9
Ini Denu Sa Tigtu Datù Tumebow
9 Na, o medoo etaw diyà sa menuwa Siyon, keanggan yu temù.
Owoy petibos yu ma, kiyu i medoo tegeHélusalém,
enù ka umangay diyà keniyu sa datù yu.
Kagdi sa tigtu metiengaw owoy tumaban diyà sa medoo kuntelà di.
Dodoo petukééyen di kagdi enù ka kumudà diyà sa asnu.
Hê, nati asnu daa sa kudaan di amuk tumebow.a
10 Mig-ikagi Datù Nemula i, guwaen di, “Kedanan ku diyà sa tanà Islaélb sa medoo kalitun atung gamiten da eggila,
owoy kedanan ku ma diyà Hélusalém sa medoo kudà atung eggamiten da eggila.
Tepuen ku ma sa medoo busug atung gamitan da eggila.
Seupionen ku sa medoo balangan etaw anì kumelanih sa keugpà da langun.
Mesakupan sa datù yu sa tanà kedu diyà kilidan dagat denu tebowon agdaw taman sa kilidan dagat denu eledan agdaw,
owoy kedu diyà sa lawa't wayeg Upelatis taman sa tampadan tanà.”
Ini Denu Sa Kepelikù Sa Medoo Etaw I Nemula
11 Na, mig-ikagi Datù Nemula i, guwaen di, “O medoo etaw ku, migkeeles sa nesepasadan binaelan ku diyà keniyu danà sa depanug.c Huenan di, launen ku sa medoo etaw diyà keniyu nebilanggu diyà sa paligì endà duen wayeg. 12 Na, kiyu i medoo nebilanggu, pelikù yu angay diyà sa niyu melinek kenà eg-ugpà, enù ka duen doo sa mepion paginawaen yu. Ini egoh di egtulonen ku sa egoh ku tumakep sa kepelikù ku sa medoo langun taman pineka da diyà keniyu. 13 Gelesen ku sa tanà Huda lagà sa busug ku, owoy pelagaen ku seleb sa tanà Islaél.d Pelagaen ku ma sundang sa medoo tegeSiyon, enù ka pengayawen ku sa medoo tegeGelisiya.”
14 Na, mekeiling sa gaeb migpesoyol sa egoh i Datù Nemula egpehaa diyà sa medoo etaw di, owoy sumindaw sa medoo seleb di lagà silà. Agulé tumegbuli Datù Nemula i owoy mangay mengayaw diyà sa medoo kuntelà di mekeiling sa kelamag siling kedu diyà kimataan. 15 Ipaten i Datù Nemula épê dakel egkegaga sa medoo etaw di, owoy tumaban da diyà sa medoo kuntelà da. Metibos da diyà sa kenà da egsegilaway nekeiling sa etaw eghiluwen, owoy pelesuten da depanug sa medoo kuntelà da. Sumanawsanaw sa depanug iling sa depanug hinagtay binuwah diyà sa atung kenà da egsumbalì sa igbegay da diyà si Nemula.
16 Amuk meuma iya wé agdaw, alukan i Datù Nemula sa medoo etaw di, lagà sa tegeipat kebilibili umaluk sa medoo kebilibili di. Agulé sumenang da diyà sa tanà di lagà sa medoo metolol imu-imu igpedeket diyà sa sayap bulawan. 17 Tigtu kumetolol da. Kumegebù sa medoo melaud owoy kumelanih ma sa palas sa medoo kenogon danà di kumedoo sa metebas da palay owoy sa magtu bunga palas.