लूका 17

पाप की मांफी

(मत्ती १८.६-७,२१-२२; मरकुस ९.४२)

¹ फेर ईसु ने अपणा चेलाहुंण से क्यो, "जिणकासे लोग भटक्या करे वी बातहुंण तो होयगाज। पण धिक्कार उना मनख के, जेकी वजासे वी होय हे! ² उका सरु यो भलो होतो के उका गळा माय घट्टी को पाटो लटकाड़्यो जातो अने उ समन्दर माय लाख्यो जातो, बजाय इका के उ उना नाना माय से कइंका एक के पाप करवा सरु उकसाड़े। ³  होसियार!

"अगर थारो भई पाप करे तो उके डांट, अने अगर उ मन बदळे तो उके मांफ कर। ⁴ अगर उ हर दन सात कावा थारा बिरोद माय पाप करे अने साती कावा अई के थार से के, 'हूं पसतावो करूं हूं,' तो उके मांफ करजे।"

बिसास

⁵ तो परेरितहुंण ने परभु से क्यो, "हमारो बिसास बड़ई दे।"

⁶ परभु ने क्यो, "अगर तमारा माय रंई का दाणा बरोबर बिसास रे तो तम इना सेतूत का झाड़ से केता, 'उखड़ी के समन्दर माय लागी जा,' तो उ तमारी बात मानी लेतो।

दास को काम

⁷ "तमारा माय से कुंण असो जेको हळी हळ घेरे अने गाडरहुंण के चरातो रे, के जदे हळी खेत से आवे तो उ हळी से केवा लागे, 'भित्तरे अई के जिमवा बेठिजा'? ⁸ कंई उ उकासे यो नी केगा, 'म्हारा खावा सरु कंई बणा अने उजळा लतरा पेर अने जदत्तक हूं खई-पी नी लूं म्हारी सेवा करजे; बाद माय तू बी खई-पी लीजे'? ⁹ हुकम मानवा सरु कंई उ अपणा हळी के धन्यबाद देगा? ¹⁰ असीज तरा तम बी जदे उण सगळा हुकम के पाळो जो तमारे द्‍या ग्या हे, तो को, 'हम निकम्मा दास हे; हमने तो सिरप उज कर्‌यो जो हमारे करनों चइये थो'।"

परमेसर के धन्यबाद देणो

¹¹ असो होयो के जदे ईसु यरुसलेम आड़ी जई र्‌यो थो तो सामरिया इलाका अने गलील का अदाड़ माय से हुई के हिट्यो। ¹² ज्योंज उ कइंका गांम माय ग्यो तो दूर उब्या दस कोड़्या उकासे मिळ्या। ¹³ उणने उंची अवाज से हेला पाड़ी के क्यो, "हे ईसु स्वामी परभु, हमार पे दया करजे!"

¹⁴  जदे उने उणके देख्या तो क्यो, "जई के अपणे खुद के पुरोहितहुंण के दिखाड़ो।"

अने असो होयो के जाताज जाता वी सुद्द हुई ग्या। ¹⁵ तो उणका माय से एक ने जदे देख्यो के नज हुई ग्यो हूं, तो उंची अवाज से परमेसर की बड़ई करतो होयो पाछो आयो, ¹⁶ अने ईसु के धन्यबाद देतो होयो सास्टांग परणाम कर्‌यो अने पग पे पड़ी ग्यो। उ सामरी जात को थो। ¹⁷ जदे ईसु ने क्यो, "कंई दस का दसज सुद्द नी होया था, तो फेर वी नो कंय्यांड़ी हे? ¹⁸ कंई इना परदेसी का सिवाय उणका माय से हजु कइंकोज नी र्‌यो जो पलटी के परमेसर की इसतुती करतो?" ¹⁹ तो ईसु ने उकासे क्यो, "उठी के चल्यो जा; क्योंके तने म्हार पे बिसास कर्‌यो तो थारा बिसास ने थारे नज कर्‌यो हे।"

ईसु को आवा वाळो राज

(मत्ती २४.२३-२८,३७-४१)

²⁰ जदे फरीसिहुंण ने ईसु से पुछ्‌यो, "परमेसर को राज कदे आयगा?" तो उने उणके जुवाब द्‍यो, "परमेसर को राज परगट रुप माय नी आवे। ²¹ अने लोग या नी केगा, 'देखो, उ यां हे!' या 'वां हे!' क्योंके देखो, हूं तमारा गेले हूं तो परमेसर को राज तमारा अदाड़ मायज हे।"

²² उने चेलाहुंण से क्यो, "वी दन आयगा जदे हूं मनख का बेटा का दन माय से एक दन के देखवा की मन्‍सा करोगा, पण तम म्हारे देखी नी सकोगा। ²³ वी तमार से केगा, 'वां देखो!' 'यां देखो!' तम चल्या मती जाजो अने नी उणका पाछे भागजो। ²⁴ क्योंके बिजळी जसे चळकी के असमान का इकाड़ी से दूसरा आड़ी तक चळके, असोज हूं मनख को बेटो बी अपणा दन माय परगटुंवां के, आखो जग म्हारे देखेगा। ²⁵ पण पेलां यो जरुरी हे के हूं घणो दुःख झेलुं अने इनी पीड़ी का लोगहुंण से नकार्‌यो जउं। ²⁶  "जसा के जूना नबी नूह का दनहुंण माय होयो थो, असोज हूं मनख का बेटा का दनहुंण मायज होयगा। ²⁷  जदत्तक नूह झाज माय नी चल्यो ग्यो लोगहुंण खाता-पीता अने ब्‍याव-सादी करता र्‌या। तो जळ परळय होयो अने सगळा खतम हुई ग्या। ²⁸  "लूत का दनहुंण माय बी असो होयो थो। वी खाणो-पीणो, लेणो-देणो करता, झाड़-पोदा लगाड़ता अने घर बणाता था, ²⁹  पण जदे लूत सदोम से हिट्यो, उना दन असमान से भस्ते अने तेजाब बरस्यो अने वी सगळा खतम हुई ग्या। ³⁰ जेना दन हूं मनख को बेटो परगटुंवां, उ दन बी नठू असोज रेगा।

³¹  "उना दन जो घर का अदरे रे अने समान निच्चे घर माय रे उ उके लेवा सरु नी उतरे; अने असोज उ जो खेत माय रे, पाछो नी पल्टे। ³²  लूत की घराळी के रियाद करो! ³³  जो अपणो पराण बचाड़वा की कोसिस करेगा, उ हमेस्या का जीवन के खोयगा; अने जो म्हारो चेलो हुई के अपणो पराण खोयगा, उ उके सरग माय पाछो पायगा! ³⁴ हूं तमार से कूं के उनी राते दो मनख खाट पे सोता रेगा; एक लई ल्यो जायगा अने दूसरो छेकी लाख्यो जायगा। ³⁵ दो बइरा एकज जगा पे घट्टी पीसती रेगा, एक लई ली जायगा अने दूसरी छेकी लाखी जायगा।" ³⁶ दो मनख खेत माय रेगा; एक लई ल्यो जायगा अने दूसरो छेक्यो जायगा।"

³⁷ तो उणने उकासे पुछ्‌यो, "हे परभु, यो कां होयगा?"

उने उणकासे केवाड़ा माय क्यो, "जां लास पड़ी रेगा वां चील-गरदन बी भेळी होयगा।"