2
1 Na, gumemow a diyà sa mehagtaw dalesan atung kenà egbantay, enù ka angat-angatan ku amuk ngadan sa isagbì i Nemula diyà kenak denu sa igselsel ku.
Ini Sa Sagbì I Nemula Diyà Si Habakuk
2 Agulé migsagbì Datù Nemula i diyà kenak, guwaen di, “Petumàmà ko sulati sa igpehaa ku diyà keniko anì melemu mebasa sa etaw egletu anì metulon di diyà sa medoo etaw. 3 Enù ka duen sa agdaw tinapay ku sa egoh di meketuu sa medoo igpehaa ku diyà keniko. Tigtu meketuu iya wé. Apiya di pa melugay, angat-angati yu enù ka meketuu doo. 4 Taa yu, hih. Endà kumelalù sa medoo etaw hambug tegebael medaet. Dodoo sa medoo etaw egbael mepion, kumelalù da polo danà sa kepigtuu da diyà kenak.”
Mepigtamayan Sa Medoo Tegebael Salà
5 Na, meakalan sa medoo etaw danà sa medoo langun taman da, owoy endà metanà pedu sa etaw bigtelam-amen owoy sa tegepeolòolò. Endà metepek da lagà sa kepatay endà duen tamanan, huenan di tepelen da sa langun balangan tanà owoy sigkemen da ma sa langun etaw. 6 Dodoo meuma doo sa agdaw egoh sa medoo etaw nesigkem sumulì diyà sa migsigkem kenagda owoy peumàumaan da kagda. Guwaen da, “Mekehiduhidu yu, kiyu i medoo etaw migkekawasà danà yu migtipon sa medoo langun taman pinenakaw yu owoy danà yu ma migpesubela sa kepeanak yu sa pilak igpeutang diyà sa medoo liyu etaw.” 7 Dodoo petow dé meuma sa agdaw sa egoh yu mekeutang owoy mepeges yu ma mekebayad sa anak di, enù ka tumebow sa medoo kuntelà yu owoy lumukub yu ma danà di pakawen da sa medoo langun taman yu. 8 Linampasan yu sa medoo etaw diyà sa medoo balangan tanà, huenan di sumulì da ma lumampas diyà keniyu. Inimatayan yu sa medoo etaw owoy pinedaetan yu ma sa menuwa da owoy sa etaw eg-ugpà dahiya.
9 Mekehiduhidu yu, kiyu i medoo etaw migkekawasà danà sa medaet kepeukit yu. Binaelan yu sa mehagtaw dalesan anì endà duen sa medaet mekeuma diyà keniyu. 10 Dodoo kiyu doo sa pesuwan di memalaan sa malayan yu, enù ka danà yu mig-imatay sa medoo etaw lagà mendaa sa niyu lawa sa inimatayan yu. 11 Enù ka danà sa binaelan yu, tipuwen sa medoo kelatkat batu diyà sa dalesan yu kiyu owoy sumagkung ma sa medoo patal di petuu.
12 Mekehiduhidu yu, kiyu i medoo etaw migbael sa dakel menuwa danà sa pilak nekuwa yu egoh yu mig-imatay sa medoo etaw owoy danà ma sa medaet kepeukit yu. 13 Iya sa ungayà i Datù Nemula épê dakel egkegaga sa egoh di meulow daa sa langun egkelitegan sa medoo balangan etaw owoy tumalà ma daa sa langun inudesan da. 14 Enù ka meuma kani sa egoh di mepenù siini uwang tanà sa keketiig denu sa dakel egkegaga i Datù Nemula, lagà sa wayeg dagat migbensek.
15 Mekehiduhidu yu, kiyu i etaw egpehilu sa medoo duma yu. Takaan yu peinem taman sa egoh da tigtu hiluwen owoy mig-uloy da anì pelononon yu. 16 Buyu dé meuma sa agdaw yu mekelapeg diyà sa medoo mekemala. Inem yu dé anì hiluwen yu owoy memalaan yu ma. Mekeuma doo diyà keniyu sa kebulit i Nemula, huenan di mesambian kekemala sa kepeolòolò yu. 17 Kinasing yu sa medoo kayu diyà sa ketalunan diyà sa tanà Libano, huenan di meimatayan yu ma. Owoy inimatayan yu ma sa medoo uled tanà, huenan di melimedangan yu danà sa medoo uled tanà. Iya sa mebaelan enù ka inimatayan yu sa medoo etaw owoy pinedaetan yu ma sa medoo menuwa diyà siini uwang tanà, lapeg sa medoo etaw di.
18 Ngadan ulan sa inetaw egpenemulawen yu sa binaelan etaw daa tumbaga owoy pilak owoy bulawan? Iya sa linegkangan sa medoo butbut. Maen di ya egsaligan sa medoo etaw sa inetaw endà egpekeikagi di sa binaelan da mendaa? 19 Mekehiduhidu sa etaw eg-ikagi diyà sa sebaen inetaw kayu, guwaen di, “Limata ka,” owoy sa eg-ikagi diyà sa sebaen inetaw batu, guwaen di, “Enaw ka dé.” Enù di ya, meketulù pa iya wé? Linuhuban bulawan owoy pilak, dodoo tapay doo endà egginawa di. 20 Dodoo si Datù Nemula, eg-ugpà diyà sa mapulù dalesan di, huenan di mepion amuk endà suméléken sa langun etaw diyà sa taengan di.