سنت يھُودا رو خط
جَئي پرڀُو رِي ھانَ پراٿنا
1
اَي خط مھَي يھُودا رَي طرفون ھَي جڪو يسُوع مَسيح رو ٻونھو ھانَ يعقُوب رو ڀائي ھون۔ ھُون اَي خط اُوئون مِنکون رَي نون لِکون پڙيو جڪو ايشوَر پِتا رَي پريم ھانَ يسُوع مَسيح رِي ݾنڀال ۾ ريوَڻ رَي ݾارُو اَڻايوڙا ھَي۔ 2 ٿون تي دايا، ݾُک ھانَ پريم تموم گھڻو ھوتو رَي۔ڪُوڙا اُستاد
3 اي پيارون، مھنَي ٿونَي اُوئي مُگتي رَي بارَي ۾ لِکڻ رو تموم گھڻو شوق ھَي جڪَي ۾ آپي ݾجائِي شامل ھون۔ پڻ مھارِي مرضِي ھَي ڪہ ھُون پيل اَي بات لِکي ٿونَي ھدايت ڪرون ڪہ ٿي اُوئي وِشواس تي پڪا ريوَڻ رِي ڪوشش ڪرو جڪو ايشوَر ھميشا رَي ݾارُو آپرَي چُونڊيوڙَي مِنکون رَي حوالي ڪِي ھَي۔ 4 ڪئينڪہ مِنک لِڪ ڇُپ ۾ آپون ۾ شامل ھويا ھَي جڪون رِي سزا رَي بارَي ۾ پِروڻَي زمونَي ۾ پيل ݾون شاستر ۾ لِکيوڙو ھَي۔ اُوئون رو ڪو ڀِي ڌرم ڪونھي ھانَ او آپڻَي ايشوَر رِي ڪِرپا نَي عياشِي ۾ بدلاوَي ھَي ھانَ يسُوع مَسيح رو اِنڪار ڪرَي ھَي جڪو آپڻو ھيڪج مالڪ ھانَ پرڀُو ھَي۔
5 ھمَي مھارِي مرضِي ھَي ڪہ ھُون ٿونَي او ݾجَي باتون ياد ڏيرائُون جڪون رِي ٿونَي پيل ݾون خبر ھَي ڪہ پرميشوَر آپرِي قوم نَي مِصر مُلڪ ݾون ڪاڍي بچايو، پڻ جڪو اُوئي تي وِشواس ڪونھي راکتا پَڇي اُوئون نَي ماري ڇوڙيا۔ 6 اِيئج نمُونَي جڪو فريشتا آپرَي مِليوڙَي اِختيار ھيٺا ڪونھي رھيا پڻ چُونڊيوڙِي جگھا ڇوڙي ڏينِي، اُوئون نَي ايشوَر ھميشا رَي ݾونڪڙون ۾ قيد ڪري مھانَ ڏِن يعني عدالت آݪَي ڏِن توڻي انڌارَي ۾ راکيا ھَي۔ 7 اِيئج نمُونَي سدُوم، عمُورا ھانَ اُوئون رَي آݾَي پاݾَي رَي شھر آݪا مِنک بُڇڙا ڪوم ڪرڻ لاگا اترِي توڻي ڪہ آڏمي، آڏمي ݾون بُڇڙو ڪوم ڪرڻ لاگو ھانَ او ھميشا رَي باݾڏي رِي سزا ڀُگتَي پڙيا ھانَ اَي ݾجون رَي ݾارُو ھيڪ نمُونو ھويا۔
8 اِيئي نمُونَي اَي مِنک جڪون رو ڪو ڀِي ڌرم ڪونھي ھانَ آپرَي ݾپنون لاري بَئي اُوئون آݪِي ڪار آپرو ݾَرير پليت ڪرَي ھَي، او ايشوَر رَي اِختيار نَي ڪئين ڪونھي ݾمجھتا ھانَ آڪاشِي ھستيون رَي خلاف غلط باتون ڪرَي ھَي۔
9 جڏي فريشتون رو ݾردار ميڪائيل، مُوسيٰ رَي لاش رَي بارَي ۾ شيطون ݾون بَحث ڪرتو پڙيو، تو اُوئي رِي اترِي ھِمت ڪونھي ھوئِي ڪہ او شيطون نَي بُرو ڀلو ڪَي پڻ اُوئي رُگو اِترو ڪھيو ڪہ، ”پرميشوَر ٿنَي ڏوھي ڪرَي۔“ 10 جڪَي باتون رِي اِيئون مِنکون نَي خبر ڪونھي اُوئون باتون نَي خراب ڪَي ھَي ھانَ جڪو باتون او بي عقل جِنارون آݪِي ڪار جوڻَي ھَي، اوج اُوئون نَي برباد ڪرَي ھَي۔
11 ڏُک اِيئون تي، ڪيونڪہ اَي قائن رَي مارگ تي بُوئا ھانَ پَشون رَي لالچ ۾ بلعام آݪِي ڪار گُھمراھ ھويا ھانَ قورح آݪِي ڪار بگاوت ڪري برباد ھويا۔ 12 اَي مِنک پوڻي ۾ لِڪيوڙَي پٿرون آݪِي ڪار ھَي جڪو نُقصون ڏَي ھَي۔ اَي مِنک پرڀُو يسُوع رَي پريم نَي ياد ڪرڻ آݪِي ست سنگ رَي دعوتون ۾ ٿون ڀيڙا کاوَي پيئَي ھَي ھانَ رُگو آپرو پيٽ ڀرڻ رَي ݾارُو ڪرَي ھَي۔ او بِنا برݾڻ آݪا باڏݪ ھَي جڪون نَي بائيرو اُڏائي لي جاوَي ھَي۔ اَي پونَ ڇِڻڻ آݪِي مُند آݪا بَڻ ھَي جڪو ٻيئي پاݾَي مُوئوڙا ھَي، يعني بِنا ڦل ھانَ پاݪ ݾون اُکڙيوڙا مِنک۔ 13 اَي مِنک ݾمُوندر رَي بِنا ڪاٻُو ڇوليون آݪِي ڪار ھَي جڪو آپرِي بي شرمِي آݪا گوگھ ڪاڍَي ھَي۔ او رول تارا ھَي جڪون رَي ݾارُو ھميشا رو گھور انڌارو راکيوڙو ھَي۔
14 اُوئون مِنکون رَي بارَي ۾ حنُوڪ جڪو آدم رِي ݾاتوين پيڙھِي ݾون ھتو، اُوئي اَي اگڪٿِي ڪِي ھتِي ڪہ، ياد راکو، پرڀُو آپرَي لَکون پويتر فريشتون ڀيڙو آشَي۔ 15 او اِيئي رَي ڪري آشَي ڪہ او ݾجون رو اِنصاف ڪرَي ھانَ جڪون ايشوَر رَي خلاف ڪوم ڪيئا ھَي ھانَ جڪون ايشوَر نَي ڪونھي منيو ھانَ جڪو ايشوَر رَي خلاف ٻوليا، اُوئون ݾجون نَي ڏوھي ڪرَي۔ 16 اَي ڪُرڪڻ آݪا ھانَ الزوم ھڻڻ آݪا مِنک ھَي ھانَ آپرَي بُڇڙَي خواھشون تي بَي ھَي۔ او آپرَي بارَي ۾ موٽَي موٽَي باتون ڪرَي ھَي ھانَ آپرَي فائدَي رَي ݾارُو مِنکون نَي خُوشامد ڪرَي ھَي۔
آپرَي وِشواس تي پڪا رو
17 اي پيارون، او باتون ياد راکو جڪو آپڻَي پرڀُو يسُوع مَسيح رَي سنتون پيل ݾون ݾُڻايو ھَي ڪہ، 18 ”آخري زمونَي ۾ ڪئينڪہ ھاݾا ڪرڻ آݪا مِنک ھوشَي جڪو آپرَي بُڇڙَي خواھشون تي بيشَي۔“ 19 اَي او مِنک ھَي جڪو ٿون ۾ جُدائَي گھاتَي ھَي۔ او دُنياوِي ݾوچ راکَي ھَي ھانَ اُوئون ڪڍي ايشوَر رِي آتما ھائِي ڪونھي۔ 20 پڻ اي پيارون، ٿي آپرَي پويتر وِشواس ۾ ھيڪَي ٻيجَي نَي پڪا ڪرو ھانَ پويتر آتما ݾون پراٿنا ڪرو۔ 21 آپرو آپنَي ايشوَر رَي پريم ۾ پڪا راکو ھانَ اَمر جيوَن رَي ݾارُو آپڻَي پرڀُو يسُوع مَسيح رِي دايا رَي اِنتظار ۾ رو۔ 22 جڪو گھٽ وِشواس آݪا ھَي اُوئون تي دايا ڪري اُوئون نَي ݾمجھائو۔ 23 جڪو مِنک نرگ رَي باݾڏي ڏيݾا جاوَي پڙيا اُوئون نَي ٽِپ ڏي بچائو ھانَ جڪو بُڇڙائي ۾ ڦاٿوڙا ھَي اُوئون تي دايا ڪرو پڻ ٻِي ݾون، اترِي توڻي ڪہ اُوئون رَي گاڀون ݾون ڀِي نفرت ڪرو جڪو اُوئون رِي آپرِي حرڪت ݾون پليت ھويا ھَي۔
ايشوَر رِي بکوڻ
24 ھمَي ايشوَر جڪو ٿونَي ڀٽڪڻ ݾون بچائي ݾگھَي ھَي، جڪو آپرَي مونَ مرتبَي ۾ پُورِي خُوشِي ݾون بي عيب ڪري اُڀاڙي ݾگھَي ھَي 25 ھانَ آپڻَي پرڀُو يسُوع مَسيح رَي وسيلَي آپون نَي مُگتي ڏَي ھَي، اُوئي ھيڪَي ايشوَر رِي مھما، بکوڻ، بادشاھي ھانَ اِختيار جڪو شرُوع ݾون ھتو، ھڻون ڀِي ھَي ھانَ ھميشا ھوتو رَي۔ آمين۔