Tana to diben suku Efraim sola sitangnganapa suku Manasye
16
Bati'na omo Yusuf nadete' diundi to tana la naputawa. Ia to angge tanana mangpamula jio mai Sa'dan Yordan siandah kota Yerikho, nnola kadellekanna mata wai kota Yerikho, nnola padang pallawangan, male de' kota Betel jao membuntunna. 2 Jao mai kota Betel mangnguju nnola kota Lus sola Atarot, tana nanii torro to-Arki. 3 Jio mai Atarot male do' kalambunan kampongna to-Yaflet, nnola kota Bet-Horon jiongna liu, nnola kota Gezer, nacappa' llan randan Tasik Tangnga.4 Iamo joo to tana diben suku Manasye sola suku Efraim, anakkana Yusuf, napumanahhi.
Tana to naputawa suku Efraim
5 Ia to tana napumanah suku Efraim pantan sisangrapu susii tee. Ia to katonan llo'na liu mangpamula jio mai kota Atarot-Adar, mangnguju kalambunan nnola kota Bet-Horon jaona liu. 6 Ia to katonan jajanna liu nnola kota Mikhmetat. Jio mai kota Mikhmetat, ia to katonan mangnguju lako kadellekan nnola kota Taanat-Silo na kota Yanoah. 7 Jio mai kota Yanoah mellekko sau' male do' Atarot sola Naharat, nnola biring kota Yerikho nacappa' jiong Sa'dan Yordan. 8 Ia to katonan jajanna liu mangnguju kalambunan mangpamula jio mai kota Tapuah, nnola Salu Kana, nacappa' llan randan Tasik Tangnga. Susimi joo to tana diben rapunna suku Efraim napumanahhi. 9 Na denpa pira-pira kota biccu' sola kampong llan tana suku Manasye dibenni. 10 Apa ia to to-Kanaan to torro jio kota Gezer te'da naula'ii suku Efraim. Iamo joo, nada'tan torro sola to-Kanaan ratu lako too allo, napukaunanni suku Efraim.a