Amos 8

Ini Sa Nehauwan I Amos Denu Sa Baskit Nepenù Sa Melegà Bunga Kayu

¹ Na, duen dema sa nehauwan ku igpehaa i Datù Nemula diyà kenak. Hê, hinaa ku sa sebaen baskit nepenù sa melegà bunga't kayu hinemula. ² Agulé mig-igsà Datù Nemula i, guwaen di, “O Amos, ngadan sa eghauwen ko?”

Migsagbì a, guwaen ku, “Sebaen baskit nepenù sa medoo melegà bunga't kayu.”

Agulé mig-ikagi Datù Nemula i diyà kenak, guwaen di, “Neuma dé sa ketamanan sa medoo etaw ku tegeIslaél. Endà dé mepelumanan sa penemdem ku migtamay kenagda. ³ Amuk meuma iya wé agdaw, mebaluy dumelawit polo sa medoo bayi tegeduyuy diyà sa metolol dalesan sa datù. Dumuen sa medoo nematay meketukid diyà sa langun menuwa, huenan di egpetemedtemed sa medoo etaw.”

Ini Denu Sa Kepigtamay I Nemula Diyà Sa Medoo TegeIslaél

⁴ Na, dinegdineg yu ini i, kiyu i etaw tegeumémê sa medoo etaw endà duen negaga owoy kiyu i egkelukuy ma egkedan sa etaw pubeli diyà sa tanà yu. ⁵ Iya sa penemdem yu, guwaen yu, “Endà dé mekeangat-angat ké sa egoh di meelut sa mapulù agdaw anì mekedagang ké dema sa teligo. Ungayà ké medelamet meelut sa Agdaw Keetud anì mekedagang ké dema. Agulé pilagaen ké sa lagà di, owoy gamiten ké sa asadan endà mepion, owoy pedulian ké sa timbangan anì melugi sa medoo etaw meli. ⁶ Pilagaen ké sa kedagang ké sa medoo teligo endà iseg di mepion. Owoy beliyen ké ma sa etaw pubeli anì meudipen danà di endà mekebayad sa utang di, apiya di pa tukééy daa sa utang di éhê lagà sa sebaen bakiyà.”

⁷ Na, migpengibet Datù Nemula i sa egpedakelen sa medoo tegeIslaél, guwaen di, “Endà dé melipengan ku duu sa medoo medaet binaelan da. ⁸ Huenan di, pelinugen ku sa tanà, owoy suminegaw ma sa langun etaw eg-ugpà diyà tanà. Mekayung sa uwang tanà, hê mulul owoy melenà lagà sa lawa't wayeg Nilo amuk sigel sumenok owoy metigok.

⁹ “Amuk meuma iya wé agdaw, pesalepen ku sa agdaw apiya di pa mekebugsang pelawà, owoy pedelemanen ku sa uwang tanà apiya di pa agdaw pelawà. Aken si Datù Nemula sa eg-ikagi ini i. ¹⁰ Baluyen ku agdaw kekebukul sa agdaw kekeanggan yu, owoy mebaluy kedelawit polo sa duyuy yu egkeanggan. Pekegalen ku kiyu sa binekas sakù owoy ipeul-ul ku ma sa balut ulu yu, enù ka mekeiling yu sa etaw egdelawit danà di nematay sa anak di bugtung. Iya sa mebaelan yu enù ka tigtu kelikutan temù iya wé agdaw.

¹¹ “Mekeuma doo sa agdaw sa egoh di pebitilen ku sa medoo etaw diyà sa uwang tanà. Meketues da, dodoo beken tigtu kaenen sa kenà da meketues. Melupahan da ma dodoo beken wayeg sa pesuwan da eglupahan. Dodoo bitilen da polo sa kedineg da sa kagi i Nemula. Aken si Datù Nemula eg-ikagi ini i. ¹² Dumunggéldunggél da mipanaw kedu tebowon agdaw mangay diyà eledan, owoy kedu kimataan mangay diyà belabagan, enù ka pengauwen da hedem sa kagi i Datù Nemula diyà siini uwang tanà. Dodoo endà mehaa da duu. ¹³ Amuk meuma iya wé agdaw, apiya di pa mebagel sa medoo kenogon owoy sa medoo melaud, meendaan da doo tuleng danà da tigtu melupahan. ¹⁴ Na, sa medoo etaw egpengibet danà da egsalig diyà sa medoo inetaw diyà Samaliya, eg-ikagi da, guwaen da, ‘Danà sa egpenemulawen diyà Dan,’ ataw ka ‘Danà sa egpenemulawen diyà Bilsiba.’ Dodoo metuwal da doo owoy endà dé mekeenaw da.”