मत्ती 10

बारा चेलाहुंण के सेवा सरु मोकलनों

(मरकुस ३.१३–१९; लूका ६.१२–१६)

¹ तो ईसु ने अपणा बारा चेलाहुंण के बुलाड़ी के उणके बायरबादा के हेड़वा अने सगळी तरा की बेमारी अने सगळी तरा की कमजोरी के नज करवा को हक द्‍यो। ² अबे बारा परेरितहुंण को नाम यो हे: पेलो - सिमोन जो पतरस केवाय, अने उको भई अन्द्रियास; जब्दी को बेटो याकूब अने उको भई योहन; ³ फिलिप्पुस, बरतुलमे, थोमा अने नाको वसुळवा वाळो मत्ती; हलफई को बेटो याकूब अने तद्दे; ⁴ सिमोन कनानी (देस-भगत) अने यहूदा इस्करियोती, जेने ईसु के बाद माय पकड़वई लाख्यो थो।

बारा परेरितहुंण की योजना

(मरकुस ६.७–१३; लूका ९.१–६)

⁵ इना बाराहुंण के ईसु ने यो कई के मोकल्या, "गेर यहूदिहुंण कने मती जाजो, अने नी सामरिहुंण की जात का कसाज नगर माय जावजो। ⁶ इका बजाय इसराइल जात का लोगहुंण के जो गाडर सरीका खोवाया हे उणका कने जाजो। ⁷  अने जाता होया तम यो परचार करिके किजो, 'सरग को राज कने अई ग्यो।' ⁸ बेमारहुंण के नज करो, मर्‌या होया के जिवाड़ो, कोड़्याहुंण को कोड़ मिटाड़ो, बायरबादाहुंण के हेड़ो। तमारे फिरी माय मिळ्यो, तो फिरी माय दो। ⁹ अपणी कमर की आंटी माय नी सुन्नो, नी चांदी अने नी तांबो राखजो। ¹⁰  जातरा सरु नितो झोळो, यां तक के दो कुड़ता बी मती लो, अने नी पन्नी अने नी लाकड़ी राखो, क्योंके मजुर के जिमवा को हक हे।

¹¹ जेना कइंका नगर या गांम माय जाव तो पुछी-ताछिलो के वां कुंण लायक हे अने बिदा होवा तक वांज रो। ¹² जदे तम उका घर माय जाव तो सान्ती को आसिरबाद दो। ¹³ अगर घर का लोग लायक रेगा तो तमारी सान्ती उना घर माय बणी रेगा, पण अगर नी हे तो सान्ती को तमारो परणाम तमारा कने अई जायगा। ¹⁴  जो तमारे माने हयनी अने तमारी बातहुंण पे कान नी धरे, जदे तम उना घर अने नगर से हिटो, तो अपणा पगहुंण को धूळो झटकी लाखजो। ¹⁵  हूं तमार से खास बात कूं के न्याव का दन उना नगर का बजाय सदोम नगर अने अमोरा नगर को हाल जादा सेणे लायक रेगा।

आवा वाळो कळेस

(मरकुस १३.९–१३; लूका २१.१२–१७)

¹⁶  "देखो तो, हूं तमारे गाडरहुंण सरीका बरगड़ाहुंण का माय मोकलुं। इकासरु सरप सरीका चातर्‌या अने कबुतर सरीका भोळा बणजो। ¹⁷  पण मनखहुंण से होसियार री जो, क्योंके वी तमारे कचेरीहुंण माय लई जायगा अने अपणा पराथनाघरहुंण माय तमारे कोड़ा मारेगा। ¹⁸ तम म्हारा सरु राजपालहुंण अने राजाहुंण का सामे उबा कर्‌या जावगा के उणका पे अने गेर जात सरु गवा बणो। ¹⁹ पण जदे वी तमारे पकड़ाय तो फिकर मती करजो के हम कंई अने कसे कांगा, क्योंके जो कंई तमारे केणो हे उनी घड़ी तमारे बतई द्‍यो जायगा। ²⁰ क्योंके बोलवा वाळा तम नी, पण यो तमारा परमेसर पिता को आतमो, जो तमारा भित्तरे से बोले।

²¹  "भई अपणा भई के अने बाप अपणा छोरा-छोरी के मारी लाखवा सरु देगा, 'अने ओलाद अपणा मां-बाप का बिरोद माय उबा हुई के उणके मरवई लाखेगा।' ²²  म्हारा नाम सरु सगळा तमार से घिरणा करेगा, पण जो आखरी तक जिरना मारेगा उको उध्दार होयगा। ²³ जदे कदी वी तमारे इना नगर माय सताड़े तो दूसरा माय भागी जाजो, क्योंके हूं तमार से खास बात कूं के इका पेलां के तम इसराइल का सगळा नगरहुंण माय फरनो बन्द करो, इतराक माय तो हूं मनख को बेटो अई जउंवां।

²⁴  नी चेलो अपणा गरु से मोटो, अने नी सेवक अपणा मालेख से मोटो रे। ²⁵  चेलो अपणा गरु सरीको अने सेवक अपणा मालेख सरीको हुई जाय योज नरो। अगर उणने घर का मालेख के बालजबूल याने सेतान क्यो, तो घर का मनखहुंण के कजा कंई-कंई केगा!

केका से डरां?

(लूका १२.२–७)

²⁶  "इकासरु उणकासे मती डरो, क्योंके कंई ढांक्यो हयनी जेके उघाड़्यो नी जायगा अने कंई छिप्यो हयनी जेके जाण्यो नी जायगा। ²⁷ जो हूं तमार से इन्दारा माय कूं उके तम उजाळा माय कोजो, अने जो कंई तम काने-कान सुणो, उके डागला पे चड़िके जोर से परचार जो। ²⁸ उणकासे मती डरो जो काया के नास करे पण आतमा के नास नी करी सके, पण परमेसर से डरो जो आतमा अने काया दोई के नरक माय नास करी लाखे। ²⁹ कंई एक पइसा माय दो चिरकली नी बिके? फेर बी तमारा पिता की मरजी का बिना एक बी धरती पे नी पड़ी सके। ³⁰ तमारा माथा का बाल बी गिण्या होया हे। ³¹ इकासरु डरो मती। तम नरी चिरकलिहुंण से बी बत्ती मोल का हो।

ईसु की वजासे सरमाव मती

(लूका १२.८,९)

³² तो हरेक जो मनख का सामे म्हारे मानी ले, हूं बी अपणा पिता परमेसर का सामे, जो सरग माय हे, मानी लुंवां। ³³  पण जो मनखहुंण का सामे म्हारे नी माने, हूं बी उके अपणा पिता परमेसर का सामे, जो सरग माय हे नी मानुवां।

मेळ करावा नी, पण तरवार चलवाणे

(लूका १२.५१–५३; १४.२६,२७)

³⁴ "या मती बिचारो के हूं धरती पे मेळ-मिळाप करावा आयो। हूं मेळ करावा नी, पण फूट लाखवा अने तरवार चलवाणे आयो। ³⁵ हूं तो इकासरु आयो के छोरा के उका बाप, छोरी के उकी मेतारी, अने लाड़ी के उकी सासु का बिरोदी करी लाखुं; ³⁶  अने मनख का बेरी उकाज घर का लोग रेगा।

³⁷ "जो म्हार से बत्ती अपणा मां-बाप से परेम राखे, उ म्हारा लायक हयनी। जो म्हार से बत्ती अपणा छोरा-छोरी से परेम राखे, उ म्हारा लायक हयनी, ³⁸  अने जो अपणो कुरुस उठई के म्हारा पाछे नी चले, उ म्हारा लायक हयनी। ³⁹  जो अपणो पराण बचाड़े, उ उके खोयगा, अने जो म्हारा सरु अपणो पराण खोय उ उके बचाड़ेगा।

इनाम पावा वाळा

(मरकुस ९.४१)

⁴⁰  जो तमारे माने उ म्हारे माने, अने जो म्हारे माने, उ म्हारा मोकलवा वाळा परमेसर के माने। ⁴¹ जो नबी के नबी जाणी के माने उ नबी को फळ पावेगा, अने जो धरमी के धरमी जण जाणी के मानी ले उ धरमी को फळ पावेगा। ⁴² जो इना छोटाहुंण माय से कइंका एक के चेलो जाणी के एक ठंडो गिलास पाणी बी पीवा सरु दे तो हूं तमार से सांची कूं के उ अपणो फळ कदीज नी खोयगा।"