2
जोतिसीहुंण को आणो
1 राजा हेरोदेस जदे राज करी र्यो थो, तो उका बखत माय यहूदिया का इलाका का बेतलहम गांम माय ईसु को जनम होयो। तो उगणूं आड़ी से जोतिसी यरुसलेम माय पोंची के पुछवा लाग्या, 2 "यहूदिहुंण को राजो जेको जनम होयो उ कां हे? क्योंके हमने उगणूं माय उको तारो देख्यो, अने उके धोक देवा आया हे।"
3 जदे राजा हेरोदेस ने यो सुण्यो तो उ अने उका गेले आखा यरुसलेम का लोगहुंण घबराया। 4 तो उने लोगहुंण का सगळा म्हापुरोहितहुंण अने सासतरिहुंण के भेळा करिके उणकासे पुछ्यो, "मसीह को जनम कां होणो चइये?"
5 उणने उकासे क्यो, "यहूदिया इलाका का बेतलहम गांम माय, क्योंके नबी आड़ी से असो लिख्यो:
तू यहूदा का नगरहुंण माय कइंका से नानो हयनी,
क्योंके थारा माय से एक सासक हिटेगा,
जो म्हारी परजा इसराइल को रखवाळो रेगा।' "
7 राजा हेरोदेस ने जोतिसीहुंण के छाने से बुलाड़ी के उणकासे इनी बात को पतो लगाड़्यो के तारो ठीक कदे नगे आयो थो। 8 उने यो कई के उणके बेतलहम मोकल्या, "जाव, उना बाळक को पतो होसियारी से लगावजो, जदे उ तमारे मिळी जाय तो म्हारे समिचार दीजो के हूं बी जई के उके धोक दइ-यउं।"
9 राजा की बात सुणी के वी चली पड़्या, अने असो होयो के, जेना तारा के उणने उगणूं माय देख्यो थो, उ उणका अगड़े-अगड़े चलतो र्यो अने उनी जगा का अदरे जई के थमी ग्यो जां बाळक थो। 10 वी उना तारा के देखी के घणा खुस होया। 11 उणने घर माय जई के उना बाळक के उकी मेतारी मरियम का गेले देख्यो, अने जमीन पे लोटी के उके धोक द्यो। अने अपणो-अपणो थेलो खोली के उके सुन्नो, लुबान अने गन्धरस को चड़ावो चड़ायो।
12 तो सपना माय या चेतावणी पई के, के हेरोदेस राजा कने पाछा मती जावजो, वी दूसरा रस्ता से अपणा देस चल्या ग्या।
बची के मिसर देस माय जाणो
13 जदे जोतिसीहुंण चल्या ग्या तो देखो, परभु का दूत ने सपना माय अई के यूसफ से क्यो, "उठ्या। अने बाळक अने उकी मेतारी के लई के मिसर देस चल्यो जा, अने जदत्तक हूं नी कूं वांज रीजे, क्योंके हेरोदेस इना बाळक के ढुंडवा पे हे के उके मरवई लाखे।"
14 उ रातेज उठी के बाळक अने उकी मेतारी के लई के मिसर देस चल्यो ग्यो, 15 b अने हेरोदेस राजा का मर्या तक वइंज र्यो, के जो बचन परभु ने नबी से केवाड़्यो थो पूरण होयो, "म्हने अपणा बेटा के जो मिसर देस माय थो उके तेड़्यो।"
बाळकहुंण के मार्यो जाणो
16 जदे हेरोदेस ने देख्यो के "जोतिसीहुंण ने म्हारा गेले दगो कर्यो हे।" तो उने गुस्सा माय अई के हुकम दई के जोतिसीहुंण से ते कर्या होया बखत मुजब बेतलहम अने उका ऐरे-मेरे की जगा का सगळा बाळकहुंण के जो दो बरस या इका से कम था मरवई लाख्या।
17 तो जो बचन यरमियाह नबी आड़ी से केवाड़्यो थो पूरण होयो:
रोणो अने बिलखणो,
राहेल अपणा बाळकहुंण सरु घणी रोइरी थी
अने चुप होणो नी चइरी थी,
क्योंके अबे वी र्या हयनी।"
मिसर देस से पाछो आणो
19 जदे हेरोदेस राजो मरी ग्यो, तो मिसर देस माय परभु का एक दूत ने यूसफ के सपना माय अई के क्यो, 20 "उठ्या अने बाळक अने उकी मेतारी के लई के इसराइल का देस माय चल्यो जा, क्योंके वी जो उके मारी लाखणो चाता था, अबे वी मरी चुक्या हे।" 21 तो उ उठ्यो अने बाळक अने उकी मेतारी के गेले लई के इसराइल देस माय आयो।
22 पण या सुणी के, के अरखिलाउस राजो अपणा पिता हेरोदेस राजा की जगा पे यहूदिया का इलाका माय राज करी र्यो हे, वां जावा से डर्यो। फेर सपना माय चेतावणी पई के, वी गलील का इलाका माय चल्या ग्या। 23 अने नासरतe नामका एक नगर माय जई के रेवा लाग्या, जेकासे के नबिहुंण से क्यो बचन पूरण होय, "उ नासरी केवायगा।"