Daniyél 3

Ini Sa Egoh Da Egpenemula Sa Inetaw Bulawan

¹ Na, sebaen agdaw migsugù Datù Nabokonosol i egpetuwang sa inetaw bulawan. Duwa pulù owoy pitu kamitelu sa kehagtaw di owoy duwa kamitelu owoy tengà sa kelabel di. Igtagù di diyà sa sugud Dula diyà sa nesakupan sa pelubinsiya Babiloniya. ² Agulé igsasà di sa langun ulu-ulu, lapeg sa medoo kaunutan owoy sa medoo atung tegesasà owoy sa medoo tegeipat pilak owoy sa medoo tegeantang owoy sa langun épê galebek diyà sa nesakupan sa kedatuan di anì langun da lumenged amuk meuma sa kepista di sa inetaw igpebael di. ³ Huenan di, nesetipon da langun enù ka miglenged da sa kepista sa inetaw pinetigdeg i Datù Nabokonosol, owoy migtigdeg da diyà sa taengan iya wé inetaw.

⁴ Agulé migpetaled eg-ikagi sa atung tegepetiig, guwaen di, “Ini sa igsugù diyà sa langun etaw, muni dé sa keduwan di ataw ka sa balangan kagi di. ⁵ Amuk dinegen yu sa dagì sa tegbuli owoy sa dagì sa medoo liyu balangan dalemetan, lagkeb yu dé owoy penemula yu sa inetaw bulawan sa pinetigdeg i Datù Nabokonosol. ⁶ Sumalà dé sa etaw endà lumagkeb owoy endà egpenemula iya wé, petow dé idugsù diyà sa apuy eglegleg diyà sa atung kenà egtemeg.”

⁷ Huenan di, egoh da egdineg sa dagì tegbuli owoy sa dagì sa medoo liyu balangan dalemetan, miglagkeb sa langun balangan etaw kedu diyà sa langun balangan tanà owoy diyà sa langun balangan kagi etaw anì penemulawen da sa inetaw pinetigdeg i Datù Nabokonosol.

Ini Sa Egoh Sa Telu Loyuk I Daniyél Endà Migpangunut Diyà Sa Igsugù Sa Datù

⁸ Na, egoh iya wé agdaw, duen duma etaw tegeBabiloniya mig-angay egtulon diyà sa datù sa binaelan sa medoo Hudiyu. ⁹ Mig-ikagi da diyà si Datù Nabokonosol, guwaen da, “O Datù, ungayà ké kumelalù ka taman melugay. ¹⁰ Duen sa uledin ko, o Datù, lumagkeb sa langun etaw amuk dinegen da sa dagì tegbuli owoy sa dagì sa medoo liyu balangan dalemetan anì penemulawen da sa inetaw bulawan. ¹¹ Sumalà dé sa etaw endà lumagkeb owoy endà penemula sa inetaw, idugsù diyà sa apuy eglegleg diyà sa atung kenà egtemeg. ¹² Dodoo duen ma doo sa etaw Hudiyu ginelal ko ulu-ulu diyà sa medoo egbaelan diyà sa pelubinsiya Babiloniya, endà migpangunut da diyà sa igsugù ko, o Datù. Iya sa ngadan da si Sadelak owoy si Misak owoy si Abédnigo. Endà egpangunut da diyà sa egpenemulawen ko, owoy endà ma eglagkeb da egpenemula sa inetaw bulawan pinetigdeg ko.”

¹³ Agulé tigtu egbulit Nabokonosol i owoy igpeangay di Sadelak i owoy si Misak owoy si Abédnigo. Hê, inuwit da kagda diyà sa taengan di. ¹⁴ Agulé inigsaan di kagda, guwaen di, “O Sadelak owoy Misak owoy Abédnigo, tuu pa sa inikagi da sa egoh yu endà egpangunut diyà sa egpenemulawen ku, owoy sa egoh yu endà eglagkeb egpenemula sa inetaw bulawan pinetigdeg ku? ¹⁵ Na, ini egoh di amuk dinegen yu sa dagì tegbuli owoy sa dagì sa medoo liyu balangan dalemetan, lagkeb yu depa owoy penemula yu dé sa inetaw bulawan igpebael ku, anì endà dumuen sa medaet mebaelan yu. Dodoo amuk endà penemulawen yu duu, mekedugsù yu doo mapes diyà sa apuy eglegleg diyà sa atung kenà egtemeg. Amuk hediya, ngadan sa nemula mekealuk keniyu kedu diyà sa egkegaga ku?”

¹⁶ Hê, migsagbì Sadelak i owoy si Misak owoy si Abédnigo, guwaen da, “O Datù, endà duen sa isagbì ké keniko denu iya wé. ¹⁷ Amuk mekedugsù ké diyà sa apuy eglegleg diyà sa atung kenà egtemeg, si Datù Nemula sa egpangunutan ké sa mekealuk kenami kedu diyà sa apuy owoy alukan di doo kami kedu diyà sa egkegaga ko. ¹⁸ Apiya di pa beken iya sa baelan di, metiigan ko doo sa egoh ké endà mangunut diyà sa egpenemulawen ko owoy sa egoh ké ma endà lumagkeb egpenemula sa inetaw bulawan pinetigdeg ko.”

Ini Sa Egoh Da Igdugsù Diyà Sa Apuy

¹⁹ Hê, neumanan sa kebulit i Nabokonosol diyà si Sadelak, si Misak owoy si Abédnigo, owoy migkedaet sa pedu di diyà kenagda. Huenan di, igsugù di anì takepen pitu gulê sa keedup sa apuy diyà sa atung kenà egtemeg. ²⁰ Agulé sinugù di sa medoo tigtu mebagel sundalu di anì poloten da kagda owoy ipedugsù di kagda diyà sa apuy eglegleg diyà sa atung kenà egtemeg. ²¹ Huenan di, pinolot da kagda owoy igdugsù da diyà sa atung kenà egtemeg tapay da doo épê ginis. ²² Hê, danà sa datù migsugù sa tigtu meedup apuy, huenan di minematay sa medoo etaw mig-angay egdugsù kenagda danà sa siloy di. ²³ Dodoo kagda i telu pinolot, minenabù da diyà sa apuy eglegleg diyà sa atung kenà egtemeg.

²⁴ Agulé tigtu negaip Datù Nabokonosol i owoy petow dé migtigdeg. Hê, mig-igsà diyà sa medoo salu di, guwaen di, “Telu daa geetaw atu sa pinolot ta owoy igpedugsù ta diyà apuy?”

Agulé migsagbì da, guwaen da, “Hoò, o Datù.”

²⁵ Dodoo mig-ikagi sa datù, guwaen di, “Haa yu! Epat geetaw polo sa eghauwen ku eg-ipanawpanaw diyà sa apuy. Endà nepolot da owoy endà ma egkedaig da. Éhê palas sa nemula sa keepat di.”

²⁶ Huenan di, migpedapag Nabokonosol i diyà sa bengawan sa atung kenà da egtemeg, owoy mig-umow, guwaen di, “O Sadelak owoy Misak owoy Abédnigo, kiyu sa egsugùsuguen sa tigtu mapulù Nemula. Laun yu, angay yu dini.”

Hê, miglaun da telu. ²⁷ Agulé nesetipon diyà kenagda sa medoo kaunutan owoy sa medoo ulu-ulu owoy sa langun épê galebek diyà sa datù. Hinaa da endà nedaig da diyà sa apuy. Apiya sa balut ulu da daa, endà nedabdaban di. Endà neulow sa kawal da, owoy endà ma duen ngadeg ebel diyà kenagda.

²⁸ Agulé mig-ikagi Nabokonosol i, guwaen di, “Meolò sa Nemula da i Sadelak owoy si Misak owoy si Abédnigo. Pineangay di diyà kenagda sa egsugùsuguen di anì mealukan sa medoo etaw di egsalig diyà kenagdi. Endà migpangunut da diyà sa igsugù ku denu sa kepenemula da sa inetaw, enù ka pinemaen da dé polo sa egoh da idugsù diyà sa apuy. Endà sumimbà da diyà sa liyu egpenemulawen, asal beken sa hagda Nemula. ²⁹ Huenan di, migsugù a amuk duen sa etaw, sumalà dé sa balangan etaw ataw ka muni dé sa balangan kagi etaw, amuk umikagi da medaet denu sa Nemula da i Sadelak owoy si Misak owoy si Abédnigo, sepisangpisangen sa lawa di owoy gubalen ma sa dalesan di. Enù ka endà duen sa liyu nemula mekealuk iling iya wé.”

³⁰ Agulé binegayan sa datù Sadelak i owoy si Misak owoy si Abédnigo sa dakel gelal diyà sa pelubinsiya Babiloniya.