42
Ini Denu Sa Tegealuk Pineangay I Nemula
1 Na, mig-ikagi Nemula i, guwaen di, “Ini sa egsuguen ku pebagelen ku. Hinemilì ku kagdi owoy netuuwan a diyà kenagdi. Peugpaen ku sa Suguy ku diyà kenagdi, owoy kagdi sa petiig sa ketuu diyà sa medoo etaw diyà sa medoo balangan tanà. 2 Endà peegal-egal di umikagi diyà sa medoo dalan. 3 Endà ekedan di duu sa etaw apiya di pa lagà da sa keluwen melemu metepù, owoy endà ma padengan di duu apiya di pa lagà da sa tukééy legdaw palitaan. Dodoo mesaligan megay sa ketuu diyà sa langun etaw. 4 Endà mesemek di owoy endà ma sumabuh di taman endà mebaelan di duu sa ketuu diyà sa medoo etaw diyà siini uwang tanà. Sa medoo etaw diyà sa medoo balangan tanà, apiya di pa mediyù, meiyap da umangat-angat sa ketulù di.a
5 Na, si Datù Nemula sa migbael sa langit owoy binekah di ma. Binaelan di ma siini uwang tanà owoy sa langun egtunas dahiya. Kagdi ma sa egbegay hagtay diyà sa langun etaw diyà tanà. Hê, mig-ikagi Datù Nemula i diyà sa egsuguen di, guwaen di, 6 “Aken si Datù Nemula sa mighemilì keniko, owoy binegayan ku kuna egkegaga anì ipetiig ko sa ketuu diyà siini uwang tanà. Peukiten ku diyà keniko sa pasad ku diyà sa langun etaw, owoy kuna sa umuwit legdaw diyà sa medoo balangan tanà diyà siini sinukub langit.b 7 Kuna sa peilag sa medoo langap owoy sa lumaun sa medoo nebilanggu diyà sa medaet lagà deleman. 8 Aken si Datù Nemula sa tigtu Nemula. Endà duen sa liyu nemula mekeingani sa senang ku ataw ka sa dakel egkegaga ku. 9 Neketuu dé sa medoo inikagi ku egoh anay. Owoy tulonen ku ma diyà keniyu ini egoh di sa medoo magtu mebaelan apiya di pa endà pelà egkebaelan di.”