni llanynya'ii, na mikitamo buanna. Sininna to-Israel disessa! Akhan manda ia to mpugauk dosa, apa te'da na ia manda dipatei!’ ”

21 Mebalimi suku Ruben, na suku Gad sola sitangngana suku Manasye to torro jio kadellekanna Sa'dan Yordan nakua, 22 “PUANG Allataala Tomakuasa, to la'bih makuasa na sininna dewata, nnissenni tee kipugaukkuna. Naparallu too la miissen kumua ia ke denni pattujungki' nnewa Puang Allataala kipugaukki susi joo na te'damo kikatappa'i-I, ma'namo Nata'pa mpatei ngasankan too allo! 23 Nasessamorakan PUANG Allataala, ke denni pattujungki' la nnewa PUANG Allataala kikabua' ngenan pangkaroban laen, la kinii mpassompan karoba ditunu ba'tu mpangkaroban gandum, iarika karoba mangsukkuru' dipasalama'. 24 Te'da nasusi joo to pattujungki'! Iamo kikabua'i joo ngenan pangkaroban, sanga malaja'kan, iamo ke undinna dau namekutana to bati'mi lako bati'ki' kumua, ‘Te'da kamu' misipuapa to PUANG Allataala nasompa to-Israel. 25 Kitai kee, Napallanni alla'ta' tee Sa'dan Yordan. Iamo nanii mpasialla'ki' jio mai kamu' suku Ruben na suku Gad. Tangngia kamu' kamu' umma'-Na PUANG Allataala.’ Na ia ke susii joo, bati'mi mpusaba'i, nate'damo nangkalaja' ngkasiri' PUANG Allataala to bati'ki'. 26 Iamo kipake'dehhi joo ngenan pangkaroban, te'dara pattujungki' kumua la kinii mpassompan karoba ditunu, ba'tu karoba digere', 27 apa la menjaji sa'biri lako kami' na lako kamu' sola lako bati'ki' na bati'mi, kumua tatta'kan kami' massompa lako PUANG Allataala jio olo Tenda Puang Allataala, mpassompan karoba ditunu, sola karoba digere', na karoba mangsukkuru' dipasalama'. Jaji te'damo na la mangkada to bati'mi lako bati'ki' kumua, ‘Tangngia kamu' kamu' umma'-Na PUANG Allataala.’ 28 Ianna mangkada to bati'mi susi joo ke anu', la napebalii bati'ki' kumua, ‘Kitai joo ngenan pangkaroban napake'deh tojoloki' sangrupari ngenan pangkaroban lako PUANG Allataala jio olo Tenda Puang Allataala. Te'dara na la dinii mpassompan karoba ditunu, ba'tu karoba digere', apa la menjaji sa'biri lako patomalinta' kumua umma'-Na tookan Puang Allataala.’ 29 Te'da lalo llan penawangki' kumua la nnewakan PUANG Allataala to tasompa, kipaboko'i-I penawa, kilangkabua' omo mesa' ngenan pangkaroban laen. Jio manda ngenan pangkaroban jio olo Tenda PUANG Allataala la kinii mpassompan karoba ditunu, karoba gandum ba'tu karoba digere'.”

30 Ia tonna mangkamo Imang Pinehas sola to tomatua-tua to-Israel ssa'dingngi to kadanna to suku Ruben, na suku Gad sola sitangngana suku Manasye, mane'ri sau penawanna. 31 Nakuamo Imang Pinehas, anakkana Imang Eleazer lako suku Ruben, suku Gad, sola sitangngana suku Manasye, “Kiissenmi too kumua da'tann-I PUANG Allataala ssisolanki', sanga te'da una miewa-I. Susimi joo minii lla'paranki' jio mai pangsessa-Na PUANG Allataala tee kita' to-Israel.”

32 Mangkai joo too, polemi Imang Pinehas anakkana Imang Eleazar sola tomatua-tua to-Israel mpaui joo kareba lako to-Israel to torro llan tana Kanaan. Nasalaii to suku Ruben sola suku Gad jio tana Gilead. 33 Saumi penawanna to to-Israel, na mpakala'bih Allataala. Te'damo napaui to kumua la malei rrarii suku Ruben sola suku Gad la nnancuru'i to kampongna.

34 Nakuamo suku Ruben sola suku Gad, “Ia joo ngenan pangkaroban, iamo sa'bi lako kita' sola ngasan kumua, PUANG Allataala Iamo Allataala.” Iamo nasangaii joo ngenan “Sa'bi”.