3
Ini Sa Kesimbà I Habakuk
1 Na, ini sa kesimbà i Habakuk sa tegesugkow kagi i Nemula.
2 O Datù Nemula, dinineg ku sa tulon denu keniko owoy negaip a danà sa medoo binaelan ko egoh anay. Huenan di, dulì ko baeli ini egoh di owoy pehauwi ko sa ketabang ko kenami owoy hiduwi ko kami, apiya di pa egbulitan ko kami.
3 Hinaa ku sa mapulù Nemula migtebow kedu diyà Idom owoy kedu diyà sa tuduk Palan. Nebensek senang di sa langit, owoy kagdi daa sa meolò diyà siini sinukub langit. 4 Migtebow lagà sa agdaw egteleséng, owoy egkemitkemit sa senang di diyà sa belad di enù ka dahiya kenà sa tunung di nelidung. 5 Nekehuna diyà kenagdi sa dakel linadu owoy nekesetugdug sa kepatay. 6 Egoh di migtigdeg, kinayungkung di sa tanà. Owoy egoh di mig-inengteng, egtegedted sa medoo balangan tanà. Nenanal sa medoo dakel tuduk owoy nesepatà sa medoo getan. Dodoo tapay doo endà mesiat sa tunung di. 7 Hê, hinaa ku nelimedangan sa medoo etaw tegeKusan, owoy eglukub ma sa medoo tegeMidiyan.
8 O Datù Nemula, enù di ya binulitan ko sa medoo lawa’t wayeg owoy egkelanggetan ko sa dagat? Dodoo endà, enù ka lagà ka migkudà umangay umaluk sa medoo etaw ko. 9 Hinugut ko sa seleb ko owoy tapay ko dé igtahù diyà sa busug ko. Pinelekang ko ma sa tanà anì umukit sa medoo lawa’t wayeg. 10 Miglanuhen sa medoo tuduk egoh da mighaa keniko owoy migkeleges sa udan kedu diyà langit. Owoy mig-eluk ma sa wayeg dalem sa tanà owoy migsenok ma sa lambeg dagat. 11 Endà nekeipanaw senang sa agdaw owoy sa bulan danà sa lilaw seleb ko owoy danà sa sindaw sigpù ko. 12 Ligò ko eg-ipanaw diyà siini sinukub langit, temù ka egbulit, owoy danà sa kebulit ko sinadsadan ko sa medoo balangan tanà. 13 Inangay ko eg-alukan sa medoo etaw ko owoy sa datù hinemilì ko.a Inuméméén ko ma sa datù tegebael medaet, owoy kinedanan ko sa langun egkegaga di. 14 Dinilek ko sa ulu sa medoo sundalu di danà sa hagda mendaa kinemkem egoh da migtebow lagà sa kelamag siling anì pigtamayan da kami. Egkeiyapan da sa kepelihay da kenami, enù ka diyà sa kehaa da lagà ké daa sa etaw pubeli eglidung. 15 Hê, pinesawsaw ko sa medoo kudà ko eg-ukit diyà sa teliwadà dagat owoy migbuhok sa wayeg di.
16 Na, egoh ku migdineg langun iya wé, minekiyang sa atay ku. Miglukub sa lawa ku owoy sa tiem ku owoy migkelengilu ma sa tuelan ku. Dodoo petanaan ku mangat-angat sa agdaw egoh i Datù Nemula migtamay sa medoo etaw migpengayaw kenami.
17 Apiya di pa endà dé mulok sa kayu pigus owoy endà ma dé munga sa keleg palas owoy sa kayu olibu, owoy apiya di pa endà dé duen sa meketu diyà sa medoo hinemula, owoy apiya di pa mematay ma dé sa medoo balangan hinagtay owoy endà dé duen sapì dalem sa kenà da eg-ugpà, 18 tapay a doo meanggan enù ka sumalig a diyà si Datù Nemula sa tegealuk ku. 19 Si Datù Nemula sa egpebagel kenak. Pinelagà di sa lisen ku sa lisen seladeng anì endà mekedagsà a, owoy egtabangan di aken eg-ukit diyà sa medoo tuduk.