मत्ती 22

ब्‍याव-भोज की मिसाल

(लूका १४.१५–२४)

¹ ईसु ने पाछो उणकासे मिसाल माय क्यो, ² "सरग राज को मिलाण एक राजा से कर्‌यो जई सके जेने अपणा बेटा का ब्‍याव को भोज कर्‌यो। ³ उने भोज माय नोत्या लोगहुंण के बुलाड़वा सरु अपणा सेवकहुंण के मोकल्या, पण उना लोगहुंण ने आणो नी चायो। ⁴ फेर उने दूसरा सेवकहुंण के या कई के मोकल्या: पांमणाहुंण से को, "देखो, हूं भोज तय्यार करी चुक्यो हूं। म्हारा अच्छा अने पाळ्‍या होया ढोर काट्या जई चुक्या हे अने सगळो कंई तय्यार हे। ब्‍याव-भोज माय आव"।' ⁵ पण उणने कंई ध्यान नी द्‍यो अने अपणा रस्ता पे चली पड़्या, एक अपणा खेत आड़ी अने दूसरो अपणा बेपार आड़ी, ⁶ अने बाकी जिणके नोत्या था उणने राजा का सेवकहुंण के पकड़्या अने बुरो बरताव करिके उणके मारी लाख्या। ⁷ तो राजा ने करोध माय अई के सेना का सांते चड़ई करी लाखी अने उना हत्याराहुंण के नास करिके उणको नगर बाळी लाख्यो। ⁸ फेर अपणा सेवकहुंण से क्यो, ब्‍याव को भोज तो तय्यार हे, पण वी जिणके तेड़्या था लायक नी हिट्या। ⁹ इकासरु चोपालहुंण पे जाव अने जितरा बी तमारे मिळे, ब्‍याव का भोज माय तेड़ी लाव।' ¹⁰ वी सेवक सेरी-गळिहुंण माय ग्या अने जो बी अच्छा-बुरा मिळ्या, सगळा के भेळा कर्‌या; अने ब्‍याव को घर पांमणाहुंण से भर‍ई ग्यो।

¹¹ पण जदे भोज माय भेळा होया पांमणाहुंण के देखवा सरु राजो आयो, तो उने वां एक मनख के देख्यो जो ब्‍याव का लतरा पेर्‌यो होयो नी थो, ¹² अने उने उकासे क्यो, 'दोस, तू यां ब्‍याव का लतरा पेर्‌या बिना कसे अई ग्यो?' अने उ कइंनी कंई सक्यो। ¹³  तो राजा ने अपणा सेवकहुंण के हुकम द्‍यो, 'उका हात अने पग बान्‍दी के उके बायरे इन्‍दारा माय लाखी दो। वां रोणो अने दांत पिसणो रेगा।'

¹⁴ क्योंके तेड़्या होया तो नरा पण छांट्‌या होया कमती हे।"

रोमी राजा के कर चुकाड़णो

(मरकुस १२.१३–१७; लूका २०.२०–२६)

¹⁵ तो फरीसिहुंण ने जई के माय-माय बिचार्‌यो के कसतरा ईसु के उकीज बातहुंण माय फसाड़ां। ¹⁶ फरीसिहुंण ने अपणा चेलाहुंण के हेरोदियाहुंण का झुंड का गेले यो केवा मोकल्या: हे गरु, हम जांणां के तू सांचो हे अने परमेसर को मारग सच्चई से सीखाड़े, अने कइंका का दबाव माय नी आवे; क्योंके तू कइंका की तरफदारी नी करे। ¹⁷ इकासरु हमारे बताड़ के तू कंई सोंचे: "रोमी राजा केसर के कर चुकाड़णो ठीक हे के नी?"

¹⁸ ईसु ने उणकी चालाकी जाणी के क्यो, हे कपट्‍याहुंण, म्हारे कायसरु परखी र्‌या हो? ¹⁹ म्हारे उ सिक्को बताड़ो जेकासे कर चुकाड़्यो जाय हे।

तो वी उका कने एक चांदी को सिक्को लाया। ²⁰ उने उणकासे क्यो, "या छाप अने लिख्यो केको हे?"

²¹ उणने उकासे क्यो, "केसर राजा को।"

तो ईसु ने उणका से क्यो, "जो केसर को हे उ केसर के दो, अने जो परमेसर को हे उ परमेसर के दो।"

²² या सुणी के वी चक्‍कर माय पड़ी ग्या अने उके छोड़ी के चल्या ग्या।

जी उठणो अने ब्‍याव-सादी

(मरकुस १२.१८–२७; लूका २०.२७–४०)

²³  उणाज दन थोड़ा सदुकी दळ का - जिणको यो केणो हे के मर्‌या पाछे जी उठणो हेज नी - उका कने आया अने उकासे पुछवा लाग्या, ²⁴  "गरु, मूसा ने क्यो थो, अगर कईं को आदमी बे-ओलाद मरी जाय तो उको भई उकी बइरा से ब्‍याव करिके उका भई सरु ओलाद पेदा करे।' ²⁵ अबे हमारा यां सात भई था। पेलो, ब्‍याव करिके मरी ग्यो अने ओलाद नी होवा की वजासे दूसरा भई ने उकी घराळी से ब्‍याव कर्‌यो। ²⁶ असतरा दूसरा अने तीसरा ने बी कर्‌यो, अने सातवां भई तक असोज होयो। ²⁷ अने आखर माय वा बइरा बी मरी गी। ²⁸ तो जी उठवा पे वा सातहुंण माय से केकी घराळी रेगा? क्योंके वा सगळा की घराळी रई चुकी थी।"

²⁹ पण ईसु ने उणके जुवाब द्‍यो, "तम भूल माय पड़्या हो क्योंके परमेसर को पवित्तर सासत्तर अने परमेसर की सामरत के नी जाणो। ³⁰ क्योंके जी उठवा पे लोग नी तो ब्‍याव करेगा अने नीज ब्‍याव माय द्‍या जायगा, पण सरग माय वी सरगदूतहुंण सरीका रेगा। ³¹ कंई मर्‌याहुंण का जी उठवा का बारामें तमने परमेसर का धरम सासत्तर माय यो बचन नी बांच्यो जो परमेसर ने तमार से क्यो थो: ³²  हूं इबराइम को परमेसर अने इसाक को परमेसर अने याकूब को परमेसर हूं? हूं मर्‌याहुंण को नी, पण जीवताहुंण को परमेसर हूं।"

³³ जदे लोगहुंण ने यो सुण्यो तो वी उका परबचन से चकित रई ग्या।

सगळा से मोटो हुकम

(मरकुस १२.२८–३४; लूका १०.२५–२८)

³⁴ जदे फरीसिहुंण ने यो सुण्यो के उने सदुकिहुंण की बोलती बन्द करी लाखी हे तो वी भेळा होया। ³⁵  अने उणका माय से एक ने जो यहूदिहुंण का धारमिक नेम-बिधान को जाणकार थो, उने परखवा सरु उकासे सवाल कर्‌यो। ³⁶ "हे गरु, यहूदिहुंण का धारमिक नेम-बिधान माय कां को हुकम मोटो हे?"

³⁷  उने उकासे क्यो, "तू परभु अपणा परमेसर से अपणा आखा हिरदा अने अपणा आखा आतमा अने अपणी आखी अक्कल से परेम राख। ³⁸ योज बड़ो अने मोटो हुकम हे। ³⁹  अने उकाज सरीको दूसरो यो हे: तू अपणा पड़ोसी से अपणा सरीको परेम राख।' ⁴⁰ इज दो हुकमहुंण आखा यहूदिहुंण का धारमिक नेम-बिधान अने भविसबाणी केवा वाळाहुंण को अधार हे।"

दाऊद का बेटा का बारामें सवाल

(मरकुस १२.३५–३७; लूका २०.४१–४४)

⁴¹ जदे फरीसी भेळा होया था, तो ईसु ने उणका से एक सवाल पुछ्‌यो: ⁴² मसीह का बारामें तम कंई बिचारो हो? उ केको बेटो हे?"

उणने उका से क्यो, "दाऊद को।"

⁴³ उने उणका से क्यो, तो फेर दाऊद आतमा माय हुई के उके 'परभु' कायसरु के, याने

⁴⁴  'परभु ने म्हारा परभु से क्यो:

म्हारा सुदा हाताड़ी बेठ,

जदत्तक के हूं थारा बेरिहुंण के थारा पग की चोकी नी बणई दूं'

⁴⁵ अगर दाऊद उके परभु के तो उ उको बेटो कसे होयो?"

⁴⁶ कइंका बी उके कंई जुवाब नी दई सक्या, अने उना दन से हजु सवाल करवा की हिम्मत कइंका की नी री।