Amos 7

Ini Sa Nehauwan I Amos Denu Sa Medoo Kasuk

¹ Na, duen sa nehauwan ku igpehaa i Datù Nemula diyà kenak. Hê, hinaa ku Nemula i egsetipon sa segelugba kasuk egoh di ubus dé kinumpay sa mepion keluwen baed sa datù owoy eglobung dema sa medoo pesu di. ² Hinaa ku ma sa egoh sa medoo kasuk migkaen sa langun keluwen diyà tanà. Agulé mig-ikagi a, guwaen ku, “O Datù Nemula, peuloyi ko sa medoo etaw ko tugod i Islaél. Amuk endà mesenulê ka, endà dé mehagtay da, enù ka endà mebagel da owoy tukééy da ma daen.”

³ Huenan di, nepelumanan sa penemdem i Datù Nemula, owoy mig-ikagi, guwaen di, “Endà mebaelan ini i hinaa ko.”

Ini Sa Nehauwan I Amos Denu Sa Apuy

⁴ Na, duen dema sa nehauwan ku igpehaa i Datù Nemula diyà kenak. Hê, hinaa ku Nemula i egtapayen di sa dakel apuy atang ipigtamay di sa medoo etaw di. Hê, neeti sa dagat danà di kinaen apuy owoy neulow ma sa tanà. ⁵ Agulé mig-ikagi a, guwaen ku, “O Datù Nemula, egpehiduhidu a diyà keniko padeng ko iya wé. Amuk endà mesenulê ka, endà dé mehagtay sa medoo etaw ko tugod i Islaél, enù ka endà mebagel da owoy tukééy da ma daen.”

⁶ Huenan di, nepelumanan dema sa penemdem i Datù Nemula owoy mig-ikagi, guwaen di, “Endà meketuu ini i.”

Ini Sa Nehauwan I Amos Denu Sa Tuntun

⁷ Na, duen dema sa nehauwan ku igpehaa di diyà kenak. Hê, hinaa ku Datù Nemula i egtigdeg medapag diyà sa kutà owoy migsabà tuntun, enù ka miggamit da tuntun egoh da migbael sa kutà. ⁸ Inigsaan di aken, guwaen di, “O Amos, ngadan sa eghauwen ko?”

Hê, migsagbì a, guwaen ku, “Tuntun.”

Agulé mig-ikagi dema Datù Nemula i, guwaen di, “Taa ko, eggamiten ku siini tuntun anì mehaa sa egoh di nekeamu sa medoo etaw ku tegeIslaél, lagà sa sebaen kutà endà nekeunut di diyà sa tuntun. Endà dé mepelumanan sa penemdem ku migtamay kenagda. ⁹ Medaetan sa medoo kenà da egsimbà sa medoo tugod i Isak, owoy megubal ma sa medoo mapulù simbaan diyà sa tanà Islaél. Ipeimatay ku ma imet danà sundang sa medoo tugod i Datù Héloboam.”

Ini Denu Si Amos Owoy Si Amasiyas

¹⁰ Na, si Amasiyas sa tegesimbà diyà sa menuwa Bétél. Migpeuwit kagi diyà si Datù Héloboam tegeIslaél, guwaen di, “Duen sa penemdem i Amos mael medaet diyà keniko diyà siini tanà Islaél. Medaetan sa kedatuan ko danà sa medoo inikagi di. ¹¹ Ini sa kagi i Amos, mematay gaa Datù Héloboam i danà gila, owoy mesigkem ma gaa sa medoo tegeIslaél anì mekeangay da diyà sa sebaen ma tanà.”

¹² Agulé mig-ikagi Amasiyas i diyà kenak, guwaen di, “O Amos, enget dé sa ketulon ko, o tegesugkow kagi i Nemula. Likù ka dé angay tanà Huda dò, owoy pengaa ka sa kehagtayan ko dutu danà sa keantap ko. ¹³ Yaka dé egtulon sa antap ko diyà siini menuwa Bétél, enù ka ini sa menuwa kenà sa datù egsimbà diyà sa mapulù simbaan sa medoo tegeIslaél.”

¹⁴ Agulé migsagbì a diyà kenagdi, guwaen ku, “Beken aken sa tegesugkow kagi i Nemula sa egsukayan amuk eg-antap. Dodoo aken polo sa tegeipat sa medoo hinagtay owoy sa tegeupion sa medoo kayu pigus. ¹⁵ Dodoo kinuwa i Datù Nemula aken kedu diyà sa galebek ku tegeipat hinagtay, owoy sinugù di ma aken anì isugkow ku sa kagi di diyà sa medoo etaw di tegeIslaél. ¹⁶ Na, dinegdineg ko sa kagi i Datù Nemula. Egpesabuhen ko hedem aken egsugkow sa kagi di, owoy egpesabuhen ko ma hedem aken egtegudon denu sa mebaelan sa medoo tegeIslaél tugod i Isak. ¹⁷ Huenan di, o Amasiyas, ini sa kagi i Datù Nemula denu keniko. Meimatayan sa medoo anak ko danà gila owoy mesebaedbaed ma sa tanà ko diyà sa medoo liyu etaw. Mebaluy tegepediyangdang sa sawa ko diyà siini menuwa, owoy kuna, mematay ka doo dutu siedò tanà sa medoo etaw beken tegeIslaél. Mesigkem ma doo sa medoo tegeIslaél anì mekeangay da diyà sa sebaen ma tanà mediyù kedu diyà sa hagda tanà.”