मत्ती 11

ईसु अने योहन बपतिसमा देवा वाळो

(लूका ७.१८–३५)

¹ असो होयो के जदे ईसु बारा चेलाहुंण के समजई चुक्यो, तो वां से उ उणका नगरहुंण माय सीख देवा अने परचार करवा चल्यो ग्यो।

² जदे जेळखाना माय योहन ने मसीह का कामहुंण की चरचा सुणी तो अपणा चेलाहुंण के ईसु कने यो पुछवा मोकल्या, ³ उणने पुछ्‌यो "कंई आवा वाळो मसीह तूज हे, के हम कइंका दूसरा की बाट जोवां?"

⁴ ईसु ने उणके जुवाब द्‍यो, "जो कंई तम सुणो अने देखो हो जई के उको समिचार योहन के दई दो; ⁵  आंदा देखी र्‌या, पांगळा चली र्‌या, कोड़्या सुद्द हुई र्‌या, अने बेर्‌याहुंण सुणे, मुरदाहुंण जिवाड़्या जाय अने गरीब-गुरबाहुंण के सुब-समिचार सुणायो जई र्‌यो हे। ⁶ अने धन्य हे वी जो म्हारी वजासे ठोकर खावा से बच्या रे हे।"

⁷ योहन का चेलाहुंण का जाता बखत ईसु भीड़ का लोगहुंण से केवा लाग्यो, "तम मांळ माय कंई देखवा ग्या था? बायरा से हलता होया बरु के? ⁸ तो फेर तम कंई देखवा ग्या था? नरम लतरा पेर्‌या होया मनख के? देखो तो, नरम लतरा पेरवा वाळा राजम्हेल माय रे हे। ⁹ फेर तम कायसरु ग्या था? कइंका नबी के देखवा सरु? हां, अने हूं तमार से कूं नबी से बी मोटा मनख के। ¹⁰  यो उज हे जेका बारा माय लिख्यो हे, 'देख, हूं थार से अगड़े अपणा दूत के मोकलुं, जो थारा अगड़े थारो मारग तय्यार करेगा।' ¹¹ हूं तमार से खास बात कूं के जो बइराहुंण से जन्म्या हे योहन बपतिसमा देवा वाळा से मोटो कोइंज नी होयो, फेर बी जो सरग का राज माय नानो से नानो हे, उ योहन से मोटो हे। ¹²  योहन बपतिसमा देवा वाळा का दन से लई के तो अबी तक सरग का राज माय जबरजस्ती भराता जई र्‌या अने ताकत वाळो मनख उका पे हक जमई ले हे। ¹³ क्योंके सगळा नबी अने नेम-बिधान, योहन का आवा तक भविसबाणी करता र्‌या हे। ¹⁴  अगर तम नबी अने नेम-बिधान की बात के माननो चाव तो योज योहन एलियाह नबी हे, जो आवा वाळो थो। ¹⁵ जिणका सुणवा का कान होय उ सुणी ले।

¹⁶ "हूं इनी पीड़ी को मिलाण किकासे करूं? ई लोग हाट-बजार माय बेठवा वाळा बाळकहुंण सरीका हे, जो दूसरा बाळकहुंण के तेड़े, ¹⁷ अने के हे, 'हमने तमारा सरु बंसी बजाड़ी, पण तम नाच्या हयनी: अने हमने दुःख भर्‌या गीत गाया पण तमने दुःख नी मनाड़्यो।' ¹⁸ असोज योहन नी तो खातो अने नी पीतो आयो, पण वी के हे 'उका माय बुरी आतमा हे।' ¹⁹ हूं मनख को बेटो खातो-पितो आयो अने वी के 'देखो तो, पेटु अने पिय्यक्कड़, चुंगी लेवा वाळाहुंण अने दूसरा पापिहुंण को दोस!' फेर बी परमेसर को ज्ञान अपणा कामहुंण से साबित होय हे।"

अबिसासिहुंण के धिक्कारनो

(लूका १०.१३–१५)

²⁰ तो उ उना नगरहुंण के जिणका माय नरा अचरज का काम कर्‌या था, धिक्कारवा लाग्यो क्योंके उणने पसतावो नी कर्‌यो थो। ²¹  "हे खुराजीन नगर, धिक्कार हे थार पे! हे बेतसेदा नगर, धिक्कार हे थार पे! क्योंके जो अचरज का काम तमारा माय कर्‌या, अगर वी गेर यहूदी सूर नगर अने सेदा नगर माय कर्‌या जाता तो वी नरा पेलां दुःख परगटवा सरु टाट ओड़ी के अने राखोड़ा पे बेठी के पसतावो करी लेता। ²² फेर बी हूं तमार से कूं के न्याव का दन सूर अने सेदा की हालत तमारा बजाय जादा सेणे सरीकी रेगा। ²³  अने हे कफरनहूम नगर, कंई तू सरग तक अदरे उठाड़्यो जायगा? तू तो नरक तक उतरेगा, क्योंके जो अचरज का काम थारा माय कर्‌या, अगर वी सदोम नगर माय कर्‌या जाता, तो उ आज तक बण्यो रेतो। ²⁴  फेर बी हूं थार से कूं, न्याव का दन थारी हालत का बजाय सदोम नगर की हालत जादा सेणे सरीकी रेगा।"

अराम देवा को करार

(लूका १०.२१-२२)

²⁵ उना बखत ईसु ने क्यो, "हे पिता, सरग अने धरती का परभु, हूं थारे भजुं, के तने ई बातहुंण ज्ञानी अने अकलमंदहुंण से छिपाड़ी के राखी अने बाळकहुंण के बताड़ी हे। ²⁶ हां, पिता, क्योंके थारे योज अच्छो लाग्यो।

²⁷  "म्हारा पिता ने म्हारे सगळो कंई समळायो। पिता का अलावा बेटा के कईं को नी जाणे, अने नी बेटा का अलावा पिता के कईं को जाणे, सिरप बेटो अने जिणका पे उ परगटणो चावे।

²⁸ "हे सगळा काम करवा वाळा अने भारी बजन से दब्या लोगहुंण म्हारा कने आव, हूं तमारे अराम दूंवां। ²⁹  म्हारो जुड़ो अपणा अदरे उठई लो अने म्हार से सीखो, क्योंके हूं नरम अने हिरदा माय कोमल हूं अने तम अपणा हिरदा माय अराम पावगा। ³⁰ क्योंके म्हारो जुड़ो सबगो अने म्हारो बजन हळ्को हे।"