INI DENU SA MEDOO NEHAUWAN I DANIYÉL (7:1-12:13)
7
Ini Sa Tegeinep I Daniyél Denu Sa Epat Uled Tanà
1 Na, egoh sa muna palay egoh i Bélsasal migkedatù diyà sa tanà Babiloniya, migtegeinep Daniyél i owoy duen sa nehauwan di ligò di eghibat diyà sa kateli di. Ini sa tegeinep di igsulat di, 2 guwaen di, “Sebaen sigep duen sa nehauwan ku. Hinaa ku sa dakel dagat egkesetugdaan sa epat meleges kelamag owoy egbakat sa dagat. 3 Hê, petow dé duen sa epat dakel uled tanà migpegaun kedu diyà dagat owoy nesetigesa sa palas da.
4 “Na, éhê palas liyun sa muna uled tanà, dodoo duen sa pakpak di éhê palas banug. Egoh ku eghahaa, nepesuk sa pakpak di. Nehenat sa lawa di owoy mineketigdeg éhê palas etaw, owoy nebegayan ma penemdem lagà sa penemdem etaw.
5 “Na, sa keduwa uled tanà, éhê palas oso. Migtudoy owoy duen sa binangà di telu gusuk. Hê, duen sa eg-ikagi diyà kenagdi, guwaen di, ‘Daesi ko dé sa medoo ekud da taman sa egoh ko tumakas.’
6 “Agulé hinaa ku sa ketelu di uled tanà éhê palas liyopaldo. Dodoo duen sa epat pakpak di diyà sa iyug di, owoy epat ma sa ulu di owoy nebegayan ma egkegaga anì kumedatù.
7 “Agulé egoh di neubus iya wé, hinaa ku sa keepat di uled tanà. Tigtu mekepesu eghahauwen owoy tigtu mebagel ma. Putow sa medoo dakel ngipen di, huenan di tekeben di daa amuk duen sa egkekuwa di, owoy utuhan di sa nesamà di. Tigesa sa palas di diyà sa liyu telu uled tanà enù ka duen sa sepulù sidung di. 8 Egoh ku eghahaa sa medoo sidung di, duen sa sebaen tukééy sidung di egtunas owoy nebadut sa telu tapay sidung di anì dumuen sa elet di. Épê medoo mata siini sidung lagà mata etaw, owoy duen ma sa ebà di takà eg-ikagi egpedakeldakel.”
Ini Sa Nehauwan Denu Sa Etaw Melalù Taman Melugay
9 Agulé egoh ku eghahaa, duen sa medoo metolol bangkù igtenà. Mig-ugsad diyà sa sebaen metolol bangkù sa etaw épê lalù taman melugay. Mekesilang sa ginis di owoy sa balut ulu di danà di tigtu mebulà. Éhê eglegleg sa bangkù di, owoy hediya ma éhê eglegleg sa medoo nelibol lisen sa bangkù di. 10 Nekeiling kedelug wayeg sa legleg apuy kedu diyà sa metolol bangkù di. Ngibu-ngibuwan sa egsugùsuguen di egbael sa langun ungayà di, owoy lagsàlagsaan sa etaw migtigdeg diyà sa taengan di. Hê, umedung dé kumukum, huenan di binekah di sa medoo libelu.
11 Na, ligò ku eg-uman eg-inengteng, egdinegen ku sa kepeolòolò siedò tukééy sidung sa keepat uled tanà. Inuman ku eghahaa taman sa egoh di neimatayan sa keepat uled tanà, owoy nedaetan sa lawa di danà di nekedugsù diyà sa apuy. 12 Na, sa liyu telu uled tanà, nekedan dé sa egkegaga da dodoo nehagtay da pelawà, dodoo endà dé iseg di melugay sa hagtay da.
13 Agulé ligò ku eg-uman eghahaa sa nehauwan ku egoh iya wé sigep, hinaa ku sa éhê palas etaw migpeunut diyà gaeb eg-angay egdapag diyà siedò etaw épê lalù taman melugay. 14 Kagdi sa binegayan egkegaga owoy lalag owoy kedatuan, anì kagdi sa pangunutan sa langun etaw diyà sa medoo balangan tanà owoy sa langun balangan kagi etaw. Endà duen ketamanan sa egkegaga di, owoy endà ma medaetan sa kedatuan di.
Ini Sa Selepangan Sa Tegeinep I Daniyél
15 Na, aken si Daniyél, nebogo a owoy nelimedangan a danà iya wé medoo nehauwan ku. 16 Huenan di, migpedapag a diyà sa sebaen etaw migtigdeg dahiya, owoy mig-igsà a diyà kenagdi denu sa selepangan sa nehauwan ku. Agulé sinelepang di diyà kenak, 17 guwaen di, “Sa epat dakel uled tanà, iya sa epat kumedatù diyà siini uwang tanà. 18 Dodoo sa medoo etaw i Datù Nemula sa Nemula épê dakel egkegaga, mebegayan da doo sa kedatuan owoy mehagda ma taman melugay.”
19 Agulé mig-uman a eg-igsà denu sa selepangan sa keepat uled tanà sa tigesa palas diyà sa liyu owoy tigtu mekepesu eghahauwen. Amuk duen sa egkekuwa di, tekeben di daa danà sa ngipen di putow owoy danà ma sa sulu di tumbaga, agulé utuhan di daen sa nesamà di. 20 Inigsà ku ma sa selepangan sa sepulù sidung di owoy sa sebaen hudihudi migtunas sidung di owoy sa telu nebadut tapay sidung di. Épê mata iya wé sidung di owoy duen ma sa ebà di takà eg-ikagi egpeolòolò. Iya sa palas di uman pa mebagel iya wé sidung diyà sa medoo liyu sidung di. 21 Egoh ku eghahaa, eggilawen iya wé sidung sa medoo etaw metiengaw diyà sa kehaa i Nemula, owoy uyayaan sa sidung kagda. 22 Agulé hinaa ku siedò etaw épê lalù taman melugay mig-angay egtampil diyà sa medoo etaw i Datù Nemula, enù ka neuma dé sa agdaw sa egoh da mebegayan egkegaga anì kumedatù da.
23 Na, ini sa keselepang di diyà kenak. Guwaen di, “Sa keepat uled tanà, iya sa keepat kedatuan kumedatù diyà siini uwang tanà owoy tigesa diyà sa langun liyu kedatuan. Lagà tekeben di daa sa langun kedatuan owoy utuhan di ma. 24 Na, sa sepulù sidung di, iya lagà sa sepulù datù kumedatù diyà sa kedatuan di. Agulé lumesut sa sebaen ma pedatù owoy tigesa sa hagdi adat diyà sa kedoo da. Kagdi sa petuhì enù ka tabanan di sa telu datù. 25 Anan meketabiyà diyà si Datù Nemula sa medoo ikagiyen di, owoy pelihayen di ma sa medoo etaw i Nemula. Ungayà di mesambian sa adat kesimbà da owoy sa medoo uledin denu sa kesimbà da, owoy sakupen di sa hagdi kedatuan sa medoo etaw i Nemula taman telu gepalay owoy tengà.
26 “Dodoo amuk meuma sa kekukum i Nemula, mekedan sa egkegaga iya wé datù owoy tigtu medaetan ma sa kedatuan di. 27 Agulé sa egkegaga owoy sa lalag sa langun kedatuan diyà siini sinukub langit, mekebegay doo diyà sa medoo etaw i Nemula, sa Nemula épê dakel egkegaga. Endà duen ketamanan sa kedatuan di, owoy mekepangunut ma diyà kenagdi sa langun datù diyà siini uwang tanà.”
28 Na, iya taman sa nehauwan ku. Tigtu a migpesu owoy migkelusék a ma, dodoo igtagù ku daa iya wé diyà sa pedu ku.