Daniyél 8

Ini Sa Nehauwan I Daniyél Denu Sa Kebilibili Owoy Kambing

¹ Na, egoh sa ketelu di gepalay sa lugay i Bélsasal migkedatù, duen dema sa nehauwan ku. ² Ini sa nehauwan ku. Egtigdeg a gaa diyà sa keba sa lawa't wayeg Ulay diyà sa menuwa Susa. Neulingutan kutà iya wé menuwa owoy nesakupan sa pelubinsiya Ilam.

³ Hê, hinaa ku sa mandangan kebilibili épê duwa metaes sidung egtigdeg diyà sa keba't wayeg. Uman pa metaes sa sidung di hudihudi migtunas diyà sa muna. ⁴ Egoh ku mighaa duu, takà egsidung sa kebilibili anì kedanan di sa langun egtigdeg denu eledan agdaw owoy denu belabagan owoy denu kimataan. Endà duen liyu uled tanà mekegaga diyà kenagdi, owoy endà ma duen sa mekegaga umaluk kenagda diyà sa egbaelan di. Huenan di, egbaelan di sumalà dé sa ungayà di owoy kumedakel ma sa egkegaga di.

⁵ Ligò ku eg-inengteng duu, petow dé duen sa mandangan kambing migtebow kedu diyà eledan agdaw. Egkambang diyà awang dodoo endà eg-utuh di diyà tanà egoh di eg-ipanaw. Duen sa sebaen dakel sidung di diyà sa elet mata di. ⁶ Migpedapag diyà sa mandangan kebilibili épê duwa sidung sa hinaa ku diyà sa keba't wayeg. Hê, ginebek di danà sa kebulit di. ⁷ Hinaa ku sa egoh di egdagseg, eg-iliden di sa kebilibili danà di tigtu egkelangget. Hê, sinidung di, agulé netepù sa duwa sidung sa kebilibili. Endà nekeatu sa kebilibili diyà sa kambing, huenan di nekehibat diyà tanà owoy takaan di eg-utuhan. Endà ma duen sa mekealuk kenagdi.

⁸ Agulé kumedakel pa uman sa egkegaga sa kambing. Dodoo egoh di migkedakel dé sa egkegaga di, netepù sa sidung di owoy dumuen sa mekesambì tumunas epat sidung di. Mig-isalu sa sebaen sidung di denu belabagan, owoy mig-isalu sa sebaen denu kimataan, owoy mig-isalu sa sebaen denu tebowon agdaw, owoy mig-isalu sa sebaen denu eledan. ⁹ Diyà siini epat sidung di, duen sa sebaen migsagpak taman sa egoh di tigtu migkedakel. Migkedakel sa egkegaga di taman sa egoh di nesakupan di sa tanà denu belabagan owoy sa tanà denu tebowon owoy sa tanà igpasad i Nemula. ¹⁰ Uman pa miglenuk sa egkegaga di taman nekesekuk diyà langit. Huenan di, eggilawen di sa medoo éhê bituen diyà langit sa medoo etaw i Nemula. Agulé egnabuen di diyà tanà sa duma bituen owoy egkogkogon di ma. ¹¹ Danà di egpedakeldakel, huenan di egkelukuyan di eg-atuwan sa kaunutan sa medoo egsugùsuguen i Nemula diyà langit. Hinawidan di sa uman agdaw kebegay etaw diyà si Nemula, owoy pinedaetan di ma sa Dalesan i Nemula. ¹² Huenan di, nekesalà sa medoo etaw enù ka migsabuh da egbegay sa uman agdaw kebegay diyà si Nemula owoy nekedan ma sa tuu kesimbà. Hê, egkekuwa sa sidung migsagpak sa langun ungayà di.

¹³ Agulé dinineg ku sa duwa egsugùsuguen i Nemula egseolomoy da. Mig-igsà sa sebaen, guwaen di, “Ngadan taman sa lugay di ini i medoo egkebaelan? Nengan sa taman di mehawidan sa uman agdaw kebegay etaw diyà si Nemula? Ngadan sa taman di pandayaen pedatù sa medaet? Owoy ngadan sa taman di mesadsadan sa Dalesan i Nemula owoy sa medoo etaw épê egkegaga diyà langit?”

¹⁴ Agulé migsagbì sa keduwa egsugùsuguen i Nemula, guwaen di, “Sengibu magatus lima pulù agdaw sa lugay di. Hê, amuk meubus iya wé, mekepelikù dé sa tapay ukit kesimbà diyà sa Dalesan i Nemula.”

Ini Sa Egoh I Gabiyél Migselepang Sa Nehauwan I Daniyél

¹⁵ Na, aken si Daniyél mighaa sa nehauwan. Ligò ku egpenemdem denu sa selepangan di, petow dé duen sa éhê palas etaw migtigdeg diyà sa taengan ku. ¹⁶ Agulé duen sa dinineg ku kagi’t etaw kedu diyà sa lawa't wayeg Ulay. Mig-ikagi, guwaen di, “O Gabiyél, tulon ko diyà kenagdi sa selepangan sa nehauwan di.”

¹⁷ Hê, egoh i Gabiyél migpedapag diyà kenak, miglagkeb a diyà tanà danà ku tigtu nelimedangan. Dodoo mig-ikagi diyà kenak, guwaen di, “Kuna sa etaw daa diyà tanà, dodoo mepion amuk metiigan ko sa selepangan sa nehauwan ko denu sa mebaelan amuk meuma sa sabuhanan agdaw.”

¹⁸ Ligò di eg-ikagi diyà kenak, nekedanan a tuleng owoy nekelagkeb a diyà tanà. Dodoo sinabaan di aken anì meketigdeg a. ¹⁹ Agulé mig-ikagi diyà kenak, guwaen di, “Tulonon ku kuna sa mebaelan amuk meuma sa kebulit i Nemula. Sa nehauwan ko, iya denu sa mebaelan amuk meuma sa sabuhanan agdaw. ²⁰ Iya sa selepangan sa kebilibili épê duwa sidung sa duwa datù diyà sa tanà Midiya owoy tanà Pélsiya. ²¹ Na sa kambing, iya lagà sa kedatuan diyà tanà Gelisiya. Owoy sa dakel sidung di diyà sa elet mata di, iya sa muna migpedatù diyà tanà Gelisiya. ²² Hê, sa epat sidung di migtunas egoh sa sebaen netepù, iya sa epat kumedatù amuk mebaed epat baed sa uwang tanà Gelisiya. Pedatù da dodoo endà meketepeng sa egkegaga da diyà sa egkegaga sa muna datù.

²³ “Agulé egoh di buyu dé meelut sa kedatuan da owoy sa egoh da egtemù dé egbael salà, dumuen dema sa sebaen pedatù tigtu mebalaw owoy tegeakal ma. ²⁴ Tigtu kumebagel, dodoo beken danà daa sa hagdi egkegaga. Medoo sa medaet baelan di megaipan etaw owoy meketuu ma sa langun ungayà di. Atuwan di sa medoo ulu-ulu épê egkegaga lapeg sa medoo etaw metiengaw diyà sa kehaa i Nemula. ²⁵ Temuen di sa keakal di, huenan di atuwan di sa medoo etaw, agulé petow dé imatayan di kagda. Pedakelen di ma kagdi, huenan di gilawen di doo sa Datù diyà sa langun datù. Dodoo mepigtamayan doo, beken duu danà etaw.

²⁶ “O Daniyél, tuu sa nehauwan ko denu sa egoh di mehawidan sa kebegay etaw diyà si Nemula amuk magtu simag owoy amuk mahapun. Dodoo yaka pelawà egtulon duu enù ka melugay pa meketuu iya wé.”

²⁷ Na, aken si Daniyél, nekedanan a bagel owoy nelugaylugay a eglinadu. Agulé egoh ku nelikuan, mig-enaw a owoy migpelikù a diyà sa galebek igsugù sa datù diyà kenak. Dodoo tapay a doo egkebukul danà sa nehauwan ku, enù ka melikut sa selepangan di.