اِنسون رِي زندگِي
14
اِنسون جڪو لُگائِي ݾون جايو ھَي،ٿوڙَي ڏِنون رو ھَي ھانَ ڏُکون ݾون ڀريوڙو ھَي۔
2 او گُل آݪِي ڪار اُگَي ھانَ ڪُوماٽيجَي ھَي
ھانَ ڇان آݪِي ڪار ڇيڪو گُم ھووَي ھَي،
او ھيڪِي جگھا تي اُڀتو ڪونھي۔
3 تو ڪِي تُو اھڙَي فانِي اِنسون تي آپرِي نظر راکتو آئِي؟
ھاوي، مھَي اِنسون نَي آپرِي عدالت ۾ لي آئِي۔
4 ڪو ڀِي پويتر نَي پليت ڪري ڪونھي ݾگھتو،
5 تُو، اِنسون رِي عُمر را ڏِن
ھانَ مھيڻون رَي حدون راکَي ھَي۔
ھاوي، ٿَي اُوئي رِي عُمر رِي حد راکِي ھَي،
جڪَي نَي او ڪڏي ڀِي پار ڪونھي ڪرتو۔
6 تُو آپرِي نظر اُوئي ݾون ھٽا،
تو او آروم ڪرَي،
ھاوي، او مزُور آݪِي ڪار ڪئينڪہ آروم تو ڪرَي۔
7 ڪيونڪہ بَڻ نَي اَي اُميد ھووَي ھَي ڪہ،
جي ھُون باڍيو گيو، تو ڀڙي ڦُوٽين رو،
ھانَ مھارَي نرم نرم ٽاݪَي ڦُوٽڻ بند ڪونھي ھووَي۔
8 بيشڪ اُوئي رِي پاݪ پِروڻِي ھووَي ھَي،
ھانَ اُوئي رو ٿُڙ مٽِي ۾ گَڙي جاوَي،
9 پڻ تو ڀِي پوڻي رِي باݾنا ݾون او گئونچ ڪاڍشَي
ھانَ بَڻ آݪِي ڪار ٽاݪَي جھالشَي۔
10 پڻ اِنسون مري پڙيو رَي ھَي،
مرڻ ݾون اُوئي رِي طاقت مِٽي جاوَي ھَي،
دم نڪرڻ ݾون اُوئي رو نون نِشون ڀِي مِٽي جاوَي ھَي۔
11 او اُوئي ندِي آݪِي ڪار ھَي
جڪَي رو پوڻي ختم ھوئي جاوَي ھَي،
ھانَ او دريا آݪِي ڪار ھَي جڪو ݾُوڪي جاوَي۔
12 اھڙَي نمُونَي اِنسون ڀِي مُڪوم ۾ جائي
دٻيجَي ھَي ھانَ ڪڏي ڀِي اُٺتو ڪونھي۔
جترِي توڻي آڪاش ٽَݪتو ڪونھي،
اُترِي توڻي اِنسون نَڪو جاگَي نَڪو جَگايو جاوَي۔
13 ڪاش، تُو مھنَي پتاݪ ۾ لِڪائي ڇوڙون تو،
جترِي توڻي ٿارو ڪھر ٽَݪي جائُون تو،
ھانَ تُو ھيڪ ٽيم پڪو راکي ڀڙي مھنَي ياد راکَي۔
14 جي اِنسون مري جاوَي، تو ڪِي او ڀڙي جيتو ھوشَي؟
تو ھُون ڏُکيا ڪوم ڪري اُوئي رو اِنتظار ڪرون تو۔
جترِي توڻي مھارِي مُگتي نِي ھوئون تو۔
15 اُوئي ٽيم تُو مھنَي پُڪارون تو ھانَ ھُون ٿنَي بݪتِي ڏيئون تو۔
ٿنَي ٿارِي ٺاھيوڙِي شئي ماٿَي روعب ھوئون تو۔
16 پڻ تُو مھارا پگ گِڻَي ھَي،
تُو مھارا پاپ گِڻَي ھَي؟
17 تُو مھارا ڏوھ ٿيلِي ۾ گھاتي، اُوئي تي ٺَپو لگاوَي ھَي۔
تُو مھارا ݾجائِي ڏوھ ڍڪَي ھَي۔
18 جھڙَي نمُونَي جبل کِري مِٽي جاوَي ھَي،
پٿر آپرِي جگھا ݾون پرھا ڪيئا جاوَي ھَي،
19 جھڙَي نمُونَي پوڻي پٿرون نَي گِݾڪاوَي ھَي،
ھانَ ٻوڏ مٽِي نَي لوڙھي لي جاوَي ھَي،
اُوئيج نمُونَي تُو اِنسون رِي اُميد مٽِي ۾ مِلاوَي ھَي۔
20 ٿارو ھميشا اِنسون ماٿَي اِختيار ھَي ھانَ او مري جاوَي ھَي۔
تُو اُوئي رو رُوپ مِٽائي بِگاڙَي ڇوڙَي ھَي۔
21 اُوئي رَي ڏيڪرون رِي عِزت ھووَي ھَي،
پڻ اُوئي نَي خبر ڪونھي، جي او بي عِزتا ھووَي، تو ڀِي خبر ڪونھي۔
22 او رُگو آپرَي ڏيل رو ڏوکن محسُوس ڪرَي ھَي،
ھانَ اُوئي رِي آتما روتِي رَي ھَي۔“