Ini Sa Igsulat I
DANIYÉL
1
Denu Sa Kegalebek Da I Daniyél Diyà Sa Dalesan I Datù Nabokonosol
1 Na, egoh di egkatin dé sa ketelu di gepalay sa lugay i Hoakim datù diyà sa tanà Huda, migpengayaw da Datù Nabokonosol i tegeBabiloniya diyà sa menuwa Hélusalém. 2 Hê, pinandayà i Datù Nemula Datù Hoakim i tegeHuda anì melugpì i Datù Nabokonosol. Agulé egoh i Nabokonosol migpelikù Babiloniya dò, inuwit di ma sa duma langun taman kedu diyà sa Dalesan i Nemula, owoy igtagù di diyà sa bilik sa dalesan sa egpenemulawen di.
3 Agulé sinugù i Datù Nabokonosol Aspinas i sa ulu-ulu diyà sa medoo egsugùsuguen di anì hemilien di diyà sa medoo tugod i Islaél nesigkem sa medoo melaud anak sa datù owoy sa anak sa medoo liyu ulu-ulu ma. 4 Iya sa etaw hemilien di sa mepion palas owoy melanih sa lawa di owoy épê netiigan owoy medoo sa netiigan di galebek owoy melabel penemdem anì tigtu mekegaga gumalebek diyà sa dalesan sa datù. Owoy igsugù di ma diyà si Aspinas anì tuluen di kagda sumulat owoy masa sa kagi etaw tegeBabiloniya. 5 Owoy igsugù di ma anì mebegayan da sa duma mepion kaenen sa datù owoy inemen uman agdaw. Telu gepalay sa lugay da tuluen, agulé mebaluy da dé gumalebek diyà sa datù.
6 Iya ngadan sa medoo duma tegeIslaél nehemilì si Daniyél, si Ananiyas, si Misaél owoy si Asaliyas, owoy anan da tugod i Huda. 7 Dodoo duen sa magtu ngadan da binaelan sa ulu-ulu sa medoo egsugùsuguen sa datù. Na, si Daniyél iya sa kepengadan di si Béltésasal, owoy si Ananiyas iya sa kepengadan di si Sadelak, owoy si Misaél pinengadanan di si Misak, owoy si Asaliyas pinengadanan di si Abédnigo.
8 Na, iya sa ungayà i Daniyél kaenen di daa sa mepion mekaen owoy inemen di daa sa mepion meinem diyà sa kehaa i Nemula. Huenan di, migpegeni diyà si Aspinas anì pandayaen di kagdi endà egkaen owoy endà eg-inem sa medoo igmengana da diyà kenagda. 9 Na, danà i Nemula, huenan di egketuuwan Aspinas i diyà si Daniyél. 10 Dodoo inikagiyan di, guwaen di, “Egpesu a diyà sa datù, enù ka kagdi sa migsugù sa kaenen yu owoy sa inemen yu. Petow ki daa imatayan di aken amuk hauwen di kuna megasà dodoo atung megebù sa medoo duma ko.”
11 Na, duen sa tegebantay pineipat i Aspinas diyà si Daniyél owoy sa telu loyuk di. Agulé mig-ikagi Daniyél i diyà sa tegebantay kenagda, guwaen di, 12 “Tukawi ko daa taman sepulù agdaw. Begayi ko daa kami tinabel owoy wayeg. 13 Agulé setepeng ko sa palas ké diyà sa palas sa medoo batàbatà egkaen sa mepion kaenen igsugù sa datù, owoy amuk nehalì sa kehaa ko kenami baeli ko dé sa ungayà ko.” 14 Hê, tinuu di sa ungayà i Daniyél, owoy tinepengan di kagda taman sepulù agdaw.
15 Agulé egoh di neelut dé sa sepulù agdaw, uman pa mepion sa palas da i Daniyél owoy uman da pa megebù diyà sa langun batàbatà migkaen sa medoo mepion kaenen igsugù sa datù. 16 Huenan di, endà dé egmenganawen sa tegebantay kagda sa medoo mepion kaenen igsugù sa datù, dodoo tinabel daa sa mengana di kenagda.
17 Na, binegayan i Nemula siini epat melaud tegeIslaél sa melabel penemdem da owoy sa egkegaga da meketiig sa medoo egbasawen. Owoy binegayan di ma Daniyél i sa egkegaga egselepang sa medoo egkehauwan owoy tegeinep.
18 Na, egoh di neelut dé sa telu gepalay sa lugay da tuluen igsugù sa datù, agulé inuwit i Aspinas sa langun melaud mangay diyà sa taengan i Datù Nabokonosol. 19 Agulé tinukid di kagda egsetawit, owoy hinaa di endà duen sa meketepeng diyà si Daniyél owoy si Ananiyas owoy si Misaél owoy si Asaliyas. Huenan di, ginelal di kagda sa kesaligan di. 20 Sumalà dé sa igsà sa datù diyà kenagda, netakep sepulù gulê sa hagda keketiig diyà sa keketiig sa medoo tegebael balitmata owoy sa medoo épê lambus eg-ugpà diyà sa tanà nesakupan sa kedatuan di.
21 Na, mig-ugpà Daniyél i diyà sa metolol dalesan sa datù taman sa egoh di nekeuma sa anay palay i Silo tegePélsiya migkedatù diyà sa menuwa Babiloniya.a