मत्ती 3

योहन बपतिसमा देवा वाळो

(मरकुस १.१–८; लूका ३.१–१८; योहन १.१९–२८)

¹ उना दनहुंण माय योहन बपतिसमा देवा वाळो यहूदिया इलाका का मांळ माय आयो। उ यो कई के परचार कर्‌या करतो थो। ² "पापहुंण की मांफी सरु हिरदो बदळो, क्योंके सरग को राज कने अई ग्यो।" ³  यो उज हे यहूदिहुंण को पूराणो भविसबाणी केवा वाळो यसायाह नबी, जेको बखाण यो केता होयो कर्‌यो,

"मांळ माय एक हेला पाड़वा वाळा को हेलो,

'परभु को मारग तय्यार करो

उकी बाट सुदी बणाव!'

⁴ योहन खुद तो ऊंट का रुंवां का लतरा पेर्‌यो अने कमर माय चामड़ा को कमर पेटो बान्द्‍यो होयो थो अने टिडिड्हुंण अने सेत उको जिमणो थो। ⁵ तो यरुसलेम नगर का, अने आखा यहूदिया इलाका का अने यरदन नद्दी का ऐरे-मेरे का इलाका का लोग उका कने हिट्याया, ⁶ जसा-जसा उणने अपणा पाप के मान्या; उने उणके यरदन नद्दी माय बपतिसमो द्‍यो।

⁷ पण जदे उने नरा फरीसिहुंण अने सदुकिहुंण के बपतिसमो लेवा सरु आता देख्यो तो उणकासे क्यो, "हे सरप का कणाहुंण तमारे केने चेतई द्‍यो, अरे परमेसर आड़ी से आवा वाळा करोध से दूरा भागो? ⁸ इकासरु तम साबित करी दो के तमारो हिरदो पाप से बदळी ग्यो अने परमेसर आड़ी फिरी ग्यो: ⁹  अने अपणा हिरदा माय या मती बिचारो के, 'हमारो बाप इबराइम हे,' क्योंके हूं तमार से कूं के परमेसर इना भाटाहुंण से बी इबराइम सरु ओलाद पेदा करी सके हे। ¹⁰  कुराड़ो अबे बी झाड़काहुंण की जड़ पे धर्‌यो होयो हे, अने हरेक झाड़ जो अच्छो फळ नी लावे, काट्यो अने लाय माय झोंक्यो जायगा। ¹¹ हूं तो तमारे पाणी से मन बदळवा को बपतिसमो दउं, पण जो म्हारा पाछे अई र्‌यो हे - उ म्हार से इतरो ताकत वाळो हे के हूं उकी पन्नी उठाड़वा लायक बी हयनी - उ खुद तमारे पवित्तर आतमा अने लाय से बपतिसमो देगा। ¹² उको सुपड़ो उका हात माय हे। उ अपणो आखो खळो सोरेगा, अने अपणा गंउ के गल्ला माय भेळा करेगा, पण सुक्ला के उनी लाय माय बाळेगा जो बुजवा की हयनी।

ईसु को बपतिसमो

(मरकुस १.९–११; लूका ३.२१,२२)

¹³ तो उना बखत ईसु गलील इलाका से यरदन का कराड़े योहन कने आयो के उकासे बपतिसमो ले। ¹⁴ पण योहन या कई के उके रोकवा लाग्यो, "म्हारे तो थार से बपतिसमो लेवा की जरुवत हे, अने कंई तू म्हार से बपतिसमो लेगा?"

¹⁵ पण ईसु ने जुवाब द्‍यो, "इना बखत तो असोज होवा दे, क्योंके हमारा सरु योज सई हे के असतरा परमेसर की सगळी मरजी के पूरण करां।" तो योहन ने उकी बात मानी ली।

¹⁶ बपतिसमो लेवा का बाद ईसु झट पाणी से बायरे हिट्यो अने असो होयो के, असमान खुल्यो, अने परमेसर का आतमा के कबुतर सरीको उतरतो अने अपणा अदरे आतो देख्यो। ¹⁷  अने असी सरग-बाणी हुई: "यो म्हारो परमिलो बेटो हे जेकासे हूं घणो खुस हूं।"